«Bıyl dárigerler úshin qıyn jyl boldy. Dárigerlerdiń kómegimen qalamyzdyń 15 myńnan asa turǵyny COVID-19 aýrýynan jazylyp shyqty. Elbasynyń «Birgemiz» atty úndeýi men Memleket basshysynyń qadaǵalaýynyń nátıjesinde indetpen kúrestiń alǵashqy tolqynyn eńserip, daıyndyqty kúsheıttik. Qazirgi tańda elordada 176 adam em alýda. Salystyrmaly túrde aıtar bolsaq, jaz aılarynda bir kúnde 3 911 adam em alyp jatty», dedi qala basshysy.
Ákimniń aıtýynsha, qazir qaladaǵy jaǵdaı turaqtandy. Biraq ári qaraı da bul jumysty kúsheıtilgen túrde qadaǵalap otyrý qajet.
«Jyl basynda PTR testileý boıynsha bir ǵana zerthanamyz bolsa, qazir onyń sany 17-ge deıin artty. Testileý ýaqyty boıynsha jaz aılarynda júkteme kúsheıgende 5 kúnge deıin kútýge týra keletin. Qazir zerthanalardyń qýaty artyp, test nátıjesi 4 saǵatta berilip jatyr. Stasıonarlarda ızotermııalyq kishi-zerthanalar ornattyq, olar stasıonarda emdelip jatqan naýqastardyń testileý nátıjesin eki saǵatta kórsete alady», dedi A.Kólginov.
Sonymen birge vedomstvoaralyq komıssııa sheshimimen elge keletin barlyq reıs jolaýshylarynan PTR anyqtamalary talap etiledi.
«Tıisti anyqtamasy joq jolaýshylardy karantın stasıonaryna jetkizemiz jáne tekserýden keıin ǵana qalaǵa kirgizemiz. 6 qazannan beri 4 800 jolaýshy karantın stasıonaryna bardy, onyń 28-inen COVID-19 vırýsy anyqtaldy jáne emdeýge jiberildi», dedi ol.
A.Kólginov aldaǵy merekelerdi otbasymen ótkizýge keńes berdi. Sondaı-aq karantın talaptaryn saqtaǵan qala turǵyndary men dárigerlerge alǵys aıtty.
«Qaladaǵy epıdemııalyq jaǵdaı men sanıtarlyq normalarǵa beıjaı qaramaıtyn turǵyndarymyzǵa alǵys aıtqym keledi. Endi bizdiń turǵyndar karantınde qalaı júrý kerektigin biledi. Dárigerlerimiz de bıyl naýqastardy emdeýge belsene atsalysyp, aýqymdy tájirıbe jınaqtady. Qazir de juqpaly dertpen kúresip júrgen mamandarǵa alǵys aıtamyn», dedi qala basshysy.
Sonymen birge ol aldaǵy mereke kúnderi halyq kóp jınalatyn oryndarǵa barmaýǵa keńes berdi.
«Alda kóptegen merekeler kele jatyr. Munda halyq kóp jınalatyn oryndarǵa barmaýǵa keńes berer edim. Jańa jyldyń otbasylyq mereke ekeni barshaǵa aıan. Sondyqtan jańa jyldy aýrýhana tóseginde qarsy alǵannan góri úıde otbasynyń ortasynda kútken jaqsy ǵoı. Bul kúnderi asa muqııat bolyńyzdyr!», dedi A.Kólginov.
Pandemııa kezeńinde Nur-Sultan qalasynyń ákimdigi 43 mlrd teńgeni ońtaılandyryp, qajetti salalarǵa baǵyttady. Bul týraly qala ákimi keńinen aıtyp berdi.
«Pandemııanyń jaǵymsyz saldarynan, ásirese odan shaǵyn jáne orta bıznes zardap shekti. Jergilikti bıýdjetke de jyl basynda boljanǵan túsimder tolyq túspeýi múmkin. Memleket ShOB sýbektilerin qoldaý úshin jeńildikter jasady. Sondyqtan jyl sońyna qaraı shamamen 47 mlrd teńge bizdiń bıýdjetke túspeýi yqtımal. Korporatıvti tabys salyǵy boıynsha da jyl basynda tólenýi tıis 10 mlrd teńgeden asa qarajat túspeýi múmkin. Osyǵan baılanysty Memleket basshysynyń tapsyrmasymen Nur-Sultan ákimdiginiń jergilikti bıýdjetin 43 mlrd teńgege ońtaılandyrdyq», dedi qala basshysy.
Únemdelgen qarajat eń aldymen COVID-19 indetimen kúreske, densaýlyq saqtaý júıesin damytýǵa, dári-dármek pen medısınalyq jabdyqtar satyp alýǵa jumsalǵan.
«Bilim berý júıesin damytýǵa da kóńil bóldik. Sebebi qashyqtan oqytý formaty úshin az qamtylǵan otbasy balalaryna noýtbýkter men roýterler qajet boldy. Ári qaraı áleýmettik kómek kórsetýge, ekonomıkanyń naqty sektoryn qoldaýǵa, ınfraqurylymdy damytyp, turaqtandyrý qoryn toltyrýǵa mán berdik. Jalpy alǵanda elordanyń áleýmettik-ekonomıkalyq kórsetkishteri oń nátıje kórsetip otyr. Pandemııaǵa qaramastan, júrgizilgen memlekettik sharalardyń nátıjesinde negizgi kapıtalǵa 1 trln teńge ınvestısııa túsedi dep boljap otyrmyz. Salystyrar bolsaq, 2019 jyly 900 mlrd teńgeden asa qarajat túsken edi», dedi A.Kólginov.
