Qazaqstanda áleýmettik qyzmet kórsetý júıesi jańǵyrtylady

Qoǵam • 03 Jeltoqsan, 2020

Qazaqstanda áleýmettik qyzmet kórsetý júıesi jańǵyrtylady

28 ret kórsetildi

Eńbek jáne halyqty áleýmettik qorǵaý mınıstrliginde Áleýmettik jumystyń basym baǵyttary máseleleri jónindegi vedomstvoaralyq keńestiń otyrysy ótti. Keńeste Eńbekmıniniń ókilderi beınekonferensbaılanys rejıminde QR-da áleýmettik qyzmet kórsetýdi odan ári jańǵyrtýdyń 2025 jylǵa deıingi ulttyq josparynyń jobasyn, arnaýly áleýmettik qyzmetter salasyn jan basyna normatıvtik qarjylandyrýǵa kóshý tásilderin, Áleýmettik qamsyzdandyrý kodeksiniń «Áleýmettik qyzmetkerlerdiń oń mártebesi» bólimin jurtshylyqqa tanystyrdy, dep habarlaıdy Egemen.kz.

Marzhan Tileubekova

Is-shara QR Eńbek jáne halyqty áleýmettik qorǵaý vıse-mınıstri Erlan Áýkenovtiń tóraǵalyǵymen QR Bala quqyqtary jónindegi ýákil Arýjan Saın, jergilikti atqarýshy organdar, elimizdiń medısınalyq-áleýmettik mekemeleri, Áleýmettik jumystyń basym baǵyttary máseleleri jónindegi vedomstvoaralyq keńes, ekonomıkalyq jáne sapaly jumyspen qamtý, áleýmettik ońaltý, áleýmettik qyzmetter júıesin jetildirý máseleleri jónindegi úılestirý keńesi men jumys toby ókilderiniń qatysýymen ótti.

Onlaın-konferensııa barysynda Arýjan Saın qazir úlken júıeli ózgerister bolyp jatqanyn, olardyń ulttyq josparda kórinis tapqan atap ótti.

«Biz balalardyń múgedektigin azaıtý jónindegi jol kartasyn – skrınıngtik dıagnostıka satysynda qajetti medısınalyq jáne túzetý-pedagogıkalyq kómek alý úshin QR-da múmkindikteri shekteýli balalarǵa keshendi kómek kórsetýdi jetildirý jónindegi 2021-2023 jyldarǵa arnalǵan jol kartasyn qabyldadyq. Bul balalardyń tólemderge, tehnıkalyq ońaltý quraldaryna jáne áleýmettik qyzmetterge muqtaj bolýyn tómendetýge yqpal etýge tıis. Jol kartasy 3 jylǵa eseptelgen, ony kelesi jyldan iske asyra bastaımyz. Biz barlyq múddeli organdardyń qoldaýyna úmittenemiz, óıtkeni bul bizdiń ortaq isimiz. Sheshilýi qajet mańyzdy mindetterdiń biri - Áleýmettik sala qyzmetkerleriniń mártebesi men jaǵdaıy. Eger siz kásibı kadrlardy tartpasańyz, adamdardy óz jumysyna adal bolýǵa yntalandyrmasańyz, júıede birdeńeni ózgertý qıynǵa soǵady. Sondyqtan men áleýmettik qyzmetkerlerdiń jalaqysyn kóterýdi tolyqtaı quptaımyn jáne munyń múmkindiginshe tezirek bolǵanyn qalaımyn», – dep atap ótti Arýjan Saın.

Sondaı-aq, keńes barysynda Ulttyq jospar jobasynyń tanystyrylymymen Eńbekmıni Áleýmettik qyzmetter saıasatyn damytý departamentiniń dırektory Dámejan Sádýaqasova sóz sóıledi.

«Memleket basshysynyń ótken jylǵy 2 qyrkúıektegi «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýyn oryndaý aıasynda «Otbasy jáne bala ınstıtýtyn qoldaý, ınklıýzıvti qoǵam qurý» baǵyty belgilengenin atap ótkim keledi. Osy jumys sheńberinde bizde Áleýmettik jumys máseleleri jónindegi vedomstvoaralyq keńes jumys isteıdi, Áleýmettik jumys jónindegi ulttyq resýrstyq ortalyq quryldy, Áleýmettik qyzmetter portaly engizildi jáne barlyq óńirlerde otbasyn qoldaý ortalyqtary quryldy», – dedi spıker.

Jan basyna shaqqandaǵy normatıvtik qarjylandyrýǵa kóshýge qatysty Dámejan Sádýaqasova mundaı model balabaqshalarda, mektepterde, emhanalarda jáne t. b. iske asyrylǵandaı «aqsha klıenttiń sońynan eredi» qaǵıdatyn iske asyrýǵa múmkindik beretinin aıtty.

Onyń aıtýynsha, nátıjesinde elimizdiń medısınalyq-áleýmettik mekemelerinde básekelestik paıda bolady, sodan áleýmettik qyzmetterdiń jańa túrleri engiziledi. Budan basqa, mundaı tásil qolda bar materıaldyq-tehnıkalyq, kadrlyq jáne qarjylyq resýrstardy ońtaılandyrýǵa jáne áleýmettik qyzmetterdi alýshylardyń, ónim berýshiler men memlekettiń múddelerin biriktirýge múmkindik beredi.

Sonymen qatar, Áleýmettik qamsyzdandyrý kodeksiniń «Áleýmettik qyzmetkerlerdiń oń mártebesi» taraýynyń tanystyrylymymen Eńbekmıni Áleýmettik kómek saıasatyn damytý departamentiniń dırektory Asqar Nııazov sóz sóıledi. Ol áleýmettik qyzmetker mártebesin arttyrý úshin mynadaı sharalar qabyldanatynyn atap ótti: «áleýmettik qyzmetker» uǵymy aıqyndalyp, mártebesi zańnamalyq túrde bekitiletin, tirkeý jáne attestattaý arqyly áleýmettik qyzmetkerlerdi esepke alý jolǵa qoıylatyn, biliktilik sanattaryn berýge qoıylatyn talaptar arttyrylatyn, kadrlardy daıarlaý jáne úzdiksiz bilim berý deńgeıi jetildiriletin bolady.

Aıta keteıik, qazirgi ýaqytta elimizde áleýmettik qyzmetkerler testileýden ótýde. Aǵymdaǵy jyldyń 5 jeltoqsanyna deıin shamamen 12 myń adamdy synaqtan ótkizý josparlanýda. Testileý áleýmettik qyzmetkerlerdiń bazalyq bilim deńgeıin anyqtaý úshin ótkiziledi, sodan keıin olardy oqytý júrgiziledi. Bul Qazaqstan Respýblıkasynda áleýmettik qyzmet kórsetýdi odan ári jańǵyrtýdyń 2025 jylǵa deıingi ulttyq josparynyń jobasynda qarastyrylǵan.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz