Úı mańynda abyr-sabyr bolǵan turǵyndar órt ishinde páter ıesi – egde adam qalǵanyn aıtyp jatty. Oılanýǵa kesh edi. Ofıser júgirgen boıy besinshi qabatqa shyǵyp, qyp-qyzyl ottyń ishine qoıyp ketti. Abyroı bolǵanda qart adamdy qutqaryp alyp shyqty. Bul oqıǵa antyna adal sardardyń ar buıryǵyn oryndaǵan bir sáti edi.
...2015 jyl, Otan qorǵaýshylar kúni qarsańy. Tuńǵysh Prezıdent, Elbasy Nursultan Ábishuly Nazarbaev birqatar áskerı qyzmetshini áskerı jáne qyzmettik boryshyn úlgili atqarǵany, zańdylyq pen quqyqtyq tártipti qamtamasyz etý kezinde kórsetken erligi men janqııarlyǵy úshin memlekettik nagradalarmen marapattady. Olardyń qatarynda memlekettik «Jaýyngerlik erligi úshin» medalimen marapattalǵan 5546 áskerı bóliminiń áskerı polısııa bólimshesiniń bastyǵy podpolkovnık Salaýat Álimjanuly Qabdyqulov ta bar edi.
Elbasy Salaýatqa memlekettik marapatty tapsyryp turyp: «Shen úshin emes, El úshin qyzmet jasa» degen eken. Osy sóz oraldyq ofıserdiń jadynda árdaıym júredi.
– Qazaqstan Respýblıkasyna qyzmet etemin! – deıdi Qazaqstan Respýblıkasy Ulttyq ulany «Batys» óńirlik qolbasshylyǵynyń 5546 áskerı bólimi janyndaǵy áskerı polısııa bólimshesiniń qyzmetkeri, podpolkovnık Salaýat Qabdyqulov.
Batys Qazaqstan oblysy
