Atap aıtqanda, depýttardyń bastamasymen ázirlengen jol júrisi máselelerine qatysty zań jobasy birinshi oqylymda maquldandy.
Bul zań jobasy Memleket basshysynyń Ulttyq qoǵamdyq senim keńesiniń ekinshi otyrysynda júrgizýshilerdiń kólik quralyna Qazaqstan Respýblıkasynda berilgen júrgizýshi kýáligi men tirkeý qujattaryn ózimen birge alyp júrmegeni úshin ákimshilik jaýapkershiligin alyp tastaý týraly bergen tapsyrmasyn iske asyrýǵa baǵyttalǵan. Kórsetilgen qujattar ishki ister organdarynyń derekqorynda bar jáne qajet bolǵan jaǵdaıda polısııa qyzmetkerleri olardyń bar-joǵyn derekqorǵa qosylý arqyly teksere alady.
Májilis Tóraǵasy Nurlan Nyǵmatýlın atap ótkendeı, zań jobasynda júrgizýshi kýáligi jáne kólik quralyn tirkeý týraly qujatty júrgizýshiniń ózimen birge alyp júrýge mindetteıtin normalardy alyp tastaý kózdeldi. Nurlan Nyǵmatýlınniń pikirinshe, qazirgi aqparattyq tehnologııalar keńinen damyǵan sıfrlyq kezeńde júrgizýshilerden tıisti qujattardy talap etý, ol – qajetsiz. Sebebi, polısııa júrgizýshi men onyń kólik quraly týraly barlyq qajetti aqparatty jeke kýálik negizinde elektrondyq málimetter qorynan taba alady.
Aıta ketý kerek, túzetýler sheteldik júrgizýshiler men sheteldik kólik quraldaryna qoldanylmaıdy. Sonymen qatar búgin depýtattar ǵylym máseleleri boıynsha zań jobasyn birinshi oqylymda maquldady. Qujatta ulttyq ǵylymı keńesterge kommersııalandyrý jobalaryn memlekettik bıýdjetten qarjylandyrý bóliginde fýnksııalar berý kózdeledi. Konkýrstyq rásimderdiń ashyq bolýy maqsatynda Ulttyq memlekettik ǵylymı-tehnıkalyq saraptama ortalyǵyna ǵylymı, ǵylymı-tehnıkalyq jobalar men baǵdarlamalardyń, ǵylymı, ǵylymı-tehnıkalyq qyzmet nátıjelerin kommersııalandyrý jobalarynyń saralanǵan tizimin qalyptastyrý jáne ulttyq ǵylymı keńesterge jiberý qarastyrylǵan.
Sondaı-aq ǵylymı, ǵylymı-tehnıkalyq qyzmet nátıjelerin kommersııalandyrýdyń oryndalǵan jobalarynyń nátıjelerin baǵalaý jáne nátıjeliligine monıtorıngti júzege asyrý jónindegi fýnksııalardy berý usynylady.
Budan basqa, ǵylymı, ǵylymı-tehnıkalyq qyzmet nátıjelerin kommersııalandyrýdy granttyq qarjylandyrýǵa arnalǵan konkýrsqa ǵylymı jáne ǵylymı-tehnıkalyq qyzmettiń akkredıttelgen sýbektileri ǵana qatysady dep belgilenedi. Úzdik ǵylymı qyzmetkerlerge «Úzdik ǵylymı qyzmetker» ataǵyn berý jáne 2000 aılyq eseptik kórsetkish mólsherinde grant berý arqyly olardy materıaldyq kótermeleý sharalary kózdelip otyr.
Sonymen qatar búgingi otyrysta «Qazaqstan Respýblıkasynyń keıbir zańnamalyq aktilerine Kaspıı teńizinde qyzmetti júzege asyrýǵa baılanysty máseleler boıynsha ózgerister men tolyqtyrýlar engizý týraly» zań jobasy birinshi oqylymda maquldandy. Zań jobasynyń negizgi maqsaty – Kaspıı teńiziniń quqyqtyq mártebesi týraly konvensııanyń erejelerin elimizdiń birqatar zańnamalyq aktilerine engizý.
