55 kılo salmaqtyń jartylaı fınalynda almatylyq Qorlan Jaqansha taldyqorǵandyq Marlan Muqashevty utsa, jambyldyq Janserik Sársembıev qyzyljarlyq Amanǵalı Bekbolatovtan basym tústi. Qos myqty aqtyq synda jolyqty. Kópshilik bul jekpe-jekte Jaqanshanyń utatynyna senimdi boldy. Osyǵan deıin Azııa birinshiliginde úsh ret júldegerler qatarynan kóringen ol byltyr Nur-Sultanda ótken álem chempıonatynda kúmis medaldi ıelendi. Sársembıev te ondaı ataqtyń biri de joq. Biraq ol minezdi jigit eken. Áıgili qarsylasymen qaımyqpaı aıqasqan Janserik bas júldeni jeńip aldy. Qorlan kúmisti qanaǵat tutty. Jartylaı fınalda olarǵa jol bergen qos balýan qola medaldi ıelendi.  

60 kılo salmaq dárejesiniń favorıtteri Meırambek Aınaǵulov pen Aıdos Sultanǵalı ekeni sózsiz. Ekeýi de dúnıejúzilik dodalarda daralanǵan dúldúlder. 26 jastaǵy Meırambek 2017 jáne 2019 jyldary júldegerler qataryna qosyldy. Parıjde ol kúmis alsa, Nur-Sultanda qolaǵa qol sozdy. Odan bólek, Aqtóbe oblysynyń ókili Azııa oıyndarynda úshinshi satyǵa taban tirese, Azııa birinshiliginde bir kúmis pen eki qolany qorjynǵa saldy. 24 jastaǵy Aıdos 2018 jyly Býdapeshte uıymdastyrylǵan álem chempıonatynda qola medaldi moınyna ildi. Qyzylordalyq sportshynyń basqa da ataqtary az emes. Osy jaıttyń barlyǵyn oı eleginen ótkizgen mamandar basty tartys aıtýly qos sańlaq arasynda órbıdi dep topshalady. Biraq bul joramal joqqa shyqty. Aınaǵulov shırek fınalda óskemendik Ernar Fıdahmetovke jol berdi.

Fınalda Aıdos Sultanǵalı Ernar Fıdahmetovten basym tússe, Meırambek Aınaǵulov pen aqmolalyq Dastan Zarlyhanov qola medaldi enshiledi.

63 kılo salmaqta Qorlannyń týǵan aǵasy Baǵlan Jaqansha da aqtyq synǵa deıin alqynbaı jetti. Biraq ol da sheshýshi tusta súrindi. Almatylyq órenniń jambyldyq Sultan Ásetulyna áli jetpedi. Nur-Sultandyq Asaýhat Muhamadıev pen taldyqorǵandyq Ǵalym Qabdýnasarov qola medaldi enshiledi.

67 kılo salmaqtaǵy Almat Kebisbaevtiń jankeshtiligine súısinbeý múmkin emes. Jasy 33-ke taıap qalǵan Almatttyń halyqaralyq arenada Qazaq eli namysyn qorǵap júrgenine 12 jyldan asa ýaqyt boldy. Sol aralyqta Semeı óńiriniń óreni álem chempıonatynda tórt ret jáne Azııa oıyndarynda eki ret júlde aldy. Arasynda kúmisi men qolasy da bar. Kebisbaev eki márte Azııa chempıony atanyp, taǵy eki ret kúmispen kúpteldi. London men Rıo Olımpıadalarynda baq synady. Sońǵy jarysynda ol besinshi orynǵa taban tiredi. Bıylǵy el birinshiliginde Kebisbaevqa Meıirjan Shermahanbet laıyqty qarsylyq kórsetedi dep oıladyq. Biraq jas daryn bastapqy básekelerdiń birinde Soltústik Qazaqstan oblysynyń balýany Danııar Qalenovke 3:5 esebimen utyldy.  

