Jıynda Reformalar jónindegi joǵary keńestiń músheleri: Strategııalyq josparlaý jáne reformalar agenttiginiń tóraǵasy Qaırat Kelimbetov, Prezıdenttiń keńesshisi – Reformalar jónindegi joǵary keńes tóraǵasynyń orynbasary ser Sýma Chakrabartı, Premer-Mınıstr Asqar Mamın, Prezıdent Ákimshiliginiń Basshysy Erlan Qoshanov, Prezıdent Ákimshiligi Basshysynyń orynbasary Tımýr Súleımenov, «Atameken» Ulttyq kásipkerler palatasy prezıdıýmynyń tóraǵasy Tımýr Qulybaev sóz sóıledi.
Memleket basshysy óz sózinde memlekettik josparlaýdyń jańa júıesi baǵdarlamalar men reformalardyń dáıektiligin jáne ózara sabaqtastyǵyn qamtamasyz etýge tıis ekenin atap ótti.
– Memlekettik josparlaýdyń jańa júıesi dogmatızm men kózboıaýshylyqtan tolyq ada bolýy qajet. Sulý sóz qanshalyqty az bolsa, mazmuny sonshalyq baı bolady. Ol atqarýshylarǵa is-qımyl erkindigin berý úshin óte pragmatıkalyq bolýy tıis. Atqarýshylarǵa qosymsha jumys júktemeý asa mańyzdy. Iаǵnı, basqa naqty isterge nuqsan keltirmeý úshin bul baǵyttaǵy jumystarǵa kúsh túsirmeý kerek. Úkimet sarapshylardyń qoǵamdastyǵymen jáne jurtshylyqpen tyǵyz yqpaldastyqta jumys isteýi tıis, – dedi Memleket basshysy.
Prezıdent memlekettik josparlaý reformasy júıesinde sıfrlandyrýdy jedeldetý máselesine basa mán berýdi tapsyrdy. Sonymen qatar memlekettik organdar júzege asyryp jatqan qujattar men baǵdarlamalardyń barlyq satysyna taldaý jasaý qajet.
– Táýelsizdik jyldarynda kóptegen baǵdarlama jasaldy. Onyń birazy kúshin joıdy, jańa baǵdarlamalar men qujattar paıda bolýda. Olardyń bárin satyly túrde júıelep, qajet emesterinen arylý kerek. Josparlaýdyń atqarýshylarǵa jáne halyqqa meılinshe túsinikti ári ashyq júıesin jasaǵan jón.
Memleket basshysy konsýltatıvtik komıtetter jumysynyń mańyzdylyǵyna nazar aýdaryp, birinshi kezektegi reformalardyń tizimin anyqtaýǵa jáne olardy júzege asyrý jónindegi usynystarǵa baılanysty naqty mindet júktedi. Sondaı-aq Prezıdent Áleýmettik kodeks, «Sıfrlyq Qazaqstan», «AО́K-2025» sııaqty iri reformalardyń ázirlenýine erekshe nazar aýdarýdy tapsyrdy. Barlyq taraptar úshin ashyq ári biryńǵaı tártip ornatýdyń máni zor. Ádil básekelestik qalyptastyrý, ákimshilik qysymdardy boldyrmaý – ekonomıkalyq ósimniń júıeli sharty.
Prezıdent sot jáne quqyq qorǵaý júıelerin reformalaý máselesine de nazar aýdardy. Onyń pikirinshe, sot jáne quqyq qorǵaý qyzmetine ozyq IT-tehnologııany engizý jáne sıfrlandyrý jumystaryn jalǵastyrý kerek. Sýdıalar korpýsy men quqyq qorǵaý organdaryndaǵy jeke quramnyń kásibı biliktiligin arttyrýǵa basa mán berý qajet.
– Bizge júıeli, sonyń ishinde, kadrlyq sıpattaǵy sharalar qabyldaý kerek. Joǵarǵy Sottyń sýdıasy nemese oblystyq sottardyń tóraǵasy bolsyn sýdıa laýazymyna taǵaıyndaǵan kezde, eń aldymen, sýdıalar korpýsynyń ózinde úlken másele týyndaıdy. Olar bir-birin kásibı biliksiz, jeke jáne basqa da baılanystaryn paıdalanady dep kinálaıdy. Osy tıimsiz tendensııalardy birjola joıý qajet, – dedi Memleket basshysy.
Qasym-Jomart Toqaev óz sózinde reformalar júrgizý barysynda barlyq zańnamalyq ózgerister muqııat ári egjeı-tegjeıli pysyqtalýy kerek ekenin aıtty.
– Bul jerde mynadaı máselelerdi túsiný mańyzdy: Qylmystyq jáne qylmystyq-prosessýaldyq zańnamanyń jıi ózgerýi quqyq qoldaný tájirıbesiniń turaqtylyǵyna nuqsan keltiredi. Qatelesý qaýpin arttyrady. Bul azamattarymyzdyń taǵdyryna áser etýi múmkin. Sondyqtan bul baǵyttaǵy qadamymyz durys. Kelesi jyly osy saladaǵy reformalar jaqsy qarqyn alyp, naqty nátıjeler kórsetýi tıis, – dedi Memleket basshysy.
Qasym-Jomart Toqaev Joǵary memlekettik basqarýdyń barlyq júıesi Qazaqstan halqyna adal, shynaıy qyzmet etýi kerek ekenin aıtty. Memlekettik basqarýdyń barlyq júıesin – memlekettik qyzmetten jergilikti ózin-ózi basqarý deńgeıine deıin is júzinde qaıta qurý qajet.
Jıyn qorytyndysy boıynsha QR Prezıdenti janyndaǵy Reformalar jónindegi joǵary keńestiń 2021 jylǵa arnalǵan jumys jospary jáne konsýltatıvtik komıtetterdiń quramy bekitildi.