Qujatta «balyq aýlaý aımaǵy», «balyq aýlaý aımaǵynyń rejımi» degen uǵymdar engizilgen. Sondaı-aq balyq aýlaý aımaǵynda sý bıologııalyq resýrstaryna kásipshilik júrgizýge Qazaqstan Respýblıkasynyń aıryqsha quqyqtarynyń saqtalýyn baqylaý jónindegi memlekettik organdardyń quzyreti jáne olardyń ózara is-qımyl jasaý tártibi bekitiledi. Konvensııanyń erejelerin eskere otyryp, qoldanystaǵy «aýmaqtyq sýlar eniniń esebi úshin bastapqy syzyq», «aýmaqtyq sýlar», «Qazaqstan Respýblıkasynyń shekaralyq keńistigi» degen uǵymdarǵa ózgerister engizilýde. Májilis birinshi oqylymda «Jer qoınaýy jáne jer qoınaýyn paıdalaný týraly» Qazaqstan Respýblıkasynyń Kodeksine ýran óndirý máseleleri boıynsha ózgerister men tolyqtyrýlar engizý týraly» zań jobasyn maquldady. Zań jobasynda ýran óndirý kezeńin uzartý rásimin jetildirý; jer qoınaýyn paıdalanýshylarǵa ýran óndirý kezeńinde geologııalyq qurylymdardy jáne ýran ken orny qorlaryn naqtylaý maqsatynda óndirý ýchaskesin jete zertteýdi (jete barlaýdy) júrgizý múmkindigin berý qarastyrylǵan.
Sondaı-aq ýran óndirýdiń tájirıbelik-ónerkásiptik jobalaryna qoıylatyn talaptar, ýran óndirý salasyndaǵy jobalaý qujattaryna memlekettik saraptama júrgizý tetigin aıqyndaý kózdelgen.
Zań jobasymen jumys isteý barysynda jumys tobynyń músheleri jobalaý qujattaryna jáne ıgerý taldaýlaryna táýelsiz saraptama uıymdastyrý jáne júrgizý shyǵyndaryn óteýge, ýran ken orny qorlary kóleminiń ósimi bastapqy kólemnen 30 jáne odan da kóp paıyzǵa artqan jaǵdaıda, jer qoınaýyn paıdalanýshynyń óńirdiń áleýmettik-ekonomıkalyq damýyna baǵyttalǵan jobany iske asyrý jónindegi qosymsha mindettemelerine qatysty túzetýler engizdi. Jalpy otyrysta Palata «Notarıat týraly»depýtattyq zań jobany jáne Qazaqstan men Birikken Arab Ámirlikteri Elshilikteriniń qajettilikterine Astana qalasynda jáne Ábý Dabı qalasynda jer ýchaskelerin óteýsiz paıdalanýǵa ózara berý týraly kelisimdi ratıfıkasııalaý týraly zań jobasyn maquldady. Búgingi otyrysta depýtattar ekinshi oqylymda «Maqta salasyn damytý týraly» Qazaqstan Respýblıkasy Zańynyń kúshi joıyldy dep taný jáne Qazaqstan Respýblıkasynyń keıbir zańnamalyq aktilerine ózgerister engizý týraly» jáne veterınarııa máselelerine qatysty zań jobalaryn maquldady.
Sondaı-aq, Májilis búgin memleketaralyq standarttaý jónindegi qujattardy taratý jáne Eýrazııalyq ekonomıkalyq odaq sheńberinde baǵaly metaldarmen jáne asyl tastarmen operasııalardy júzege asyrý erekshelikteri týraly kelisimdi ratıfıkasııalaý týraly zań jobalaryn jumysqa aldy. Otyrys sońynda Májilis depýtattary N.Áshimbetov, Sh.Hahazov, D. Espaeva jáne A. Perýashev memlekettik organdardyń basshylaryna depýtattyq saýaldar joldady.
