Qurylysyna 100 mln teńgeden astam qarajat jumsalǵan keshende aýyl azamattarynyń sportpen aınalysýyna ǵana emes, jalpy bos ýaqytyn tıimdi ótkizýge barlyq jaǵdaı jasalǵan. Bul jerde voleıbol, basketbol, shaǵyn fýtbol alańdarymen qatar bıshilerge arnalǵan da oryn bar. Bir mezette 120 adam jattyǵa alatyn bul keshende bolashaqta 16 adam turaqty jumyspen qamtylmaq.
Mádenı-sport kesheniniń ashylý saltanatyna Batys Qazaqstan oblysynyń ákimi Ǵalı Esqalıev, Olımpıada oıyndarynyń qola júldegeri Ekaterına Larıonova arnaıylap bardy.
- Jyl basynda memlekettik-jekemenshik seriktestikti nyǵaıtyp, kásipkerlerdi týǵan aýylyna kómek kórsetýge shaqyrǵan edim. Tapsyrmama alǵashqylardyń biri bolyp qulaq asqan Beıbit Baıtenııazulyna eldiń jáne ózimniń atymnan shynaıy alǵysymdy bildiremin. Qasıetti Táýelsizdik merekesi qarsańynda aýylyna osyndaı tamasha syı jasaǵan Asanovtar áýletiniń isi basqa azamattarǵa da úlgi bolady degen senimdemin. Bizdiń óńir daryndy sportshylarǵa kende emes. Azııa, Álem chempıondary men Olımpıada oıyndarynyń júldegerleri bar. Olardyń kóbi aýyldan shyqqan. Dál osyndaı jańa zaman talabyna saı sport kesheninde jattyqqan órender bolashaqta el úmitin aqtaıtyn sportshy bolady degen senim mol, - dedi Ǵalı Nájimedenuly óz sózinde.
Sońǵy jyldary Batys Qazaqstan oblysynda sportqa erekshe kóńil bólinip keledi. Bıyldyń ózinde Oral qalasy men aýdandarda toǵyz sport kesheni qurylysy júrip jatyr. Jańaqala aýylyndaǵy sport nysany jaqynda ǵana paıdalanýǵa berilse, jyl sońyna deıin Podstepnyı men Saıhyn aýyldaryndaǵy keshen qurylysy aıaqtalady.
О́ńir basshysy jańa keshenge sońǵy úlgidegi led-ekran men mýzykalyq apparatýrany syıǵa tartty.
- On jyldan beri aýylyma osyndaı sport keshenin salýdy armandap kelgen edim. Mine oǵan qol jetkizdim. Endi aýylymyzdyń balalary men jastary osy jerge kelip, bos ýaqytyn tıimdi ótkize alady. Halqyma qýanysh syılaǵanyma ózim de erekshe qýanyp turmyn. Men tek mádenı-sport keshenin turǵyzdym. Osy iske basqa kásipkerler qoldan kelgenshe kómegin berdi. Biri kóshe jaryǵyn tartsa, endi biri sport quraldaryn syılap jatty. Qolǵabys etken barsha dostarym men týystaryma jáne qurylys jumystaryn júrgizgen jigitterge rızashylyǵym sheksiz, -deıdi atymtaı kásipker Beıbit Asanov.
