Oblystyq qoǵamdyq densaýlyq basqarmasy men «Densaulyq» medısına qyzmetkerleriniń jergilikti kásipodaǵy birlesip uıymdastyrǵan kezekti qaıyrymdylyq shara Túrkistan qalasynda ótti. Onda medısınalyq mekemelerde jumys isteıtin kópbalaly jáne jalǵyzbasty analar men turmys deńgeıi tómen qyzmetkerlerge eń qajetti degen azyq-túlikter úlestirildi. «Men jalǵyzbasty anamyn, alıment almaımyn. Jalǵyz tabys kózi – jumystan alatyn aılyǵym. Bir jalaqymen balalarymdy asyraý qıyn maǵan. Úlken qyzym stýdent. Densaýlyq basqarmasyna, kásipodaqqa rahmet úlken, munyń ózi bizge úlken kómek», deıdi jalǵyzbasty ana Móldir Sársenbaeva.
Sondaı-aq, kásipodaq qyzmetkerleri bul kúni Túrkistan qalasyndaǵy medısına kolledjiniń stýdentterine arnaıy stıpendııa taǵaıyndap, sertıfıkattaryn tabys etti. Endigi jerde oqýda ozat jáne belsendi jastarǵa bir jyl kóleminde shákirtaqy beriletin bolady. Aıta keteıik, medısına salasynda eńbek etip júrgen árbir qyzmetkerdiń turmystyq jaǵdaıyna beıjaı qaramaıtyn kásipodaq uıymy bıyl baspanasy órtengen jáne óndiristik jaraqat alǵan qyzmetkerlerge de materıaldyq kómek kórsetti. Al pandemııa kezinde naýqastardy emdeımin dep, ózderi baqılyq bolǵan dárigerler men medbıkelerdiń, tazalyq qyzmetkerleri men júrgizýshilerdiń otbasylaryna 100 myń teńgeden kómek berilgen. Oblystyq qoǵamdyq densaýlyq basqarmasy basshysy Marat Pashımovtyń batamasymen karantındik ahýal eskerile otyra óńirdegi medısına qyzmetkerlerine osylaısha jan jaqty qoldaý kórsetilip keledi. Materıaldyq qoldaýdan bólek aq halatty abzal jandardyń shıpajaılarda demalyp, densaýlyqtaryn jaqsartýlaryna da kóp kóńil bólinýde.
Túrkistan oblysy
