«Búgingi kıber oqý-jattyǵýlarynda biz fýnksıonaldyń bar ekenine, onyń jumys isteıtinine taǵy da kóz jetkizdik, ózimiz úshin problemalyq máselelerdi anyqtadyq. Osy problemalyq máselelerdi sheshýmen aınalysatyn bolamyz, eger aıaq astynan ony qoldaný qajet bolsa, onda azamattarymyzǵa qolaısyzdyq týǵyzbaı barynsha qoldaný úshin», - dedi vedomstvo basshysy.
Nege jetekshi sheteldik platformalar qazaqstandyq qaýipsizdik sertıfıkatyn qosýdan bas tartty? Júıe trafıkti paıdalanady, parolderdi saqtaıdy jáne derekterdi kópshilikke taratý qaýpi bar ma? Ortalyq kommýnıkasııalar qyzmetinde ótken brıfıngte jýrnalıst óz otandastarynyń alańdaýshylyǵyn jetkizdi. Spıker sertıfıkattyń qaýipsiz ekendigine sendirdi. Ol barlyq tehnıkalyq standarttarǵa sáıkes keledi jáne basqalardan kem emes.
«Kompıýterińizdi nemese smartfonyńyzdy ashyp, sertıfıkattar bólimine kirińiz. Ol jerden búkil álem boıynsha ornatylǵan júzge jýyq sertıfıkaty kóresiz. Nemis, brazılııalyq, japon, koreı... Buǵan qosa, qazaqstandyq sertıfıkatty ornatsaq, túk te bolmaıdy. Bul bizde zańmen qarastyrylǵan. Onyń ústine, júıe avtomattandyrylǵan rejımde jumys isteıdi: paıdalanýshynyń qaıda barǵanyn, ne istegenin, qandaı parolderdi engizgenin eshkim baqylamaıdy. Júıe tyıym salynǵan kontentti núkteli buǵattaýǵa ǵana baǵyttalǵan. Bylaısha aıtqanda, mashına trafıkke qoljetkizedi jáne osy trafıkte tek qara tizimge engen siltemelerdi ǵana tabýǵa tyrysady. Eger ol anyqtalsa, mundaı suraý úzilip, paıdalanýshy jaýap almaıdy. Bul jaǵdaıda 404-shi paraqsha ashylady, ıaǵnı serverden jaýap berilmeıdi. Eger adam sertıfıkat ornatpasa, onda sheteldik servıstermen ózara is-qımyl kezinde problemalar áldeqaıda kóp bolady», - dep túsindirdi aqparattyq qaýipsizdik komıtetiniń basshysy.
Al eger paıdalanýshylardyń jeke derekterine qoljetkize alatyn úshinshi tulǵalar ony paıdalanbaq bolsa she?
«Birinshiden, adamdar onymen jumys istemeıdi. Ekinshiden, bizdiń azamattarymyzdy Konstıtýsııa qorǵaıdy, jedel-izdestirý qyzmeti týraly zań bar, qylmystyq is júrgizý kodeksi bar, quqyq qorǵaý jáne arnaýly memlekettik organdardyń barlyq osy áreketterin joǵary qadaǵalaý organy Bas prokýratýra qadaǵalaıdy. Meniń oıymsha, ol bireýge málimetterdi óz erkimen alyp, zańsyz paıdalanýǵa jol bermeıdi. Sonymen qatar, óz ókilettikterin teris paıdalanǵan qyzmetkerge qatysty qylmystyq jaza qoldanylady. Bizdiń memleket buǵan qatań qaraıdy», - dep sendirdi Rýslan Ábdiqalyqov.
