Elbasy Nursultan Nazarbaev Ekonomıkalyq qylmysqa jáne sybaılas jemqorlyqqa qarsy kúres agenttiginiń tóraǵasy Rashıd Túsipbekovti qabyldady, dep habarlady Prezıdenttiń baspasóz qyzmeti.
Elbasy Nursultan Nazarbaev Ekonomıkalyq qylmysqa jáne sybaılas jemqorlyqqa qarsy kúres agenttiginiń tóraǵasy Rashıd Túsipbekovti qabyldady, dep habarlady Prezıdenttiń baspasóz qyzmeti.
R.Túsipbekov Memleket basshysyn agenttiktiń bıylǵy 10 aıdaǵy qyzmetiniń qorytyndylary týraly habardar etti.
Kezdesý barysynda Nursultan Nazarbaev sybaılas jemqorlyqty qabyldaý ındeksi reıtınginde elimizdiń pozısııasy tómendegenin atap kórsetti.
– Reıtıngtiń nasharlaýy bul baǵyttaǵy jumys qarqynynyń tómendegenin nemese agenttiktiń qyzmetinde tıisti esep júrgizilmeıtinin bildiredi. Jergilikti jerlerde turǵyndar sybaılas jemqorlyqtyń ahýalynan jaqsy habardar, solarmen tyǵyz jumys isteý qajet. Oǵan qosa, bul ispen «Nur Otan» partııasynyń ókildigi aınalysýda, olarǵa mundaı faktilerdi jurt habarlap otyrady. Eger osyndaı eskertýler nazardan tys qaldyrylmaı, tekseris júrgizilip, is sońyna deıin jetkizilse, onda bul sybaılas jemqorlyqqa qarsy naqty is-qımyl bolady, – dedi Qazaqstan Prezıdenti.
Memleket basshysy jemqorlyqty joıý úshin jalǵyz agenttiktiń nemese quqyq qorǵaý organdarynyń kúshi jetkiliksizdigin, júıeli sharalar qajet ekenin atap ótti.
– Jyldan-jylǵa ekonomıkalyq, zańnamalyq jaǵdaılar jaqsara túsýde, tekserister sany qysqarýda. Sheneýnikter men turǵyndar arasynda baılanys azaıyp, eńbekaqy mólsheri artyp keledi. Osynyń bári sybaılas jemqorlyqqa qarsy turýǵa baǵyttalǵan. Kórsetkishterdi jasandy túrde kóterýdiń qajeti joq, sybaılas jemqorlyqqa qarsy barlyǵy sezinetin, naǵyz kúres júrgizilýi tıis, – dedi Nursultan Nazarbaev.
Agenttik tóraǵasy sybaılas jemqorlyqqa qarsy is-qımyl máseleleri boıynsha birqatar halyqaralyq jáne qazaqstandyq qoǵamdyq uıymdarmen yntymaqtastyq týraly aıtty jáne bul jumystar jalǵasatynyn málimdedi.
R.Túsipbekov agenttik óz jumysynyń birqatar baǵyttary boıynsha kórsetkishterdi jaqsartqanyn da baıandady.
– Bıylǵy jyldyń basynan beri sybaılas jemqorlyq qylmys jasaǵan 900 tulǵaǵa, sondaı-aq, memlekettik fýnksııalardy oryndaýǵa ýákiletti laýazymdy tulǵalar men olarǵa teńestirilgen tulǵalarǵa qatysty 1333 qylmystyq is qozǵaldy. Sonyń ishinde, respýblıkalyq jáne oblystyq deńgeıdegi 120-dan astam laýazymdy tulǵa jaýapkershilikke tartyldy. Kóleńkeli ekonomıka boıynsha, Sizdiń tapsyrmańyzǵa sáıkes, biz alkogoldiń, munaıdyń zańsyz aınalymyna, jalǵan kásiporyndarǵa qarsy kúresti kúsheıttik. Jalpy, 4652 qylmys anyqtaldy. Búginde osy jumystyń barlyǵy nátıjesin berýde, – dedi Ekonomıkalyq qylmysqa jáne sybaılas jemqorlyqqa qarsy kúres agenttiginiń tóraǵasy.
Kezdesý qorytyndysynda Memleket basshysy qaralǵan máseleler boıynsha birqatar naqty tapsyrmalar berdi.
