Jınalǵan qarajatqa kúndelikti qajet azyq-túlik túrleri satyp alynyp, óńirdegi kópbalaly jáne az qamtylǵan 1100 otbasyna taratylatyn bolady. Bir ereksheligi, qaıyrymdylyq aıasynda jasaqtalǵan azyq-túlik sebetine tek qana Batys Qazaqstan oblysy aýmaǵynda óndirilgen ónimder engen eken.
Aksııa Aq Jaıyq óńirindegi memlekettik qyzmetshilerdiń bastamasymen qolǵa alynǵan bolatyn. Bıylǵy pandemııanyń sebebinen jańajyldyq jıyn-toıdy, korporatıvtik keshterdi ótkizýden bas tartyp, oǵan ketetin qarajatty muqtaj jandarǵa taratsaq degen oıdy Oral qalasy men aýdandardaǵy memlekettik mekeme qyzmetkerleri de qoldaǵan. Odan bólek, respýblıkalyq baǵynystaǵy aýmaqtyq departamentter men ınspeksııa ókilderi, quqyq qorǵaý organdary qyzmetkerleri de qaıyrymdylyq aksııasyna qýana qosylǵan.
Sońǵy málimetke qaraǵanda Oral qalasyndaǵy mekeme qyzmetkerlerinen jınalǵan qarjy 5 mln 600 myń teńgege jetken. Oblystyń 12 aýdanynan 8 mln 450 myń teńge qarajat jınalǵan. Bul qarjyǵa alynǵan azyq-túlik jıyntyǵy shynaıy muqtaj otbasylarǵa taratylady. Oral qalasyndaǵy «El yrysy» kommýnaldyq bazarynda búgin oblys ortalyǵynda turatyn kópbalaly jáne az qamtylǵan otbasy ókilderi qaıyrymdylyq kómegin ala bastady.