Nátıjesinde Almat barlyq qarsylasyn qapy qaldyryp, bas júldeni qanjyǵasyna baılady. Aqtyq aıqasta ol Almaty oblysynyń ókili Nurbek Qyzyrovty 7:5 esebimen utty. Aqtóbelik Táńirbergen Naýryzbaev pen shymkenttik Ádilhan Sátaev júldegerler qataryna qosyldy. 

72 kılo salmaq dárejesiniń fınalynda atyraýlyq Kaharman Qısmetov pen almatylyq Azat Sadyqov kúsh synasty. Bul báseke alǵashqysynyń paıdasyna sheshildi. Temirlan О́mirbaı (Almaty qalasy) men Oljas Súleımen (Qyzylorda) úshinshi satyǵa taban tiredi.  

77 kılo salmaqta bas júlde úshin tartys Almaty oblysynyń qos sańlaǵy – Ashat Dilmuhamedov pen Demeý Jadyraevtyń arasynda ótti. Bul básekeni barsha mamandar tapjylmaı tamashalady. Biraz jyldan beri osy salmaqtyń tizgini Ashattyń qolynda. Onyń Azııa chempıony jáne sol jarystyń úsh dúrkin júldegeri degen ataqtary bar. Álemdik dodalarda Dilmuhamedov jeńis tuǵyryna synyq súıem qalǵanda súrinip júr. Demeý 2017 jyly Parıjde ótken álem chempıonatynyń kúmis júldegeri. Qurlyqtyń basty dodasynda eki ret jeńis tuǵyryna kóterildi. Biraq bul ataqtarǵa ol sál jeńil salmaqtarda qol jetkizdi. Soǵan qaramastan Jadyraev Almatydaǵy jarysta ózin jaqsy qyrynan kórsetti. Fınalda Demeý Ashattan 7:3 esebimen aılasyn asyryp, el chempıony atandy. Azııa chempıondary Maksat Erejepov pen Temirlan Shadýkaev qola medaldi qorjynǵa saldy.    

82 kılo salmaqta Mıras Barshylyqovtyń baǵy jandy. Qostanaılyq sportshy fınalda shymkenttik Shámil Batyrovqa shań qaptyryp ketti. Temirlan Baıǵanın (Qostanaı) men Qýanyshbek Dosjanov (Aqtóbe) úshinshi oryndy ıelendi.  

87 kılo salmaq dárejesinde Azııa chempıony Nursultan Tursynovtyń tuǵyry bıik boldy. Birneshe jyl sporttan shettetilgen Shyǵystyń shymyr jigiti boz kilemdi ábden saǵynyp qalǵan eken. Alataý baýraıynda ol tamasha óner kórsetti. Jarysty basynan aıaǵyna deıin bir demmen ótkizgen Nursultan fınalda elordalyq Azamat Kustybaevtyń tas-talqanyn shyǵardy. Esep – 9:1. Elmar Ýkalı (Shymkent) men Abdýlazız Kocheradze (Almaty) úshinshi oryndardy ıemdendi.

97 kılo salmaqta Erulan Ysqaqovtyń tegeýrinine eshkim shydamady. Azııa oıyndarynyń eki dúrkin qola júldegeri, Azııa chempıony degen ataǵy bar Qaraǵandynyń qyrany fınalda Syr boıynyń saıypqyrany Oljas Syrlybaıǵa san soqtyrsa, Meıirbek Qordabaı (Jambyl) men Salaýat Ahmetqalı (ShQO) júldegerler sanatyna qosyldy.  

130 kılo salmaqtyń fınalynda shymkenttik Álimhan Syzdyqov pen aqmolalyq Talǵat Jıentaev kúsh synasty. Bul báseke Ońtústikten kelgen alyptyń asyǵy alshysynan tústi. Aqtóbelik Asylbek Jánibekuly men qostanaılyq Mansur Shadýkaev úshinshi satylarǵa jaıǵasty. Bir aıta keterligi, elimizdiń eń úzdik balýandary Nurmahan Tynalıev pen Damır Kúzembaev aıtýly dodaǵa qatyspady.