Parlament • 03 Jeltoqsan, 2020

Parlament Eńbek zańnamasyna túzetýler engizdi

14 ret kórsetildi

Qazaqstan Parlamenti personal usynýǵa qatysty qyzmet kórsetý boıynsha keıbir zańnama aktilerin ekinshi oqylymda maquldady, dep habarlaıdy Egemen.kz

Baıandama oqyǵan senator Sergeı Ershov quqyqtyq retteýdiń joǵynan jaldanyp jasaıtyn jumysshylardyń quqyǵy óreskel buzylǵan jaǵdaılar týraly aıtty. 

Onyń málimetinshe, shtattaǵy qyzmetkerlermen birdeı qyzmet atqaratyn jumysshylar jumystyń kúrdeligi, mólsheri men sapasy, sonymen qatar bilik deńgeıi birdeı bolsa da az jalaqy alady.
 
"Olar salalyq kelisimder sharttarymen qorǵalmaǵan, eńbek jaǵdaıyndaǵy zalal úshin ústemeaqy almaıdy, ujymdyq kelisimshart qatysýshysy emes, sáıkesinshe, eshqandaı da áleýmettik paketi joq. Jaraqat alǵan jaǵdaıda, tipti qaza bolǵanda qajetti túrde qorǵalmaıdy, sebebi qyzmet salasyndaǵy áleýmettik saqtandyrý júıesinde saqtanbaıdy", deıdi senator.

Onyń aıtýynsha, depýtattar árkimniń de qaýipsizdik pen gıgıena talaptary saqtalatyn eńbek sharttaryn alýǵa quqyǵy bar bolǵandyqtan jáne qandaı da bir dıskrımınasııasyz syıaqy alýǵa quqyǵy bar bolǵandyqtan, osyndaı zań jobasyn kóterip otyr.

"Osy joba aıasyndaǵy zańnamalyq bastamalar jumyspen qamtýdyń ıkemdi nysandaryn engizý, olardy normatıvtik retteý, eńbek mobıldigin arttyrý úshin qosymsha pármendi tetikterdi ázirleý týraly kóptegen máseleni sheshedi. Zań jobasynda Azamattyq, Eńbek jáne Kásipkerlik kodeksterge jáne "Halyqty jumyspen qamtý týraly", "Qyzmetker eńbek (qyzmettik) mindetterin atqarǵan kezde ony jazataıym oqıǵalardan mindetti saqtandyrý týraly" eki zańǵa ózgerister men tolyqtyrýlar engizý kózdelgen", dep habarlady senator.

Azamattyq kodekske ótelmeli qyzmet kórsetý shartynyń jańa túri - personaldy usyný boıynsha qyzmet kórsetýge arnalǵan shart engiziledi, oǵan sáıkes bir tarap (jiberýshi) óz qyzmetkerin ekinshi taraptyń (qabyldaýshy) múddesinde, basqarýymen jáne baqylaýymen jumysty oryndaý úshin jiberedi.

Eńbek kodeksine myna túzetýler engizilip otyr:

  • jiberýshi taraptyń qyzmetkerlerine qatysty eńbekaqy tóleý salasynda kemsitýge tyıym salynady;
  • qoldanystaǵy zańnamaǵa sáıkes aýyr jumystarda, eńbek jaǵdaılary zııan jáne (nemese) qaýipti jumystarda isteıtin jiberýshi taraptyń qyzmetkerleri úshin jyl saıynǵy aqy tólenetin qosymsha eńbek demalystary kózdeledi;
  • eńbegi aýyr jumystarda, eńbek jaǵdaılary zııan jáne (nemese) qaýipti jumystarda júzege asyrylatyn jiberýshi taraptyń qyzmetkerlerine joǵary laýazymdyq aılyqaqylar nemese qosymsha aqylar belgilenedi;
  • eńbegi aýyr jumystarda, eńbek jaǵdaılary zııan jáne (nemese) qaýipti jumystarda júzege asyrylatyn jiberýshi taraptyń qyzmetkerlerine jumys ýaqytynyń qysqartylǵan uzaqtyǵy kózdeledi.

Sonymen qatar, depýtattar óndiristik nysandardy eńbek jaǵdaılary boıynsha attestattaý nátıjeleri berilmegen jaǵdaıda jiberýshi tarapqa qabyldaýshy tarappen personaldy usyný boıynsha qyzmetter kórsetýge sharttar jasasýǵa tyıym salýdy usyndy.

Zańda jumys berýshiniń jiberýshi taraptyń qyzmetkerleri alkogoldik, esirtkilik, ýytqumarlyq masań kúıde bolǵan jaǵdaıda olardy jumystan shettetý mindeti bekitilgen. Sonymen qatar, jiberýshi tarap qyzmetkeriniń qabyldaýshy taraptyń aktilerine sáıkes profılaktıkalyq medısınalyq tekserýden ótý mindeti de bekitilgen.

Eńbek kodeksi "jiberýshi tarap", "jiberýshi tarap qyzmetkerleri", "qabyldaýshy tarap", "qabyldaýshy tarap aktileri" jáne "personaldy berý" sııaqty jańa anyqtamalarmen tolyqtyrylady.

Kásipkerlik kodekske jiberýshi tarap jumyskerleriniń eńbegin paıdalanatyn kásipkerlik sýbektileri jumyskerleriniń jyldyq ortasha sany jiberýshi taraptyń jumyskerleri eskerile otyryp aıqyndalatyn norma engiziledi.

Sondaı-aq, jumys berýshi ruqsattar boıynsha tartatyn sheteldik jumys kúshiniń sany personaldy berý jónindegi shart aıasynda eńbek qyzmetin júzege asyratyn qyzmetkerlerdi eskere otyryp, qazaqstandyq kadrlardyń sanymen paıyzdyq araqatynasqa sáıkes kelýi tıis bolýyn kózdeledi.

Aýtstaffıng – bul qyzmetkerlerdi kompanııa shtatyna shyǵarý. Aýtstaffıng kezinde personal naqty jumys berýshi bolyp otyrǵan fırmamen emes, deldal uıymmen nemese aýtstaffermen eńbek sharttaryn jasasady.

Zań el Prezıdentine qol qoıýǵa jiberiledi.

Sońǵy jańalyqtar

Kann festıvali jazǵa shegerildi

О́ner • Búgin, 16:42

Prezıdent Alık Shpekbaevty qabyldady

Prezıdent • Búgin, 16:02

TikTok jelisinde olqylyqtar tabyldy

Tehnologııa • Búgin, 10:29

Uqsas jańalyqtar