Aımaqtar • 04 Jeltoqsan, 2020

Soltústikte memlekettik qyzmet kórsetýdiń paıdasy artyp otyr

47 ret kórsetildi

"Memlekettik qyzmet kórsetýdiń sapasy jaqsaryp keledi" degen sózdi jıi estigenimizben, onyń damyǵan shetelderdiń deńgeıine jetýi áli de kesheýildep jatqanyn ómirde kózimizben kórip júrmiz. Memleket Basshysy Qasym-Jomart Toqaev óziniń 1 qyrkúıektegi Joldaýynda "Azamattar múddesine qyzmet etetin memlekettiń jańa standarttaryn ázirleý úshin kóp jumys atqarýymyz kerek", degen edi. Sonymen qatar elektrondy qyzmet kórsetý barysynda halyqqa jeńildik jasaý úshin bıometrııanyń qoldanylýyn arttyrý da aıtylǵan, dep habarlaıdy Egemen.kz

Osyǵan baılanysty burynǵysha HQKO nemese ákimdikke baryp qana sheshiletin qyzmettiń qazir qoldanylatyn otandyq IT tehnologııanyń kómegimen damýy aımaqta qandaı deńgeıde ekenin surap Memlekettik qyzmet agenttiginiń oblystaǵy departamentiniń basshysy Elena Stepanenko men oblystaǵy Kásipkerler palatasy tóraǵasynyń orynbasary Jeńis Qazıevke qaırylǵan edik.

"Halyq bizden kórsetiletin qyzmettiń jedel, sapaly jáne nátıjeli bolýyn kútedi", dep bastady óziniń sózin E.Stepanenko.

Búgingi tańda biz halyqqa kórsetiletin 698 qyzmettiń 93 paıyzyn elektrondy formatta jasaı alamyz. Sonymen birge qyzmetterge monıtorıngter jasaý barysynda memorgandarǵa qosymsha usynystar da jasap otyramyz. Tek bıyl ǵana biz memlekettik organdarǵa qyzmet kórsetý boıynsha 157 usynys túsirdik. Qazir Egovmobile qosymshasyndaǵy 73 túrli asa qajetti qyzmetterdi alýǵa bolady. Qyzmet kórsetý týraly ótinishti Facebook, VKontakte, Telegram sekildi áleýmettik jeliler arqyly da jiberýge bolady. Egovmobile mobıldi qosymshasynda jeke kýáliktiń, júrgizýshilik kýáliktiń, týý týraly kýáliktiń jáne t.b. sıfrly qujattary bar. Búgingi tańda soltústikqazaqstandyqtar

barlyq memlekettik qyzmettiń 92,5% elektrondy format túrinde alyp otyr. Halyqtyń qyzmetti osylaı alýǵa degen yntasy zor.

Odan ári E.Stepanenko "Elektrondy úkimet" portalyn qalaı qoldanýdy túsindiretin nusqama ázirlenip, ol áleýmettik jelilerge salynǵanyn aıtty.

"Sonymen birge Instagram-da "e-gov boıynsha memlekettik qyzmetti qalaı alýǵa bolady" degen paraqsha da ashtyq. Oǵan aqparattyq materıaldar salyndy. Nusqamalardy PIK-ter jáne volonterler arqyly da taratýdamyz. Sondaı-aq tutynýshylardyń kommýnaldyq qyzmetter jónindegi jeke kabınetterine de qoıdyq", dep sózin jalǵady departament basshysy.

Memlekettik qyzmetterdi kórsetýdiń sapasy qalaı tekseriledi degen suraǵymyzǵa E.Stepanenko hanym syrtqy jáne ishki memlekettik baqylaý júıesi jumys isteıtinin aıtty. Departament syrtqy baqylaý men qyzmet kórsetýshilerdiń jumysyn saraptaýdy júıeli túrde júrgizip otyrady. Bıylǵy baqylaýlar barysynda birneshe buzýshylyqtar anyqtaldy. Olar negizinen qujattardy alýdyń memlekettik standarttarǵa sáıkes emestigi boldy. Sonymen qatar qyzmet kórsetýdiń merzimi saqtalmaıtyndyǵy da kóp kezdesti. Eger salalar boıynsha qarastyrsaq mundaı buzýshylyqtar kóbinese eńbek jáne halyqty áleýmettik qorǵaý, jer qatynastary, arhıtektýralyq-qala qurylysy isterinde kóp kezdesti. Buzýshylyqtardyń 99,4% jergilikti atqarýshy organdar tarapynan bolǵan. Keıbir memlekettik organdardyń basshylary óz qyzmetkerleriniń halyqtan talap etiletin aqparattyq júıeniń qandaı bolýy kerektigin bilmeıtinine nazar aýdarmaıdy. Biz keıbir mamandardyń halyqtan talap etilýge tıisti emes jeke kýálikteriniń, týý týraly kýálikteriniń kóshirmesin talap etkenin kórdik. Keıde tipti kúlkili jaǵdaılarǵa da jol berilip qalady. Mysaly, bir qyzmetker balıǵatqa tolmaǵan sábıge memlekettik qyzmet kórsetken. Mundaı qyzmetter onyń zańdy ókilderi, ıaǵnı ne ákesine, ne anasyna kórsetilýi kerek-ti... Taǵy birde bir jer qurylysy kompanııasynyń qyzmetkeri jerdiń qanshalyqty bos ekendigin rýletkamen anyqtaǵan. Nátıjesinde, bir jer ýchaskesi eki adamǵa berilip shyǵa kelgen.

