Qazaqstan Respýblıkasynyń Tuńǵysh Prezıdenti kúni – memlekettik merekege baılanysty quttyqtaý hattar men jedelhattar
Qazaqstan Respýblıkasy Tuńǵysh Prezıdenti kúnin merekeleýge oraı Elbasy Nursultan Nazarbaevtyń atyna qazaqstandyq jáne sheteldik saıası jáne iskerlik toptardan, memleket jáne qoǵam qaıratkerlerinen, kásiporyndardyń ujymdary men qoǵamdyq uıymdardan, jekelegen azamattardan kóptegen quttyqtaýlar kelip tústi.
Qazaqstan Respýblıkasynyń Tuńǵysh Prezıdenti kúni – memlekettik merekege baılanysty quttyqtaý hattar men jedelhattar
Qazaqstan Respýblıkasy Tuńǵysh Prezıdenti kúnin merekeleýge oraı Elbasy Nursultan Nazarbaevtyń atyna qazaqstandyq jáne sheteldik saıası jáne iskerlik toptardan, memleket jáne qoǵam qaıratkerlerinen, kásiporyndardyń ujymdary men qoǵamdyq uıymdardan, jekelegen azamattardan kóptegen quttyqtaýlar kelip tústi.
Quttyqtaýlarda respýblıkamyzdyń óz áleýetin júzege asyryp, órkendeýshi elge aınalýyna sebepker bolǵan Qazaqstan Respýblıkasy Tuńǵysh Prezıdentiniń halyqaralyq saıasattaǵy jáne bizdiń memleketimizdiń qarqyndy damýyndaǵy baǵa jetpes róli atap kórsetilgen, dep habarlady Prezıdenttiń baspasóz qyzmeti.
Memleket basshysyna izgi tilekteri men quttyqtaý hattaryn Qazaqstannyń ártúrli kásiporyndarynyń jumysshylary da joldady.
«Qazmyrysh» kompanııalar tobynyń ujymy óz quttyqtaýynda búgingi Qazaqstan – turaqtylyq, qarqyndy damý jáne jasampazdyq sekildi úsh faktormen sıpattalatynyn atap ótken.
Olarǵa Almaty lokomotıv paıdalaný deposynyń ujymy da qosylady.
Stepnogorskiniń «Arystan» qubyr zaýytynyń jumysshylary túbegeıli qaıta jańarýlar men jańǵyrtýlardyń dáıekti saıasaty, ornyqty jáne úılesimdi ekonomıkany qamtamasyz etý jónindegi oılastyrylǵan júıe búkil álemde tanymaldyqqa ıe bolyp otyrǵanyna toqtalǵan.
«Kásiporyn ujymy Qazaqstannyń zamanaýı ónerkásip óndirisin odan ári damytýǵa baǵyttalǵan jobalarǵa Sizdiń Prezıdent retinde nazar qoıyp jáne qoldaý kórsetip otyrǵanyńyzdy joǵary baǵalaıdy», – delingen olardyń hatynda.
«KSP Steel» saýda úıi» JShS basshysy M.Ábıev óz hatynda Memleket basshysy Qazaqstan men onyń halqynyń ıgiligi jolynda qajyrlylyqpen eńbek etip jatqanyn erekshe atap kórsetken.
Aqmola oblysyndaǵy «Esil-Agro» JShS bas dırektory A.Ismaǵambetov Memleket basshysynyń udaıy kóńil bólip otyrǵanynyń arqasynda búginde agroónerkásip salasy álemdik talaptarǵa saı damyp kele jatqanyn aıtqan. О́z kezeginde Astanadan hat joldaǵan «Biomarket.kz» JShS ujymy respýblıkada bıoeginsharýashylyǵy men bıomalsharýashylyǵyn damytý úshin barlyq kúshterin salatynyna sendirgen.
Sonymen qatar, Qazaqstan kásipodaqtary federasııasynyń ujymy atynan onyń tóraǵasy Á.Qusaıynov, Almaty qalasyndaǵy Halyqqa qyzmet kórsetý ortalyqtarynyń biriniń ujymy atynan A. Shákenov quttyqtaý joldaǵan.
Qazaqstan Respýblıkasy Prezıdenti janyndaǵy Qazaq strategııalyq zertteýler ınstıtýty, Ǵ.Saparǵalıev atyndaǵy Memleket jáne quqyq ǵylymı-zertteý ınstıtýty ujymdary atynan elimizdiń ǵylymı toptary Memleket basshysynyń jańa, táýelsiz Qazaqstandy qurýdaǵy, ekonomıkany jáne elimizdiń halyqaralyq bedelin nyǵaıtýdaǵy kópshilik moıyndaǵan úlesin atap ótken.
