"Ortaq kúsh-jigerimizdiń jáne ShQO turǵyndarynyń joǵary jaýapkershiliginiń arqasynda biz COVID-19 ınfeksııasynyń taralý deńgeıin tómendete aldyq.
Búginde aımaqta koronavırýstyń kóbeıý koeffısıenti báseńdedi. Qarashanyń basymen salystyrǵanda reprodýktıvti R sany 1,85-ten 0,84-ke deıin, al tósek qorynyń qamtylý paıyzy 31,1-den 14,5-ke deıin tómendedi. Vırýs juqtyrǵandar sany 7 qarashada 353 adam bolsa, keshe 73 qurady.
Eń bastysy, oblysymyzda koronavırýsty Oqshaýlaý ortalyǵy arqyly vırýstyń juqtyrý tizbegin baqylaý jáne tosqaýyl qoıý júıesi quryldy. 1 qarashadan bastap 584 medepıd toptar ınfeksııanyń 3,5 myń oshaǵynda baılanysta bolǵan 21 618 adammen jumys júrgizdi.
Sondaı-aq, COVID-19 ýaqtyly anyqtap, emdeý úshin qoldanystaǵy 13 PTR-zerthanasyna jergilikti bıýdjet esebinen qosymsha 6 qostyq. Aldaǵy kúnderi taǵy bireýi ashylady. Pandemııa bastalǵannan beri ShQO-da 355 myń test ótkizildi, onyń ishinde tek qarashada 101 095 myń zertteý júrgizildi. Bul el boıynsha joǵary kórsetkishterdiń biri.
Monıtorıngtik toptar da tıimdi jumys atqardy. 1 qarashadan bastap 166 toppen 1906 reıd júrgizildi, 4426 nysan tekserildi, onyń 1055-inde buzýshylyqtar anyqtaldy, 48 mln.teńgege 735 aıyppul salyndy.
Dárigerlerimiz turaqty negizde COVID-19 ınfeksııasyn juqtyrǵan naýqastardy emdeý shemasyn ózektendirý jumysyn júrgizýde. 12 qarashadan bastap naýqastardyń kelisimimen oblystyń aýrýhanalarynda "Favıpıravır" preparaty qoldanylýda. Nátıjesi jaqsy, syrqattan saýyqqan azamattar sany artty. Sonymen qatar, donorlardyń kómegimen jınalǵan 3200 ımmýndyq plazma da belsendi túrde qoldanylyp jatyr.
Osy jáne basqa da sharalardyń arqasynda biz koronavırýstyń «sary aımaǵyna» kirdik. Bul qoldanystaǵy shekteýlerge birqatar jeńildikter engizýge múmkindik beredi. Alaıda indetten ázirge vaksına joq, sondyqtan KVI-den eń senimdi qorǵanys – saqtyq sharalary men áleýmettik qashyqtyq bolyp qala bermek. Bizdiń qazirgi basty mindetimiz - syrqattyń ósýine jol bermeý, emdeý mekemeleriniń tıimdiligin arttyrý jáne halyqtyń densaýlyǵyn saqtaýdy qamtamasyz etý. О́zińiz ben jaqynyńyzǵa qorǵan bolyńyz!", dep jazdy aımaq basshysy Danıal Ahmetov Facebook-paraqshasynda.
