Shubarqudyqta jańa mektep ashyldy

Aýdan ortalyǵy Shubarqudyq kentindegi jańadan boı kótergen Qyzyljar shaǵyn aýdanynda turǵyndar sanynyń ósýine baılanysty jańa mektep qajettiligi birneshe jyl boıy aıtylyp júretin. 2018 jyly bastalǵan mektep qurylysy osy jaz aıynda aıaqtalady dep josparlanǵanymen, karantınde syrttan ákelinetin qurylys materıaldary der ke­zinde jetkizilmeýine baılanys­ty ýaqyttan keshigip qaldy. Oqý ornynyń ashylý saltana­ty­na kelgen óńir basshysy Oń­da­syn Orazalın turǵyndardy qut­tyqtap, mekteptiń bir kabı­netine robot qurastyrý tehnıkalaryn syı­ǵa tartty.

Temir aýdanynyń turǵyny, ardager ustaz Temirhan Ádil­han­ulynyń aıtýynsha, sońǵy jyldary aýyl men qala mektepteriniń arasyndaǵy aıyrmashylyq birte-birte joıylyp keledi. О́ıtkeni zamanaýı keshendi mektep, jaqsy jabdyqtalǵan oqý kabınetteri, kompıýtermen jabdyqtalý deńgeıi jáne eń bastysy sapaly ınternet qala men aýyl mek­tepteriniń bilim deńgeıin teńes­tirýge erekshe múmkindik beredi.

Shubarqudyq kentindegi Qy­­zyl­jar shaǵyn aýdanynda tu­ratyn muǵalim, bes balanyń anasy Rysgúl Qoshtanbekova osy mektepke qazaq tili men ádebıeti pániniń muǵalimi bolyp jumysqa ornalasqan. Ol «Oqýshylarym bu­ryn alystaǵy mektepke qaty­nap oqıtyn. Qystyń kúnderi kún sýyqta tońyp qaldy ma dep sabaqtan kelgenshe alańdap otyratynbyz. Endi úıdiń qasynda jańa mektep ashylǵanda, balalarymyzdan buryn ózimiz rıza bolyp jatyrmyz. Ásirese, mekteptiń keń de eńseli sport zalynda de­ne shynyqtyrýmen turaqty túr­de aınalysýǵa óte qolaıly. Tek ata-analar balalarymyzdyń kish­kentaı kezinen bastap sportpen aınalysýyn qadaǵalap otyrýymyz kerek» deıdi.

Qyzyljar mektebi janynan salynǵan 60 oryndyq ınternat ta – osy tóńirektegi mektebi joq adam sany az aýyldardyń balalarynyń alańsyz bilim alýy úshin jasalǵan erekshe jaǵdaı.

AQTО́BE