Izgi tilekke toly hattar elimizdiń bilim berý mekemelerinen de keldi.
H.Dosmuhamedov atyndaǵy Atyraý memlekettik ýnıversıtetiniń professorlary men stýdentteri, Qaraǵandy memlekettik tehnıkalyq ýnıversıtetiniń ujymy bilim berý salasyn memlekettik qoldaýdyń mańyzdylyǵyna toqtalǵan.
T.Júrgenov atyndaǵy Qazaq ulttyq óner akademııasynyń ujymy joldaǵan hatta Prezıdenttiń basshylyǵymen elimiz órkendeý men jasampazdyq jolyn júrip ótkeni baıandalǵan.
«Ol jeńil bolǵan joq, biraq ol, eger erkin saılaýǵa jáne halyqtyń erik-jigerine súıenetin bolsa, eger babalardyń rýhanı tájirıbesin umytpasa jáne ınnovasııadan qaımyqpasa, onda qandaı joǵary nátıjelerge jetýge bolatynyn kórsetti», dep jazady hat ıeleri.
M.Maqataev atyndaǵy №140 mektep-gımnazııasynyń muǵalimderi, sondaı-aq, Almaty qalasynyń №116 «Bóbekjaı» balabaqshasynyń tárbıeshileri joldaǵan hattarynda tárbıelenýshileriniń jetistikteri jóninde aıtqan. Sondaı-aq, hat ıeleri Memleket basshysyna bilim berý júıesine kóńil bólip, onyń qarqyndy damýyna jaǵdaı jasaǵany úshin alǵystaryn jetkizgen. Pedagogtar balalardyń damýy úshin paıdaly resýrsqa aınalǵan «Balapan» balalar telearnasyn iske qosýdyń mańyzdylyǵyn aıryqsha atap ótken.
О́z hatynda Qazaqstan halqy Assambleıasynyń halyqaralyq medıa-forýmyna álemniń 20 elinen kelgen qatysýshylar Nursultan Nazarbaevqa tek Qazaqstanda ǵana emes, búkil álemde tynyshtyq pen kelisimniń saqtalýyn ilgeriletýshilik qyzmeti úshin alǵystary men qurmetterin bildirdi. Olardyń ıgi tilekterine Aqmola oblysynyń Qazaqstan halqy Assambleıasynyń XVI sessııasyna, «Jańa Qazaqstandy qalyptastyrý jónindegi QR Tuńǵysh Prezıdenti N.Á.Nazarbaevtyń betburysty sheshimi» óńirlik ǵylymı-praktıkalyq konferensııasyna qatysýshylar, Ońtústik Qazaqstan oblysynyń zııaly qaýym ókilderi, sondaı-aq, Oral men Aqtóbe arhıepıskopy Antonıı qosylyp otyr.
«Janashyr» halyqaralyq qaıyrymdylyq qorynyń prezıdenti J.Ápetova Nursultan Nazarbaevtyń basshylyǵymen Qazaqstan táýelsizdik jyldarynda orasan nátıjege jetti dep sanaıdy.
«Mádenıet, óner men ǵylym tárizdi salalar múlde jańasha damydy. Sonymen birge, meniń zamandastarymnyń sana-sezimi, dúnıetanymy jáne minez-qulqy ózgerip, jańasha qalyptasa bastady», delingen hatta.
Semeı qalasyndaǵy «Kómek» múgedekter qoǵamdyq birlestigi ókilderiniń quttyqtaýynda Memleket basshysynyń elimizdiń áleýmettik-ekonomıkalyq damýyndaǵy jáne halyqtyń ómir súrý deńgeıin arttyrý úshin jaǵdaı jasaýdaǵy róli atap kórsetilgen.
Memleket basshysynyń Temirtaýda jumys istegen úzeńgilesteri A.Júnisov, K.Omashev, E.Tileýbaev, V.Nıkonov, J.Arysov, A.Asanov, V.Kolbasa, N.Vahıtova, T.Iskakov ta júrekjardy tilekterin joldaǵan. Olar ózderine eńbeksúıgishtiktiń úlgisin kórsetken Nursultan Nazarbaevpen birge jumys isteý múmkindigine ıe bolǵany úshin boılaryn maqtanysh sezimi kerneıtinin jazady.
