Almaty qalasyndaǵy «Jas Otaý» neke saraıynyń dırektoryna, esepshisi men bas mamanyna qatysty sot otyrysy keıinge qaldyryldy. Bul týraly «Astana» telearnasy habarlady.
Olarǵa «157 mıllıon teńgeni jymqyrdy» degen aıyp taǵylǵan edi. Atalǵan iske núkte qoıylýy kerek bolatyn. Sotqa kelgen burynǵy esepshi Nazym Mamyrhanovanyń qorǵaýshysy tergeý barysynda qarjy polısııasynyń qyzmetkerleri shyǵyn kólemin boljammen ǵana anyqtady dep otyr. «Jas otaý» neke saraıynyń qyzmetkerleri 2010-2012 jyldar aralyǵynda 2 myńnan asa juptyń neke qııý qarjysyn qaltaǵa basqan kórinedi. «Alaıda, ol ýaqyt aralyǵynda qansha otbasy shańyraq kótergeni tekserilmedi», - deıdi qorǵaýshynyń biri. Al sońǵy júrgizilgen saraptamada neke saraıynan 157 mln.emes, 16 mln. teńgeniń joǵalǵany kórsetilgen. Esterińizde bolsa, ótken jyldyń qazanynda qarjy polısııasy «Jas otaý» neke saraıynyń qyzmetkerlerine «qarjy jymqyrdy" degen aıyp taǵyp, qylmystyq is qozǵaǵan bolatyn. «Aıyptaýshy tarap sot prosesine kýágerlerdi qatystyrdy. Olardyń barlyǵy tyńdaldy. Barlyǵy aıyptalyp otyrǵandarǵa qarsy esh nárse aıtpady. Olar aqshalaryn tek kassaǵa ǵana ótkizgen. Biz endi zańdy sheshimdi kútemiz»,-deıdi N.Mamyrhanovanyń qorǵaýshysy Aıan Kárimhanov.
Baqytbek Keneshuly.
Derekkóz: «Astana» telearnasy
