100-ge jýyq saıabaq paıda boldy
Osydan eki jyl buryn alapat sý tasqyny kezinde Tobyl jaǵasyndaǵy bul alapty topan sýmen birge aǵyp kelgen julynǵan tal-terek, qıraǵan aǵash, qamys, shóp-shalam basyp qalǵan edi. Qysqa ýaqyt ishinde jaǵalaý taý bolyp úıilip qalǵan qoqys pen qaırańnan arshylyp, qala turǵyndary demalatyn ǵajaıyp saıabaqqa aınaldy.
Jappaı senbilikke qala turǵyndary, memlekettik qyzmetshiler, erikti jastar uıymdarynyń jasaqtary shyqqan. Oblys ákimi bas bolyp kópshilik jumysqa jumyla kirisip, saıabaq aýmaǵyn kúzgi japyraqtan, qýraǵan aǵashtan tazartyp, áp-sátte aınadaı qylyp tazartyp tastady. Qyz-kelinshekter aǵash áktep, er azamattar qap-qap qoqysty kólikke tıep jatqanda bir sáttik úzilis jarııalanyp, jumys basynda júrgen qala, basqarma basshylary qala turǵyndaryna «Taza Qazaqtan» baǵdarlamasy aıasynda atqarylǵan is-sharalardyń jaı-japsaryn baıandap, alda atqarylatyn jumystardyń jón-josyǵyn aıtyp berdi.
Atalǵan baǵdarlama aıasynda óńirde keıingi úsh jyl ishinde 94 saıabaq, 400-den astam balalar men sportsúıer kópshilikke arnalǵan alań salynǵan. Alda atqarylar sharýa budan da aýqymdy. Bıyl oblysta 77 myń kóshet egý, 37 kópqabatty turǵyn úıdi qalpyna keltirý josparlanyp otyr.
Oblystyq energetıka basqarmasy basshysynyń orynbasary Azamat Sabyrjannyń aıtýynsha, «Taza Qazaqstan» respýblıkalyq ekologııalyq baǵdarlamasy aıasynda eldi mekenderdi abattandyrýǵa, óńirdiń ekologııalyq jaǵdaıyn jaqsartýǵa 54 mlrd teńge qarjy jumsalǵan.
«Sondaı-aq «Taza Qazaqstan» baǵdarlamasy aıasynda óńirde 200-den asa kópqabatty turǵyn úı jóndeýden ótti. Myńnan astam eski ǵımarattar súrilip, 39 myńnan astam jaryq shamdary ornatyldy. 2023 jyldan bastap kóshelerdi jaryqtandyrý deńgeıi 82%-dan 94%-ǵa deıin ósti. Eldi mekenderdi kógaldandyrý dástúrge aınaldy. О́ńirdi kógaldandyrý josparyna sáıkes, 374 myń jasyl jelek otyrǵyzyldy. 2025 jyly 143,9 myń kóshet otyrǵyzyldy», dedi basqarma basshysy.
Qala ákimi Marat Júndibaevtyń aıtýynsha, ótken jyly Qostanaıdaǵy KJBI shaǵyn aýdany men ortalyq saıabaqta 4 gektar aýmaq tolyqtaı abattandyrylǵan. Qala turǵyndary demalatyn saıabaqtarda kóptegen velosıped joldary, jaıaý júrginshilerge arnalǵan serýen joldary salynǵan.
«Saıabaqtardyń aýmaǵyna tartan jabyndysynyń kóptep tóselýi, ásirese, qart kisilerdiń demalýyna qolaıly jaǵdaı týǵyzyp otyr. Qaladaǵy demalys alańdarynda dene shynyqtyrýmen aınalysyp júrgen turǵyndar kóbeıdi. Al «Trıatlon» saıabaǵy sý tasqynynan keıin tolyq jaryqtandyrylyp, sýarý júıesi tartyldy. Sanıtarlyq toraptar, trenajerlar ornatylyp, balalardyń oıyn alańdary, avtoturaq salyndy. Eń bastysy, Qaıyrbekov kóshesi men Abaı kósheleriniń arasy jaıaý júrginshilerge yńǵaıly etip baılanystyryldy. Temirbaev kóshesindegi 0,7 gektar alań da abattandyrylyp, temirjol vokzaly mańyndaǵy turǵyndar ıgiligin kórip jatyr. Arystanbekov kóshesindegi ashyq aýmaqta da balalar oınaıtyn, turǵyndar sportpen shuǵyldanatyn alań paıda boldy. Aınalasyna aǵash otyrǵyzylyp, zeınetkerler otyryp demalatyn shaǵyn saıabaq salyndy», dedi qala ákimi.
