Keńeste vedomstvo ókilderi beınekonferensbaılanys rejiminde elimizde áleýmettik qyzmet kórsetýdi odan ári jańǵyrtýdyń 2025 jylǵa deıingi ulttyq josparynyń jobasyn, arnaýly áleýmettik qyzmetter salasyn jan basyna normatıvtik qarjylandyrýǵa kóshý tásilderin, Áleýmettik qamsyzdandyrý kodeksiniń «Áleýmettik qyzmetkerlerdiń oń mártebesi» bólimin jurtshylyqqa tanystyrdy.
Is-shara Eńbek jáne halyqty áleýmettik qorǵaý vıse-mınıstri Erlan Áýkenovtiń tóraǵalyǵymen jáne Bala quqyqtary jónindegi ýákil Arýjan Saın, jergilikti atqarýshy organdar, elimizdiń medısınalyq-áleýmettik mekemeleri, Áleýmettik jumystyń basym baǵyttary máseleleri jónindegi vedomstvoaralyq keńes, ekonomıkalyq jáne sapaly jumyspen qamtý, áleýmettik ońaltý, áleýmettik qyzmetter júıesin jetildirý máseleleri jónindegi úılestirý keńesi men jumys toby ókilderiniń qatysýymen ótti.
Onlaın-konferensııa barysynda A.Saın qazir aýqymdy júıeli ózgerister bolyp jatqanyn, olardyń ulttyq josparda kórinis tapqan atap ótti. «Biz balalardyń múgedektigin azaıtý jónindegi jol kartasyn – skrınıngtik dıagnostıka satysynda qajetti medısınalyq jáne túzetý-pedagogıkalyq kómek alý úshin Qazaqstanda múmkindigi shekteýli balalarǵa keshendi kómek kórsetýdi jetildirý jónindegi 2021-2023 jyldarǵa arnalǵan jol kartasyn qabyldadyq. Bul balalardyń tólemderge, tehnıkalyq ońaltý quraldaryna jáne áleýmettik qyzmetterge muqtaj bolýyn tómendetýge yqpal etýge tıis. Jol kartasy 3 jylǵa eseptelgen, ony kelesi jyldan iske asyra bastaımyz. Barlyq múddeli organnyń qoldaýyna úmit artamyz, óıtkeni bul – bizdiń ortaq isimiz. Sheshilýi qajet mańyzdy mindetterdiń biri – áleýmettik sala qyzmetkerleriniń mártebesi men jaǵdaıy. Eger siz kásibı kadrlardy tartpasańyz, adamdardy óz jumysyna adal bolýǵa yntalandyrmasańyz, júıede birdeńeni ózgertý qıynǵa soǵady. Sondyqtan áleýmettik qyzmetkerlerdiń jalaqysyn kóterýdi tolyqtaı quptaımyn jáne munyń múmkindiginshe tezirek bolǵanyn qalaımyn», dedi A.Saın.
Sondaı-aq keńes barysynda Ulttyq jospar jobasynyń tanystyrylymy boıynsha atalǵan mınıstrliktiń Áleýmettik qyzmetter saıasatyn damytý departamentiniń dırektory Dámejan Sádýaqasova sóz sóıledi. «Memleket basshysynyń byltyrǵy 2 qyrkúıektegi «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýyn oryndaý aıasynda «Otbasy jáne bala ınstıtýtyn qoldaý, ınklıýzıvti qoǵam qurý» baǵyty belgilengenin atap ótkim keledi. Osy jumys sheńberinde bizde Áleýmettik jumys máseleleri jónindegi vedomstvoaralyq keńes jumys isteıdi, Áleýmettik jumys jónindegi ulttyq resýrstyq ortalyq quryldy, Áleýmettik qyzmetter portaly engizildi jáne barlyq óńirde otbasyn qoldaý ortalyqtary quryldy», dedi spıker. Jan basyna shaqqandaǵy normatıvtik qarjylandyrýǵa kóshýge qatysty D.Sádýaqasova mundaı model balabaqshalarda, mektepterde, emhanalarda jáne t.b. iske asyrylǵandaı «aqsha klıenttiń sońynan eredi» qaǵıdatyn iske asyrýǵa múmkindik beretinin aıtty.
Sonymen qatar Áleýmettik qamsyzdandyrý kodeksiniń «Áleýmettik qyzmetkerlerdiń oń mártebesi» taraýyn tanystyrǵan vedomstvonyń Áleýmettik kómek saıasatyn damytý departamentiniń dırektory Asqar Nııazov áleýmettik qyzmetker mártebesin arttyrý úshin birqatar shara qabyldanatynyn jetkizdi. Atap aıtqanda, «áleýmettik qyzmetker» uǵymy aıqyndalyp, mártebesi zańnamalyq túrde bekitiledi, tirkeý jáne attestattaý arqyly áleýmettik qyzmetkerlerdi esepke alý jolǵa qoıylady, biliktilik sanattaryn berýge qoıylatyn talaptar artady, kadrlardy daıarlaý jáne úzdiksiz bilim berý deńgeıi jetildiriledi.
Qazirgi ýaqytta elimizde áleýmettik qyzmetkerler testileýden ótip jatyr. Bıyl 5 jeltoqsanǵa deıin shamamen 12 myń adamdy synaqtan ótkizý josparlanýda. Testileý áleýmettik qyzmetkerlerdiń bazalyq bilim deńgeıin anyqtaý úshin ótkiziledi, sodan keıin olardy oqytý júrgiziledi. Bul Qazaqstanda áleýmettik qyzmet kórsetýdi odan ári jańǵyrtýdyń 2025 jylǵa deıingi ulttyq josparynyń jobasynda qarastyrylǵan.
