Onda Senat depýtattary "Qazaqstan Respýblıkasynyń keıbir zańnamalyq aktilerine personal berý jónindegi qyzmetterdi kórsetý máseleleri boıynsha ózgerister men tolyqtyrýlar engizý týraly" zańdy eki oqylymda qabyldady. Atalǵan zańǵa Parlament depýtattary bastamashy boldy.
Bul zań aýtsorsıngtik kompanııa jumyskerleriniń eńbek quqyǵyn qamtamasyz etýge, olarǵa óndiris kezinde alǵan jaraqattary men soǵan baılanysty qaıtys bolǵan jaǵdaıda ótemaqy tóleýge jáne áleýmettik saqtandyrý júıesine qatysýǵa múmkindik beredi. Senatorlardyń aıtýynsha, personaldardy berý qyzmetine qatysty quqyqtyq retteýdiń bolmaýyna baılanysty qaryzdyq eńbek jumyskerleriniń quqyqtaryn óreskel buzýǵa jol berilgen. Birdeı laýazymda jumys isteıtin, atqaratyn mindeti, biliktiligi bir deńgeıdegi jumyskerler kompanııanyń shtattyq qyzmetkerlerinen aıtarlyqtaı tómen jalaqy alady.
Olar salalyq kelisim sharttarymen qorǵalmaǵan jáne jumystaǵy zııandy jaǵdaı úshin qosymsha tólemder almaıdy. Ujymdyq kelisimsharttarǵa da qatyspaıdy, soǵan sáıkes eshqandaı áleýmettik qoldaýmen qamtamasyz etilmeıdi. Salanyń qyzmettik túri boıynsha áleýmettik saqtandyrý júıesinde saqtandyrylmaǵandyqtan jumys barysynda alǵan jaraqat pen soǵan baılanysty qaıtys bolǵan kezde de tıisti deńgeıde qorǵalmaıdy.
"Eńbek máselesi qashanda óte mańyzdy. Sondyqtan bul salany zańmen qorǵaý úshin árdaıym naqty qadamdar jasalyp keledi. Sonyń biri – búgin qabyldanyp otyrǵan zań", dedi Máýlen Áshimbaev.
Osyǵan oraı Qazaqstan Respýblıkasynyń Eńbek Kodeksine birqatar ózgerister engizildi. Soǵan baılanysty aýtsorsıngtik kompanııa jumyskerlerine eńbekaqy tóleý kezinde kemsitýshilikke tyıym salynady. Sondaı-aq, qosymsha jyl saıynǵy tólenetin eńbek demalysy, joǵarylatylǵan jalaqy, aýyr, zııandy jáne qaýipti jumysta isteıtin aýtsorsıngtik kompanııa qyzmetkerleri úshin qysqartylǵan jumys ýaqyty qarastyrylǵan. Odan bólek, Azamattyq, Kásipkerlik kodekster men birqatar Zańdarǵa túzetýler engizý kózdelgen.
Sonymen qatar otyrys barysynda senatorlar "Qazaqstan Respýblıkasynyń ákimshilik-aýmaqtyq qurylysy týraly" Qazaqstan Respýblıkasynyń Zańyna ózgerister men tolyqtyrýlar engizý týraly" zań jobasyn qarady.
Bul zań jobasy ákimshilik-aýmaqtyq qurylys salasyna qatysty zańnamalardy jetildirýge arnalǵan. Sondaı-aq, zań jobasy Úkimetke qalalardyń mártebesin aýylǵa ózgertý máselesin qaıta qaraý jóninde usynys engizý úshin ókiletti jáne atqarýshy organdarǵa quziret berý tetikterin qarastyrady.
"Osy qujat Qazaqstannyń ákimshilik-aýmaqtyq qurylysy týraly zańnamany jetildirýge arnalǵan. Aldaǵy ýaqytta bul zań eldi mekenderdi áleýmettik-ekonomıkalyq turǵydan damytýǵa jáne turǵyndardyń ómir súrý sapasyn jaqsartýǵa yqpal etedi dep senemiz", dedi Senat Tóraǵasy.
Senat otyrysynda depýtattar Joǵarǵy Sot sýdıalaryn saılaý jáne qyzmetten bosatý týraly máseleni de qarady. Qazaqstan Respýblıkasy Prezıdentiniń usynýy boıynsha Sáken Abdolla jáne Mádenıet Omarbekova Joǵarǵy Sot sýdıalary bolyp saılandy. Jańadan saılanǵan sýdıalar ant berdi. Memleket basshysynyń usynýyna jáne Konstıtýsııaǵa sáıkes senatorlar Gaharman Dúısenbaevty Joǵarǵy Sot sýdıasy qyzmetinen bosatty.
Otyrys barysynda Premer-Mınıstrdiń atyna úsh depýtattyq saýal joldandy. Aqylbek Kúrishbaev óz saýalynda veterınarııa máselesin kóterse, senator Aıgúl Qapbarova azamattardyń elimizdiń ońtústiginen soltústigine kóshýine qatysty ózekti jaıttarǵa nazar aýdardy. Al, Murat Baqtııaruly Ulttyq aýdarma ortalyǵynyń kitap basý jáne aýdarý jumystary boıynsha sóz qozǵady.
