Kelesi jyly otandyq zań ǵylymnyń atasy, Qazaqstan Respýblıkasy Memlekettik syılyǵynyń, Prezıdenttiń beıbitshilik jáne rýhanı kelisim syılyqtarynyń ıegeri zań ǵylymdarynyń doktory, akademık S. Zımanovtyń týǵanyna júz jyl tolǵaly otyr.
Ol elimizdiń ulttyq quqyqtyq júıesiniń qalyptasyp, damýyna aıryqsha úles qosyp, óziniń atyn otandyq ıýrısprýdensııanyń tarıhyna altyn áriptermen jazǵan tulǵa desek artyq aıtpaǵandyq bolar edi.
S. Zımanovtyń ǵylymı-zertteý eńbekteri neginen alǵanda, memleket pen quqyq tarıhy men teorııasyna Qazaqstan men Ortalyq Azııanyń ózge de aımaqtarynda ulttyq memleketterdiń qalyptasýy men damý joldaryna, táýelsiz qazaq memleketiniń quqyqtyq platformasynyń qalyptasýyna jáne t.b. óte ózekti máselelerge arnalǵan.
Onyń ómir joly – qazirgi ýaqytta óte sırek qubylysqa aınalǵan, ǵylymǵa adal ǵalymnyń jáne ary taza memlekettik qaıratkerdiń aqıqat beınesi. Salyq Zımanuly joǵary bilikti quqyqtanýshy ǵalymdar men tájirıbelik zańger qyzmetkerlerdi daıyndaý tárizdi asa mańyzdy óriste de tynbastan eńbek etti. Ol asa úlken ǵylymı mektepti qalyptastardy, onyń shákirtteri qazirgi tańda elimizdiń túpkir-túpkirinde, quqyq salasynyń ártúrli óristerinde jemisti eńbek etýde. Olardyń qatarynda ustazdarynyń aq batasymen ózderin ǵylymı, aǵartýshylyq jáne qoǵamdyq-saıası qyzmetke arnaǵandary da jeterlik.
Qazaq halqynyń qolyna ýaqyttyń ózi bergen tarıhı múmkindikti paıdalanyp, atalarymyzdyń armany bolǵan táýelsiz memleketti qalyptastyrýǵa degen qajettilik, kóptegen birtýar tulǵalardyń tarıh sahnasyna jarq etip shyǵýyna sebepker boldy. Akademık S. Zımanov osyndaı tarıhı tulǵalardyń biri jáne biregeıi bola bildi, dedi quttyqtaý sózinde Ýnıversıtet rektory B. Ahmetov.
Sharada akademık Salyq Zımanov týraly beınerolık kórsetilip, qonaqtar – Mańǵystaý oblysy ákimdiginiń, Mańǵystaý oblystyq sotynyń ókilderi, "Bıler keńesi" Qoǵamdyq Birlestiginiń ókili men Túpqaraǵan aýdandyq bilim júıesin damytý ortalyǵynyń» dırektory, Túpqaraǵan aýdanynda ornalasqan "S.Zımanovtyń ómiri men shyǵarmashylyǵyna arnalǵan murajaıdyń" qyzmetkeri sóz sóılep, S.Zımanovtyń Joǵarǵy oqý oryndarynda, ǵylymı uıymdarda basshy, Qazaqstan Respýblıkasy Prezıdentiniń janyndaǵy Konsýltatıvtik keńestiń, Qazaqstan Respýblıkasynyń Memlekettik saıasat jónindegi Ulttyq keńesiniń múshesi, Qazaqstan Respýblıkasy Joǵarǵy Keńesiniń depýtaty atanǵan jyldarynda da týǵan tilimiz ben tól mádenıetimizdiń tynysyn keńeıtýge, elimizdiń yrysyn kóbeıtýge eńbek sińirgendigin, Ata Zańymyzdyń negizin qalasyp, zańdylyqtyń saltanat qurýyna atsalysqandyǵyn, sondaı-aq táýelsizdiktiń alǵashqy qıyn da jaýapty jyldarynda Memleket basshysynyń qasynda bolyp, azattyqqa jańa qol jetkizgen Otanymyzdyń órkendeýine baǵyt-baǵdar berdi, ult zııalylarynyń ónegesimen halyqqa shynaıy qyzmet etkendigin baıandady. Bilikti zańger maman retinde egemendik, táýelsizdik jolyndaǵy Qazaqstannyń halyqaralyq qatynastaryn zańdastyryp, qazaq tiline memlekettik mártebe berý, prezıdenttik basqarý ınstıtýtyn engizý, quqyqtyq-demokratııalyq reformalardy júrgizý isine belsene aralasyp, qazaq halqynyń quqyqtyq júıesin zerttep, bıler men sheshenderdiń bılik ónerin búgingi urpaqqa jetkizgendigi, Qazaqstan egemen el bolǵannan keıin de memlekettiń Konstıtýsııasy men qoldanystaǵy zańdaryn qabyldaý jáne jetildirý maqsatynda kóp ter tókkendigi, Respýblıka Joǵarǵy keńesiniń depýtaty, Komıtet tóraǵasy jáne Joǵarǵy keńes Tóralqasynyń múshesi bola júrip, el úshin asa mańyzdy zańdardyń júıeli jasalyp, ornyqty bekitilýine atsalysqandyǵy aıtyldy.
"Quqyqtaný" kafedrasynyń dosenti S.Alıbekovtyń aıtýynsha, aptalyq aıasynda "Quqyqtaný" mamandyǵynyń stýdentteri arasynda "Qazaq bıler soty – biregeı sot júıesi" atty shyǵarmalar saıysy ótip, "Ádilettilik –memlekettiń myzǵymas tuǵyry" atty breın-rıng uıymdastyrylady. Sondaı-aq onlaın formatta "Salyq Zımanov – ǵulama zańger, ustaz, qaıratker" atty ashyq tárbıe saǵaty, "S.Zımanov jáne onyń otandyq zań ǵylymynyń negizin qalaýdaǵy roli" onlaın ǵylymı-semınar uıymdastyrylady.
