BAQ ókilderin 1 jeltoqsan – Qazaqstan Respýblıkasynyń Tuńǵysh Prezıdent kúni merekesimen quttyqtaı otyryp, QHA Tóraǵasynyń orynbasary Janseıit Túımebaev memleket saıasatyn aqparattyq turǵydan qoldaýǵa, qoǵamdyq kelisim men jalpyulttyq birlikti nyǵaıtýǵa, Qazaqstan halqy Assambleıasynyń qyzmetin nasıhattaýǵa úles qosyp júrgen jýrnalısterge alǵysyn bildirdi.
"Bárimizge belgili Qazaqstan Respýblıkasynyń Tuńǵysh Prezıdenti-Elbasy N.Á.Nazarbaevtyń Kóshbasshylyǵymen elimiz álemniń saıası kartasynan laıyqty oryn alyp, bıik halyqaralyq bedelge ıe boldy. Táýelsizdiktiń 30 jyly ishinde júzege asqan barlyq reformalar men mańyzdy baǵdarlamalar, elimizdiń qol jetken tabystary jýrnalıster nazarynan tys qalǵan emes", dedi ol.
Qazaqstan halqy Assambleıasy jyl saıyn memleket saıasatyn aqparattyq turǵydan qoldaýǵa, qoǵamdyq kelisim men jalpyulttyq birlikti nyǵaıtýǵa belsendi úles qosyp júrgen jýrnalısterdi qoldaý maqsatynda "Shańyraq" respýblıkalyq baıqaýyn ótkizýdi dástúrge aınaldyrǵan.
Bıylǵy jyly kúlli álem jurtshylyǵyn bir tarynyń qaýyzyna syıǵyzǵan qaterli pandemııa Qazaqstan halqyn aınalyp ótken joq.
Qıyn kúnderge qaramastan respýblıka jurtshylyǵy bıyl qazaqtyń uly aqyny Abaı Qunanbaıulynyń 175 jyldyǵy, uly ǵalym Ábý Nasyr ál-Farabıdiń 1150 jyldyǵy, sondaı-aq Qazaqstan halqy Assambleıasynyń 25 jyldyǵy sııaqty mańyzdy sharalardy túrli formatta atap ótti.
"Osyndaı ulyq merekelerdiń el arasynda keń kólemde nasıhattalýyna sizder zor úles qosyp, aıryqsha qoldaý bildirdińizder. Prezıdent Q.K.Toqaev Qazaqstan halqyna arnaǵan Joldaýynda áleýmettik jáne etnıkalyq toptar arasyndaǵy kelisimdi nyǵaıtý týraly tapsyrma bergen bolatyn.
Osy oraıda otandyq jýrnalıstıka qoǵamdyq kelisimdi damytý, arandatýshy aqparattarǵa qarsy ımmýnıtetti qalyptastyrý jáne qoǵam birligin saqtaý taqyryptaryn jıi kóterýi tıis.
Memlekettik tildiń mártebesin kóterý men memleket saıasatyn halyqqa túsindirý máselesinde de qolyna qalam ustaǵan aǵaıynnyń atqaratyn róli aıryqsha. Biz ár ýaqytta barlyq BAQ ókilderimen tyǵyz qarym-qatynasta jumys isteýge kúsh salyp kelemiz. Osy retti paıdalana otyryp, sizderdiń taraptaryńyzdan kórsetilip jatqan aqparattyq qoldaý úshin arnaıy alǵys bildiremin! Qazaqstan halqy Assambleıasynyń respýblıkalyq «Shańyraq» baıqaýynyń jeńimpazdaryn shyn júrekten quttyqtaımyn!" - dedi ol.
Is-sharaǵa etnomádenı birlestik ókilderi, Assambleıa músheleri jáne respýblıkalyq BAQ bas redaktorlary qatysty.
