Sondaı 420 turǵynǵa Túrkistan qalasynan jańa páterdiń kiltteri tabystaldy. Eldegi karatındik rejımge jáne oblystyq Bas memlekettik sanıtarııalyq dárigerdiń qaýlysyndaǵy talaptardy oryndaý maqsatynda Túrkistan qalasynda resmı is-shara uıymdastyrylmady. Turǵyndardyń bir jerde shoǵyrlanýyn boldyrmaý úshin, shahar basshysy Rashıd Aıýpov alǵash tórt turǵynǵa kiltterdi qazirgi turyp jatqan úılerine baryp ózi tabystady.
Qazirgi tańda Túrkistan qalasy boıynsha 7, 9 jáne 12 qabatty turǵyn úıdiń qurylysy memlekettik bıýdjet esebinen júrýde. Oblys ortalyǵy atanǵaly qalada 89 kópqabatty turǵyn úıdiń qurylysy júrip jatsa, búginge deıin 600 kezekte turǵan jáne 336 memlekettik qyzmetshige páter tabystalǵan bolatyn. Kezekte turǵan 11797 azamat egov saıty arqyly kezek rettiligin kóre alady. Elbasynyń bastamasymen qolǵa alynǵan Túrkistan qalasynyń qaıta jańǵyrýy jáne jergilikti turǵyndardyń turmys tirshiligin jaqsarta túsý jobasy eskerile, naqty osy kúni páter ıelerin kópten kútken qýanyshqa keneltý josparlanǵan.
Bul kúni Shardara aýdanynyń 40 otbasynda qonys toıy toılandy. Aýdan ákimi Qaırat Joldybaı úı ıelerin qýanyshtarymen quttyqtap, memleket tarapynan qolǵa alynǵan «Nurly jer» baǵdarlamasynyń aıasynda salynǵan turǵyn úı kesheninen jańa páter kiltterin tabystady.
Tórt qabattan turatyn úıdegi páterler turǵyn úı kezeginde turǵan kópbalaly analar men I-II top múgedektigi bar azamattarǵa, ata-anasynyń qamqorlyǵynsyz qalǵan jastarǵa, bıýdjettik mekemede jumys isteıtin qyzmetkerlerge jáne az qamtylǵan otbasylarǵa berildi. Bıyl aýdandaǵy turǵyn úı qurylysynyń jumystary ótken jylmen salystyrǵanda 51 %-ǵa artqan.
