Jaqsylyq jasaýdan jalyqpaıdy

Qoǵam • 25 Qarasha, 2020

Jaqsylyq jasaýdan jalyqpaıdy

36 ret kórsetildi

Qazir keıbir jas otbasylar ózdiginen baspana alýǵa shamalary kele bermeıdi. Eńbekaqynyń mardymsyzdyǵy úkimettiń qoldaý baǵdarlamasyna enip, nesıe alýyna múmkindik týdyrmaıdy. Al ata-analary tarapynan kómek joq, óıtkeni keıbiriniń ózi kúnin zorǵa kórip otyr.

Jaqsybaı SAMRAT

Soltústik Qazaqstan oblysynyń Taıynsha aýdanynyń turǵyny Denıs Dobratanyń otbasy da sondaıdyń biri bolǵan. Ol áıeli Elenamen ekeýi bireýdiń eski úıin jaldap, segiz jyl turyp kelgen edi. Qansha jóndese de bir tesigin bitese, ekinshisi shyǵatyn eski úı jas otbasyna pana bola almaıdy. Jas balalary betinen bozdaǵy shyǵyp, azynaǵan úıde bir jylyna almaı, únemi dirdekteýmen júredi. Araq iship, buzaqylyq qylmasa da turmys jaǵdaılary tómen, balalaryn talapqa saı asyraı almaıtyn otbasy retinde áleýmettik qoldaý qyzmeti olardyń bóbekterin memlekettiń qaraýyna alý qaýpi bar ekenin eskertip ketedi.

Osyndaı qysyltaıań shaqta úı ıeleri «Meıirimdi júrek» degen qoǵamdyq qory bar ekenin estip, olarǵa kómektespes pe eken dep qaırylady. Qorqa soǵyp barsa jalyndaǵan jas jigitter men qyzdar bulardyń jaǵdaıyna belsene aralasyp ketedi. Volonterler úıdiń jaǵdaıyn zerttep, aınalasy bir aptanyń ishinde jańa baspana alyp bergende jas otbasynyń tóbesi kókke sál-aq jetpeı qalǵan. Endi 2021 jyldy ózimizdiń oshaǵymyzda qarsy alatyn boldyq degen erli-zaıyptylar jýrnalısterge eki ezýleri eki qulaǵyna jetken qýanyshpen aıtyp jatty.

«Meıirimdi júrek» qorynyń volonterleri osy aýdandaǵy «Tıolaın» JShS jaǵdaıdy túsindirip, jas otbasyna kómektesýdi ótingen eken. Qolynan kelgen kómegin seriktestik aıap qalmaı, adamgershilik jasap, jas otbasyna aýmaǵy 70 sharshy metr bolatyn birshama jańa úıdi satyp alyp beredi. Seriktestiktiń basshysy Vıktor Dolgalevtiń ózi bul másele týraly bylaı deıdi: «Biz adamdardy osy jerge ornyqtyrý maqsatyn aldymyzǵa qoıyp otyrmyz. Adamdarsyz, jaqsy jumysshylarsyz, sheber mamandarsyz jaqsy tabysqa jetý múmkin emes. Sondyqtan biz adamdardyń ultyna, senimine, kásibine qaramaı tek jumys isteı alatyn bolsa osy jerge ornyqtyrýǵa tyrysamyz. «Meıirimdi júrek» qoryna biz ózimiz qaırylyp, bizdiń osyndaı talabymyzdan shyǵatyn otbasylaryn qarastyrýdy ótingen edik. Bizdiń jalǵyz shartymyz bar, ol – adam araq ishpeýi kerek. Osyndaı bolsa biz kómegimizdi aıamaımyz. Osy jyldyń aıaǵyna deıin taǵy bir jas otbasyna osyndaı kómek jasaýdy josparlap otyrmyz. Mine, bizdiń shartymyzdan shyqqan myna otbasyna kómekteskenimizge ózimiz de qýanyp turmyn».

«Meıirimdi júrek» qorynyń tóraǵasy Ekaterına Safonova jas otbasyna úı ǵana emes, barlyq qajetti jıhazdardy da satyp ápergenin aıtty. Volonterlerdiń kúshimen jóndeý jumystaryn da ózderi júrgizip beripti. Bul isterge Taıynsha qalasyndaǵy «Ashyq júrek» qoǵamynyń belsendileri atsalysqan. Olar jergilikti qaıyrymdy kásipkerlerdi uıymdastyryp, jas otbasyna qajetti turmystyq zattardyń bárin alyp bergen eken.

Bizdiń aramyzda adamgershiliktiń týyn joǵary ustaıtyn osyndaı jandar bar. Olar jaqsylyq jasaýdan jalyqpaıdy. Árbir ıgilikti isterine aldymen ózderi qýansa, kómek alǵandar tipti razy.

Soltústik Qazaqstan oblysy