Bıyl atalǵan kásiporyn 1 mln 450 myń tonna kómir óndirdi. Osy qýanyshty sátke baılanysty, qajetti kólemge qol jetkizgen brıgadany jer betinde saltanatty jaǵdaıda qarsy alý rásimi uıymdastyryldy.
«ArselorMıttal Temirtaý» AQ Kómir departamentiniń óndiris jónindegi dırektory Sergeı Ogaı mundaı jetistiktiń ujymnyń eren eńbegi arqasynda múmkin bolǵanyn aıtady.
– Aı saıyn, jyl boıy shahta jospardy oryndaıdy jáne turaqty jumys istep keledi. Qarqynnyń tómendemeýin tileımin, – dedi ol kenshilerdi tabysymen quttyqtap turyp.
Aıta ketetin bir jaıt, bıyl Lenın atyndaǵy shahtada «Abaı» shahtasynyń kenshileri de jumys istedi. Qazir olar ózderiniń kásipornyna oralǵan.
Lenın atyndaǵy shahtanyń óndiris jónindegi dırektorynyń orynbasary Jaqsybaı Beısembaev óndirý boıynsha jyldyq bıznes-jospardy merziminen buryn oryndaýdyń ońaı bolmaǵanyn atap ótti.
– Barlyq qıyndyqtarǵa qaramastan, biz óndirý boıynsha jyldyq bıznes-jospardy merziminen buryn oryndaı aldyq. Jyl boıy bizde eki lava jumys istedi. О́ndiristik tapsyrmany oryndaýda kásiporynnyń barlyq ýchaskeleri eńbek etti, – dedi J.Beısembaev.
Qaraǵandy oblysy
