Qytaı astanasy – Beıjiń qalasyndaǵy balalar aýrýhanasynda kútpegen oqıǵa oryn aldy. Týǵanyna 16 aı bolǵan náreste qulaǵy ishine ósip shyqqan baqbaqty tamyrymen alyp tastaýǵa arnalǵan ota jasalǵan bolatyn. Bul týraly ITAR-TASS habarlady.
Jergilikti buqaralyq aqparat quralyndaǵy jarııalanǵan aqparatta álgi ósimdiktiń kólemi 2 santımetr ekeni jazylǵan. Bul baqbaq 4 aı kóleminde syrtqa ósip shyqqan. Búldirshin anasy jýrnalısterge bergen suhbatynda osydan birshama merzim buryn balasy qulaǵyn mazasyzdanyp qasyp, jylaı bergesin dárigerlerge kórsetkenin aıtypty. Ony teksergen dárigerler qyz balanyń qulaǵyna baqbaq ósip kele jatqanyn anyqtaǵan. Náreste anasy budan keshirek qımyldaǵanda, ósimdik tamyry mı qabatyna qaraı órken jaıyp ketedi eken. Osyǵan deıin bul jerge qulaqtaryna jer jańǵaq, iri burshaq nemese shege túsip ketken adamdar kelgen kórinedi. Al qulaq ishine baqbaq ósý jaǵdaıy birinshi ret kezdesip otyr. «Baqbaq qulaq qýysyn tolyq jaýyp qalypty, ony aýyrtpaı alý úshin anestezııa jasaýǵa týra keldi», – deıdi dáriger-otolarıngolog Gý Sınlýn. Ol sóz oraıynda munyń aldynda qulaǵynan 100-ge jýyq qurttar tizbegi tabylǵan sábı kelgenin atap ótti. Jalpy, jergilikti jerdegi aýrýhanaǵa jylyna denesiniń ár jerinen ózgeris baıqalǵan 200-deı adam keledi eken.
Baqytbek Keneshuly.
Derekkóz: ITAR-TASS
