Aldymen Amandyq Batalov óńirdiń áleýmettik-ekonomıkalyq damý erekshelikterine qysqasha toqtalyp, negizgi basym baǵyttary jaıly baıandady.
"Almaty oblysy – elimizdegi eń iri aımaqtyń biri. Jetisý óńiri eń aldymen agrarlyq aımaq. Degenmen ónerkásip salasy da qazir qarqyndy damyp keledi. Shaǵyn jáne orta bıznestiń de aıaq alysy jaqsy. Klımattyq jaǵdaıynyń jaılylyǵyna baılanysty jáne ınfraqurylymyn damytý jumystarynyń belsendi júrgizilýine oraı oblys týrıster tartýǵa óte qolaıly. Bizde Sharyn shatqaly, Alakól, Balqash, Kólsaı kólderi jáne basqa da kóptegen tamasha oryndar bar. О́ńirdiń taǵy bir erekshe baılyǵy – halqymyz kópetnosty. Bizde 100-den astam ult pen ulys ómir súredi, sol qatarda koreıler de bar. Olardyń árqaısysy óńirdiń damýyna atsalysyp keledi. Ultaralyq jáne konfessııaaralyq kelisimdi, tatýlyqty saqtaý – Elbasynyń jáne Prezıdenttiń ustanǵan memlekettik saıasatynyń negizgi basymdyǵy. Tutas alǵanda bizde ınvestısııalyq klımat óte qolaıly. Sondyqtan eki jaqty yntymaqtastyqty damytýǵa negiz bolatyn ortaq mańyzdy salalar týraly keńinen talqylaýymyzǵa bolady", dedi A. Batalov.
О́z kezeginde Kım Hyn Sý jyly qabyldaýǵa rızashylyǵyn bildirdi. Ol óz sózinde Almaty oblysynda 15 myńnan astam etnıkalyq koreıler turatynyn tilge tıek etti. О́ńirmen dostyq qarym-qatynastar ornatylǵan. Bul oraıda medısına salasyndaǵy yntymaqtastyqty aıtýǵa bolady. 2018 jyly Ońtústik koreıalyq "Hıonde" klınıkasy Taldyqorǵan qalalyq kópsalaly aýrýhanasymen ózara yntymaqtastyq týraly memorandým jasasqan.
Áńgimelesý barysynda eki jaqty baılanystardyń negizgi baǵyttary belgilendi.
Amandyq Batalov birinshi kezekte densaýlyq saqtaý salasyndaǵy baılanystardy odan ári keńeıtýdi usyndy.
"Birlesken klınıka ashylsa, jaqsy bolar edi. Ony ne Taldyqorǵan óńirinen, ne Almaty óńirinen ashýdy qarastyrýǵa bolady. Biz óz tarapymyzdan qajetti qoldaý kórsetemiz. Oblys turǵyndary úshin mundaı zamanýı klınıkanyń ashylýy qolaıly ári paıdaly bolar edi. Elektronıka óndiretin ónerkásip ornyn qurýǵa bolady. Týrızm salasynda yntymaqtastyq ornatyp, mádenı baılanystar aıasyn keńeıtýge bolady. Osy tórt baǵyt bizdiń eki jaqty ózara tıimdi baılanystarymyzdy ilgeriletedi dep oılaımyz", dedi A.Batalov.
Bas konsýl da oblys basshysynyń bul usynystary tıisti laýazymdy tulǵalarǵa jetkizilip, talqylanatynyna sendirdi. Jáne kezdesýde qos taraptan konstrýktıvti dıalog bolǵany úshin alǵysyn bildirdi. Amandyq Batalov jıyndy qorytyndylap, yntymaqtastyq aıasyn odan ári keńeıtýge daıyn ekendigin jetkizdi.
Eske salsaq, Ońtústik koreıalyq "Hıonde" kompanııasymen 2018 jyly memorandým jasalǵan. Sol kezden beri Taldyqorǵan qalalyq kópsalaly aýrýhanasynyń bazasynda "Hıonde" klınıkasynyń mamandary qaıyrymdylyq aksııalaryn ótkizip júr. Travmatologııa, ortopedııa, hırýrgııa, kardıologııa, nevrologııa, terapııa, ÝZI-dıagnostıka baǵyttarynda pasıentter qabyldaýy júrgiziledi. Sońǵy 2 jylda Taldyqorǵan qalasynda jáne Qaratal aýdanynda 2700-deı adam tegin qaralǵan, 1200 adam em qabyldaǵan, 37 operasııa jasalyp, dárigerler úshin 60 master-klass ótkizilgen. Bul jumystar kelesi jyly da jalǵastyrylady.
