Sırııa astanasynan soltústikke qaraı 55 shaqyrym jerdegi Maalıýle aýlynda qarýlanǵan ekstremıster monastyrge shabýyl jasap, bir top monahınıany tutqynǵa alyp ketken. Bul týraly ITAR-TASS habarlady.
Vatıkan elshisiniń aqpary boıynsha, sodyrlardyń qolynda kem degende 12 monahınıa bar. Qazir bul oqıǵaǵa arab jáne álem BAQ ókilderi nazar aýdarýda. Jergilikti telearnalar málimdegendeı, «Al-Kaıda» qozǵalysymen baılanysy bar ekstremıster monastyrge basyp kirip, onyń kúl-talqanyn shyǵarǵan. Sondaı-aq olar taǵy birneshe shirkeýdi tonap, artynan qıratyp ketken. Sodyrlar jergilikti halyqty qorqytý maqsatynda turǵyn úılerge oq jaýdyrǵan kórinedi.
Senbi kúni bul aýdanda Sırııa áskeri sodyrlarmen qaqtyǵysqa túsken bolatyn. Sırııa áskerı basqarmasynyń deregi boıynsha, kómekke kelgen áskerılerdiń arqasynda sodyrlar qaladan yǵystyrylyp shyǵarylǵan.
Dúısenbi kúni Nabak qalasynan qashyp kele jatqan sodyrlar Maalıýlıý aýlyna shabýyl jasady. Sırııa áskerindegi aqparat kóziniń aıtýy boıynsha, Nabak qalasy sodyrlardan tolyq tazartyldy. «Al Maalıýle aýly ekstremıstik qurylym múshelerinen birneshe saǵatta bosatylady. Ol jerge ásker jiberildi», – dedi ol.
Aıdar О́risbaev.
Derekkóz: Itar-tass.com
