Polısııanyń málimetine qaraǵanda jyl basyna beri oblysta alty myńǵa jýyq júrgizýshi ruqsat etilgen jyldamdyqtan asyryp júrgen. Aýyldarda uzaq turyp qalaǵa jańa kelgender, júrgizýshi kýáligin aqshaǵa satyp alǵandar shahardyń aýmaǵynda alpys shaqyrymdyq jyldamdyqtan asyrýǵa bolmaıtynyn da bilmeıtin bolsa kerek.
Jalpy, ústimizdegi jyldyń 11 aıynda oblys joldarynda jol tártibin
buzýdyń 49 847 faktisi tirkelgen. Barlyq turǵyndarynyń sany 600 myńǵa jetpeıtin, onyń ishinde 18 ben 70 arasyndaǵy júrgizýshiler sany kóp bolsa eki júz myńdaı bolatyn oblys úshin bul óte úlken san. Buǵan qaraǵanda árbir tórtinshi júrgizýshi jol erejesin buzǵan deýge bolady. Árbir jol erejesin buzýshylyq adam ómirine qaýip tóndiretinin júrgizýshiler bilse kerek edi.
Osy ýaqyt aralyǵynda kólikke mas bolyp otyrǵan 986 júrgizýshi ustalǵan. Al 75 júrgizýshi qarsy baǵytqa shyǵyp ketip, óreskel buzýshylyqqa jol bergen.
Jyldamdyqty asyrý jáne manevr jasaý qaǵıdalaryn saqtamaý jol-kólik oqıǵalarynyń jasalýyna jıi sebep bolady. Júrgizýshiniń nazaryn jol qaýipsizdiginen basqa jaqqa aýdaryp, qyraǵylyǵyn tómendetetin qylyqtardyń qatarynda rólde kele jatyp telefonmen sóılesý jıi bolyp turady. Atalmysh ýaqytta osyndaı 2352 fakti tirkelgen. 5089 kólik júrgizýshisi qaýipsizdik beldigin taqpaýǵa jol bergen, mundaı jaǵdaıda JKO kezinde zardaptyń aýyrlyǵyn arttyratyny belgili. «Qys kezinde apat táýekeli arta túsedi, buǵan kóktaıǵaq, joldy kómip qalatyn syrǵyma men qatty boran. Osylardyń kesirinen kórý aımaǵy shekteledi. Kóktaıǵaq kezinde eń basty ereje — jyldamdyq rejimin saqtaý jáne araqashyqtyqty ustap otyrý. Sonymen qatar jaıaý júrginshiler jolaǵyna jaqyndaǵan kezde jyldamdyqty azaıtý asa mańyzdy», - deıdi SQO PD bastyǵynyń birinshi orynbasary polısııa polkovnıgi Qanat Aıtbaev.
Qazir osy qyzmettiń polısııa qyzmetkerleri birqatar jedel-profılaktıkalyq is-sharalar ótkizip, jol qozǵalysy qaýipsizdigin saqtaýǵa jáne apatty azaıtýǵa yqpal etýde. Sonymen qatar munda polıseıler júrgizýshilerge qysta jolǵa shyǵar aldynda tross, kiltter jınaǵy, qosalqy dońǵalaq, sorap jáne basqa da qajetti qural-jabdyqtardy alyp júrýge keńes beredi.
Oblystaǵy JKO kóbeıýine úlken sebep bolyp otyrǵan jaıt- júrgizýshiniń masań kúıinde rólge otyrýy bolyp tabylady. Jyl basynan beri oblysta buryn kólik júrgizý quqynan sot sheshimimen aırylǵan 37 júrgizýshi masań kúıinde qaıtadan rólge otyrǵan jerinde ustaldy. Máselen, Aqjar aýdanynyń bir turǵyny bıylǵy aqpan aıynda kólikke mas bolyp otyrǵany úshin 15 táýlikke qamalyp, 7 jylǵa júrgizýshilik kýáliginen aırylǵan bolatyn. Kýáliginiń joq ekenine ol pysqyryp ta qaramaı, osy jyldyń shilde aıynda óz kóligin masań bolyp júrgizip kele jatyp, Gorkovskıı selosynyń túbinde baǵandy soǵyp, taǵy ustaldy. Qarasha aıynyń aıaǵynda bolǵan sot sheshimimen endi ol júrgizýshilik quqynan ǵana emes bas bostandyǵynan da bir jylǵa aıryldy. Osyndaılarǵa keregi sol sııaqty. Eń qıyny endi bir jyl boıy onyń otbasy, bala-shaǵasy da asyraýshysynan aırylyp, qıyn jaǵdaıda qaldy.
Ústimizdegi jylǵy 11 qańtarda zańnamaǵa ózgerister men tolyqtyrýlar engizilip, kólikti masań kúıinde júrgizetinderge belgilengen jaza qatańdatyldy. Oǵan sáıkes mas bolyp ekinshi ret ustalǵandar júrgizýshilik quqynan ómir boıy aırylady. Alaıda kóligi qorasynda turǵan keıbir júrgizýshiler oǵan qaramaı, kóliginen túspeıdi. Ásirese, aýyl jerdiń turǵyndary sóıtedi. Sondyqtan zańnama júrgizý quqynan aırylǵan adamdy kóligin birden satýyn da mindetteýi kerek edi. Mundaı jaza kýálikten aıyrǵannan góri áldeqaıda áserli bolar edi... Aldaǵy ýaqytta sondaı da jaza shyǵatyn shyǵar degen úmit bar. Sonda jol apaty da azaıyp, adam ómirine keletin qaýipter de kemıtin edi.