О́z kezeginde Qaraǵandydan eńbek ardagerleri S.Dosmaǵambetov pen Z.Moldahmetov Táýelsizdik qarsańyndaǵy saılaýaldy kezeńde Nursultan Nazarbaevpen kezdesken kezderin eske alady.
«Halyq qatty alańdady, ári qaraı ne bolady, qalaı ómir súremiz, respýblıka taǵdyry ne bolmaq? Osy kezdesýde Siz barlyq saýalǵa tolyq jaýap berdińiz jáne budan ári biz álemdik órkenıet jolymen alǵa jyljıtynymyzdy, Qazaqstan táýelsiz memleket retinde tolyq damı alatynyn jáne órkendeıtinin aıttyńyz», – dep jazady eńbek ardagerleri.
Qazaqstan Jazýshylar odaǵynyń múshesi T.Nurahýnov, aqyn ári ánshi I.Tasqara, Shymkentten zeınetker, tyl eńbekkeri B.Botaıuly, Soltústik Qazaqstan oblysynyń Talshyq aýylynyń turǵyny I.Ilıasov, Aqmola oblysynan T.Baryshnıkova, Almatydan I.Hasenuly, Qaraǵandy oblysy Balqash qalasynyń №7 mektep-gımnazııasynyń oqýshylary óz quttyqtaýlaryn óleń joldary arqyly bildirgen. Z.Kóshimbaeva óz hatynda nemeresi N.Kóshimbaevanyń óleńin qosa jibergen, onda Tuńǵysh Prezıdenttiń táýelsiz Qazaqstandy qalyptastyrý men damytýdaǵy róli týraly baıandalǵan.
Almatydan Qazaqstannyń halyq ártisi, kompozıtor B.Jumanııazov, Marat pen Naǵıma Nazarbaevtar, K.Bólegenova, A.Aıhanova, A.Ákimuly, Petropavldan K.Áýbákirova, Taldyqorǵannan B.Tórehanova, Shyǵys Qazaqstan oblysy Semeı qalasynan H.Qalıeva, Astanadan A.Ǵabdýllına, Sadýaqas, T.Saparova, Aıjan men Álııa Aıthojınalar, Shymkentten I.Orazbaı, O.Kómekbaeva, zeınetker B.Shúkirbekova, Oraldan T.Qubasheva, B.Meńdiǵalıqyzy, Aqmola oblysynan eńbek sińirgen qyzmetker, zeınetker G.Núrkenova, K.Ábýova, t.b. joldaǵan hattarda Memleket basshysyna zor densaýlyq, sondaı-aq, jaýapty qyzmetine mol tabys tilegen ıgi tilekter bildirilgen.
Almatydan joldaǵan óz hatynda G.Svetlova men L.Shabalına qazaqstandyqtarǵa kórsetilgen qamqorlyq úshin Memleket basshysyna zor alǵystaryn bildirgen. Mundaı kóńil bólýdiń bir mysaly retinde olar Qazaqstan men Reseı arasynda qol qoıylǵan XXI ǵasyrdaǵy tatý kórshilestik pen odaqtastyq týraly tarıhı shartty ataǵan.
Quttyqtaýlar joldaǵan qazaqstandyqtar arasynda Astana turǵyny, 1-synypty ınjener-ushqysh N.Aqmuqanov ta bar. Ol hatynda «Balalyq shaǵymnyń aspany» fılmin tamashalaýdan alǵan óz áserin bólisken.
«Eń aldymen, týǵan aýylyna, áke shańyraǵyna degen erekshe súıispenshilik, ushqan uıa mektebine, balalyq shaqtaǵy dostaryna degen adaldyq shynaıy tanytylǵandyqtan, fılm tamasha boldy. Eń bastysy, bul fılm árbir qazaqstandyqtyń, árbir otbasynyń jáne ásirese, jastardyń júreginen óz ornyn tapty», – dep jazady N.Aqmuqanov.
Quttyqtaý hattary men jedelhattar ortalyq jáne jergilikti memlekettik organdardyń basshylarynan, Parlament depýtattarynan da keldi.
Kelip túsken quttyqtaýlarmen tanysyp shyqqan Memleket basshysy Nursultan Nazarbaev hattar men jedelhattar joldaǵan barlyq avtorlarǵa quttyqtaýlary men ıgi tilekteri úshin alǵysyn bildirdi.
