Májiliste shahar aýmaǵyndaǵy Tasbóget jáne Belkól kentterinde jyl kóleminde atqarylǵan jumystar men aldaǵy mindetter qaraldy. Tasbógettegi tolymdy tirlikterdi baıandaǵan kent ákimi Semser Syzdyqov 11 aı kóleminde kásipkerlik sýbektiler sany jańadan 119 jeke kásipkermen tolyǵyp, iskerler sany 1200-ge jýyqtaǵanyn aıtty. Habarlamashy «Jumyspen qamtý jol kartasy» baǵdarlamasyna saı kentte atqarylǵan jumystardy, jetistikteri men kórsetkishterin saralady.
Al Belkólde jol máselesi tolyq sheshilipti. Kent ákimi Ardaq Ibraımov jaryq baǵanalaryn ornatý jumystary da júıeli júrgizilgendigin aıtty. Jyl basyndaǵy eseptik kezdesýde Belkól kentine qarasty Birqazan eldimekenine kireberis jolynyń ortasha jol jóndeý kóterilgen edi, qazir bul másele de sheshimin tapqanyn baıandady.
Qos kenttiń kórsetkishteri men tyndyrymdy tirlikterin taldap, jyl kólemindegi jetistikterin tyńdaǵan shahar basshysy qala irgesinde Tasbógette memlekettik baǵdarlamalardyń ıgiligin kórip otyrǵan azamattardyń qatary áli de az ekenin aıtyp, merzimdi áskerı qyzmetke shaqyrý jumystary boıynsha tapsyrysty túgendep, aýyl sharýashylyǵyn sıfrlandyrý jumystaryn jyl aıaǵyna deıin aıaqtaýdy tapsyrdy. «Bıznestiń jol kartasy 2020» jáne «Qarapaıym zattar ekonomıkasy» baǵdarlamalary arqyly Belkólde bıznes bastaǵan azamattar sanynyń tómendigi baıqalady. Osyny synǵa alǵan shahar basshysy kentte qylmystyń ashylýy men aıyppuldy óndirýge, sanıtarlyq tazalyqqa baılanysty da kemshilikterdiń baryn atap ótti.
Qos basshyǵa da birqatar syn-eskertpeler aıtqan qala ákimi jumystaryn shıratýdy tapsyryp, jyl aıaǵyna deıin tapsyrylǵan mindetterdi mejeli oryndap, kórsetkishterdi kóterýdi júktedi.
