Qus fabrıkasy damýynyń úsh kezeńi mejelendi. Nysan «Aıtas.kz» holdınginiń quramyna enedi. Holdıng Aqmola oblysymen qatar, Shyǵys Qazaqstanda da qus ósiredi. Almaty oblysynda broıler jumyrtqasyn óndirý josparlanǵan. Osylaısha, otandyq kásiporyn qus eti óndirisiniń tolyq sıkline qol jetkizýdi kózdep otyr.
«Zaýytty damytýdyń ekinshi kezeńi júzege asyryldy. Bul ónim kólemin 25 myń tonnadan, 56 myń tonnaǵa jetkizýge múmkindik beredi. Ekinshi kezeńi aıasynda 4 broıler ósirý kesheni salyndy. Onyń árqaısysynda 12 korpýs bar. Ár korpýstyń aýmaǵy 2 myń sharshy metr», deıdi Makınsk qus fabrıkasynyń dırektory Evgenıı Proskýrın.
Kásiporyn qýatynyń eselenýine oraı qus azyǵyn ázirleý sehy, qus etin óńdeý orny qaıta jabdyqtaldy. 570 jańa jumys orny ashyldy. Osylaısha, jumysshylardyń jalpy sany myń jarymǵa jetti. Qus fabrıkasynyń ekinshi kezeńin iske asyrýǵa 13,7 mlrd teńge ınvestısııa jumsalǵan. Onyń 11 mlrd teńgesi «Qazaqstannyń damý banki» usynǵan nesıe.
Ortalyq Azııadaǵy eń iri qus fabrıkasy úshinshi kezeńinde ónim kólemin 100 myń tonnaǵa jetkizýdi josparlanǵan. Qazir elimizdegi kásiporyndar qus etimen ishki naryqtyń jartysyn qamtamasyz etip otyr. Al qalǵany syrttan keledi. Makınsk qus fabrıkasy tolyq qýattylyǵyna jetkende, naryqtaǵy otandyq ónimniń úlesi 80 prosentke óspek.