Orman alqabyndaǵy ekopark
Qostanaı aýdanynyń ákimi Oljas Nurǵalıev Tobyl qalasyndaǵy «Astana» shaǵyn aýdanynyń mańyndaǵy orman alqabynda buryn-sońdy bolmaǵan ǵajaıyp ekopark salynatynyn aıtty. Ekologııalyq saıabaqtyń aýmaǵy 43 gektar bolady.
«Jobaǵa sáıkes, qazir avtoturaq salynyp jatyr. Kelýshiler arnaıy sándi arka arqyly ótip, eresekter men balalarǵa arnalǵan oıyn-saýyq aımaǵyna kiredi. Munda balalarǵa arnalǵan shaǵyn sáýlet nysandary, trenajerlar, demalys oryndyqtary bolady. Orman ishinde uzyndyǵy 2,5 shaqyrymnan asatyn jaryqtandyrylǵan velosıped jáne júgirý joldary salynady. Turǵyndarǵa arnalǵan sport alańdary paıda bolady. Kópfýnksıonaldy fýtbol alańy, basketbol jáne voleıbol alańdary qarastyrylǵan. Bul parktiń bas-ty ereksheligi – qalyń ormannyń arasynda, tumsa tabıǵat aıasynda ornalasqan. Saıabaqtyń qaqpasyna kirgen soń, nebári 5 mınýt jaıaý júrgen adam ózin qala syrtynda júrgendeı sezinedi», dedi Tobyl qalasynyń ákimi.
Tobyl ózeniniń arǵy betindegi «Astana» shaǵyn aýdanyna tıip turǵan ekopark Qostanaı qalasynyń turǵyndary úshin de qolaıly. Qostanaıdan kólikpen shyqqan adam bul jerge 10-aq mınýtta jetip barady. Park aýmaǵynda jerústi, jerasty ótkelderin salý qarastyrylǵan.
Oblys ákimi Qumar Aqsaqalov atalǵan saıabaq Memleket basshysynyń tapsyrmasy boıynsha salynyp jatqanyn aıtty.
«О́tken jyly Prezıdent Qasym-Jomart Toqaev oblys ortalyqtarynyń mańynda ekopark bolý kerek degen tapsyrma bergen bolatyn. Bul joba Mıchýrın aýylynyń mańyndaǵy orman alqabynda júzege asyrylady. Jergilikti bıýdjetten arnaıy qarjy qarastyrylyp otyr. Joba aıasynda velosıped joldary, jaıaý júrginshiler aımaǵy, jaryqtandyrý, sýarý júıesi, sport alańdary salynady. Iаǵnı tabıǵı orman atmosferasy saqtala otyryp, zamanaýı demalys orny paıda bolady. Bul ekopark oblys turǵyndarynyń súıikti demalys oryndarynyń birine aınalady dep senemin. Erekshe joba ekeni ras, sondyqtan josparlanǵan sharýany óz merziminde sapaly atqaryp shyǵý qajet», dedi Qumar Aqsaqalov.
Bıyl óńirde «Taza Qazaqstan» baǵdarlamasyn iske asyrý aıasynda kópshilik oryndardy halyqqa qolaıly etýge, saıabaqtar men demalys alańdaryn abattandyrýǵa, turǵyn úılerdi jóndeýge, sport alańdaryn salýǵa 16 mlrd teńgeden asa qarajat qarastyrylǵan. Sonymen qatar eldi mekenderdi kógaldandyrý jumysy da aýqymyn keńeıte túspek. Jyl sońyna deıin aýyldyq, qalalyq mekenderde 77,3 myń aǵash egý josparlanyp otyr.
Qostanaı oblysy