Sóziniń qorytyndysynda Elena Fedorovna departamenttiń azamattardyń quqyn qorǵaý jolynda eńbek etetinin aıtty. Túrli buzýshylyqtar qyzmet kórsetýshilerdiń jumysyna tıimdi baqylaý bolmaǵandyqtan bolady. О́z tarapymyzdan biz jiberilgen buzýshylyqtardy qalaı túzetýge bolatyndyǵy týraly túsindirme jumystaryn júrgizemiz. Sonymen birge memlekettik qyzmet kórsetýshilerdiń tártip buzǵandyǵy nemese qyzmettiń merzimin buzǵandyǵy úshin jaýapkershilik te júkteledi. Máselen, bıyl 326 myń teńgeniń aıyppuly salynyp, 10 ákimshilik hattamalar toltyryldy. Sonymen birge memlekettik organdar óz ishterinde de baqylaýlar júrgiziledi. Departament qyzmetkerleri osyndaı 46 baqylaýǵa sarapshy retinde qatysty. Osyndaı baqylaýlar men túsindirme jumystarynyń artqandyǵynyń arqasynda buzýshylyqtar sany 2 esege deıin azaıdy. Sóıtip biz memlekettik organdarmen birlese otyryp "Halyq únine qulaq asatyn memleket" tujyrymdamasyn jergilikti jerde júzege asyrýdamyz.

Memlekettik qyzmet departamentimen Kásipkerler palatasy arasyndaǵy ózara yntymaqtastyq týraly aıtýdy Jeńis Qazıevten ótingenimizde ol óziniń eki vedomstvo arasyndaǵy yntymaqtastyq jónindegi jumys tobynyń tóraǵasy ekenin aıtty.

"Jumys tobynyń quramynda kásipkerler, qoǵamdyq uıymdardyń ókilderi bar. Bizdiń tobymyzdyń usynysy boıynsha memlekettik organdar jumystyń jańa formatyna kóshýde. Máselen, barlyq aýdandar men oblys ortalyqtarynda "Ashyq ákimdikter" ashylǵan. Olardyń bári birlesken 109 iKomekke qsylǵan. Qazirdiń ózinde munda "Agro Kómek" atty qyzmet kórsetý jumys isteıdi. Onda aýylsharýashylyǵy mamandary, veterınarlyq baqylaý qyzmetkerleri jáne t.b. azamattarǵa konsýltatıvtik keńester bere alady. Osynyń arqasynda ústimizdegi jyldyń 9 aıynda aýylsharýashylyǵyna beriletin sýbsıdııalar 48,5 mlrd. teńgege deıin artty. Oblystaǵy 165 sharýashylyq egisteriniń elektrondy kartalaryn jasady, GPS trekerler men JJM datchıkterin ornatýǵa qol jetkizdi. Búgingi tańda barlyq egis dalasy 100% sıfrlandyryldy. Al bul 4,9 mln ga degen sóz. Osynyń ózi memlekettiń bıznesti barynsha qorǵap otyrǵanyn kórsetpeı me? Buryn sharýa bir qujat alý úshin jumysyn toqtatyp qoıyp memorgandardyń esigin qaǵyp júretin edi, qazir ondaıdyń biri de joq. Maǵan memlekettik organdardyń klıentterine oń qaraıtyndyǵy unaıdy. Jaqyn bolashaqta biz memlekettik qyzmetter alý boıynsha Sıngapýr men Kanadanyń deńgeıine jetermiz degen úmittemin", dedi Kásipkerler palatasy tóraǵasynyń orynbasary Jeńis Qazıev.

Sońǵy jańalyqtar

Aqtaýda býynsyz bala turady

Vıdeo • Búgin, 16:04

iPhone 12 densaýlyqqa zııan dep tanyldy

Tehnologııa • Búgin, 15:38

Jańa Lada Niva kóligi qurastyrylýy múmkin

Tehnologııa • Búgin, 15:26

Semeıde eki avtobýs jol apatyna tústi

Aımaqtar • Búgin, 15:18

Qudyqqa qulaǵan qunandy qutqaryp qaldy

Aımaqtar • Búgin, 13:38

Arysta joǵalǵan bir úıir jylqy tabyldy

Aımaqtar • Búgin, 13:25

Dollar qymbattady

Ekonomıka • Búgin, 11:35

Qazaqstanda elektr energııasy qymbattady

Qazaqstan • Búgin, 10:21

Uqsas jańalyqtar