Bul zań jobasy ekonomıka salasyn, sonyń ishinde pandemııadan zardap shekken baǵyttardy damytýǵa yqpal etedi. Sol arqyly el ekonomıkasynyń ósýin jedel jáne tıimdi túrde qalpyna keltirý kózdelip otyr.
«Zań jobasy qabyldansa, halyqtyń baspanamen qamtý, bilim alý salalary boıynsha áleýmettik-ekonomıkalyq jaǵdaıy jaqsarady dep kútilýde. Sebebi, Zańǵa qol qoıylǵannan keıin joǵary bilim alý úshin memlekettik bilim kredıtteri berile bastaıdy. Sondaı-aq kópbalaly, tolyq emes jáne múgedek bala tárbıelep otyrǵan otbasylarǵa arnalǵan oqýǵa qabyldaý kvotasy belgilenedi. Azyq-túlik qaýipsizdigin qamtamasyz etý jáne baǵanyń negizsiz qymbattaýyna jol bermeý úshin kóterme-bólý ortalyqtarynyń qurylysy boıynsha da normalar bekitiledi», – dedi Senat depýtaty Edil Mamytbekov.
Sonymen qatar otyrys barysynda senatorlar Parlament depýtattary bastamashy bolǵan «Qazaqstan Respýblıkasynyń Sý kodeksine jergilikti ókildi, ortalyq jáne jergilikti atqarýshy organdar arasynda aýyzsýmen jabdyqtaýdy sýbsıdııalaý jónindegi ókilettikterdiń arajigin ajyratý máseleleri boıynsha ózgerister men tolyqtyrýlar engizý týraly» zań jobasyn qarady.
Zań jobasy aýyldyq jerlerdi aýyzsýmen qamtamasyz etý jumystaryn ońtaılandyrýǵa, jańadan salynǵan aýyzsýmen jabdyqtaý júıelerin jeńildikti nysandar tizimine engizý úderisin tezdetýge jáne aýyldyq jerlerdegi halyqty aýyzsýmen jabdyqtaý qyzmetiniń baǵasyn tómendetýge arnalǵan.
«Zań jobasynda usynylǵandaı, ár aımaqtaǵy sýmen jabdyqtaý júıeleriniń tizimin bekitý quziretin jergilikti deńgeıge berý óńirlerdiń aýyzsýmen jabdyqtaýǵa arnalǵan sýbsıdııalardy alýyn tezdetedi. Sondaı-aq bul jergilikti ókildi organdarǵa óńirdiń áleýmettik-ekonomıkalyq damýyn jáne sýmen qamtamasyz etý qyzmetiniń tarıfterin eskere otyryp, aýyzsýdyń 1 tekshe metri úshin ótemaqy kólemin ózderi anyqtaýǵa múmkindik beredi», – dedi senator Lázzat Rysbekova.
Mundaı standarttar ákimdikterge aýyzsýmen jabdyqtaý júıesin memlekettik sýbsıdııalaýdyń barlyq sharttaryn saqtaı otyryp, qosymsha sýbsıdııalardyń esebinen jańa sýmen jabdyqtaý nysandarynyń sanyń óz betinshe kóbeıtýge múmkindik beredi.
