Onlaın formatta ótken shara Táýelsizdigimizdiń 29 jyldyǵyna oraılastyryldy.
Qazaqstannyń Kanadadaǵy Elshisi Aqylbek Kamaldınov dıasporany kópten kútken qazaq mádenıeti ortalyǵynyń ashylýymen quttyqtap, bul is-shara Ábý Nasyr ál-Farabıdiń 1150 jyldyǵy, Abaı Qunanbaıulynyń 175 jyldyǵy jáne kompozıtor Shámshi Qaldaıaqovtyń 90 jyldyǵy aıasynda ótkeni erekshe mańyzǵa ıe ekenin atap ótti.
"Elshilik Ortalyqty qazaq dıaspora ókilderi men Kanadanyń ártúrli qalalarynda turatyn qazaqstandyqtar úshin, sondaı-aq qazaq halqynyń tili, mádenıeti, dástúrleri men ádet-ǵuryptarymen tereńirek tanysqysy keletin kanadalyqtar úshin ashyp otyr"， dedi otandyq dıplomat.
Ortalyqta qazaq tilin oqý men mádenıetimen tanysýmen qatar, Kanadadaǵy otandastarymyzdy biriktirý men jaqyndasýǵa baǵyttalǵan túrli is-sharalar ótkiziledi.
Ashylý rásiminde Qazaq KSR-niń eńbek sińirgen ártisi Marat Maqsutov Abaıdyń ánderin shyrqap, kezdesý qonaqtaryn óz ónerimen rıza qyldy. Qazaq dıasporasynyń ókili, ánshi Álııa Sedekqyzy is-sharaǵa qatysýshylardy bulbul daýysymen tánti etti, al dombyrashy Qyranbek Altanuly dombyrany sheberlikpen oınaýymen jáne ánderimen keń baıtaq qazaq dalasynyń rýhyn jetkize bildi.
Qazaq dıasporasy ókilderiniń balalary Abaıdyń óleńderin qazaq, aǵylshyn, fransýz jáne orys tilderinde oqydy.
Beıresmı baǵalaýlarǵa sáıkes, qazirgi kezde Kanadadaǵy qazaq dıasporasynyń sany 12 myńnan astam adamdy quraýy yqtımal. Olardyń kópshiligi Kanadadaǵy iri qalalarda – Toronto, Monreal, Vankýver, Kalgarı jáne Ottavada turady.
