«Tarıhy baı, tamyry tereń Qazaq eli úshin budan asqan qasterli qundylyq joq. Ony eń qymbat qazynaǵa, eń asyl amanatqa balaımyz. Sondyqtan, babalar ańsaǵan Táýelsizdiktiń qadirin jan-júregimizben sezinemiz. Egemendik – ár halyqqa buıyra bermeıtin baǵa jetpes baqyt. Táýelsizdik shejiresi Tuńǵysh Prezıdentimiz – Elbasynyń tarıhı tulǵasymen tyǵyz baılanysty», dedi Prezıdent.
Qasym-Jomart Toqaev pandemııa saldarynan elimizdiń basty ulttyq merekesin keń kólemde atap ótý múmkin bolmaǵanyn aıtty. Azamattarymyzdyń densaýlyǵy, ómiri jáne ál-aýqaty bárinen joǵary turady. Sondyqtan barlyq is-shara shekteýli formatta jáne onlaın rejımde ótedi. Biraq bul jaǵdaı Táýelsizdik kúniniń quny men mańyzyn esh tómendetpeıdi. Prezıdent ulyq merekeniń saltanatty rýhy ár shańyraqty shattyqqa bólep, ár qazaqstandyqtyń júregin qýanyshqa toltyratynyna senim bildirdi.
«Prezıdent laýazymyndaǵy meniń basty mindetim – áleýmettik ádildik jáne halyqtyń ál-aýqatyn arttyrý. Sondyqtan memlekettiń kúndelikti is-áreketi azamattarymyzdyń turmys sapasyn jaqsartýǵa baǵyttalady. Bıyl 4 mıllıonǵa jýyq azamattyń zeınetaqysy men áleýmettik tólemaqylarynyń kólemin ósirdik. Áleýmettik saqtandyrý tólemaqysyn 5 paıyzǵa kóbeıttik. Az qamtylǵan otbasylardyń 500 myńnan astam balalary úshin kepildendirilgen áleýmettik toptama engizdik. Pandemııa kezinde qıyn jaǵdaıǵa tap bolǵan adamdarǵa qoldaý kórsetý úshin óńirimizde buryn-sońdy bolmaǵan qadamǵa bardyq. Azamattarǵa 42500 teńge kóleminde tikeleı tólemaqy berildi. Memleketten 4,5 mıllıonnan astam adam qarjylaı kómek aldy. Nesıelerdiń shegerilýi 1 mıllıon 900 myńǵa jýyq qazaqstandyqtyń defoltqa túsýine jol bermedi», dedi Qasym-Jomart Toqaev.
Prezıdent geostrategııalyq belgisizdik jaǵdaıynda memleketterdiń halyqaralyq arenadaǵy saıası ózimshildigi men ekonomıkalyq ultshyldyǵy kúsheıetinine nazar aýdardy. Búginde halyqtardyń jahandyq mártebesi kóbinese tehnologııalyq kóshbasshylyq úshin bolatyn qatań básekede anyqtalady.
«El damýynyń syrtqy jáne ishki mindetteriniń ózara úılesimdi ushtasýynyń mańyzy artyp keledi. Biz Qazaqstannyń shynaıy básekege qabilettiligin arttyrý úshin barlyq kúsh-jigerimizdi jáne resýrstarymyzdy jumyldyrýymyz qajet. Búginde ulttyń shoǵyrlanýy jáne árbir azamattyń Táýelsizdik qundylyqtaryna sheksiz qyzmet etýi óte mańyzdy. Biz kópjaqty qurylymdar men BUU rólin kúsheıtýge yqpal ete otyryp, halyqaralyq qaýipsizdik júıesin nyǵaıtý jolyndaǵy syrtqy baǵdarymyzdy jalǵastyra beremiz. Ulttyq múddelerimizdi qatań ustanyp, zamanaýı kópjaqty álemde tıimdiligin dáleldegen úılesimdi ári syndarly syrtqy saıasatymyzdy dáıekti júrgizemiz», dedi Memleket basshysy.
Qasym-Jomart Toqaev Táýelsizdigimizdiń 29-shy jyly kúrdeli, qıyn ári erekshe bolǵanyn atap ótti. Mundaı taǵdyrsheshti synaqtar ár urpaqtyń basyna túse bermeıdi. Jahandyq daǵdyrysty eńsergen memleketimiz budan da zor maqsattar men mindetterdi kózdeıdi.
«Aldaǵy jyl – mejeli kezeń. Bul jyl el Táýelsizdiginiń 30 jyldyǵy aıasynda ótedi. Bul ótkenge kóz júgirtip, qorytyndy jasaıtyn ýaqyt. Halqymyz úshin osy mańyzdy datany naqty istermen jáne jańa jobalarmen qarsy alamyz. Dańǵaza aqsııalar men daýryqpa sharalardan bas tartyp, búkil is naqtylyqqa qurylatyn bolady. Ekonomıka, áleýmettik sala, ekologııadaǵy júıeli sharalardyń kólemdi keshenin iske asyrýdy jalǵastyramyz. Turǵyndardyń barlyq toptarynyń, ásirese jastar, áıelder, múmkindigi shekteýli jandardyń qajettilikterine basa mán beremiz. Biz elimizdegi saıası jańǵyrtý úderisin jalǵastyra beremiz», dedi Prezıdent.
Memleket basshysy kelesi jyldyń basynda jarııalanatyn jańa reformalar toptamasy týraly aıtty. Bul «halyq únine qulaq asatyn memleket» qurýǵa, ádilet jáne teń múmkindikter qaǵıdattaryn bekitýge baǵyttalǵan Qazaqstandaǵy demokratııalyq túrlenýge tyń serpin beredi. Májilis jáne barlyq deńgeıdegi máslıhattarǵa saılaý ótkizý kelesi jyldyń taǵy bir mańyzdy oqıǵasy bolmaq. Qasym-Jomart Toqaev aldaǵy saılaý joǵary azamattyq belsendilik tanytyp, qoǵamnyń saıası saýatty ekenin kórsetetinine senim bildirdi. Saılaý naýqany qazaq memlekettiginiń ınstıtýsıonaldyq turaqtylyǵyn dáleldeıdi.
Prezıdent óz sózinde Memleket basshysynyń qolynan marapat alǵan qazaqstandyqtardyń sińirgen eńbegine joǵary baǵa berdi.
Memleket basshysynyń saltanatty rásimde sóılegen sóziniń tolyq mátinimen myna silteme arqyly tanysýǵa bolady
