Atap aıtqanda, depýtattar memlekettik satyp alý máseleleri boıynsha zań jobany birinshi oqylymda maquldady. Osyǵan oraı, Májilis Tóraǵasy Nurlan Nyǵmatýlın zańǵa engizilgen normalar memlekettik satyp alýdyń tıimdiligin arttyrýǵa, eń bastysy – sybaılas jemqorlyqty tómendetetinin aıtty. Sondaı-aq, Nurlan Nyǵmatýlın memlekettik satyp alý salasynda basshylardyń qyzmetin mindetti reıtıngtik baǵalaý zań deńgeıinde bekitiletinine nazar aýdardy. Ol eń aldymen, memleket múddesin saqtaı otyryp, ashyq jumys isteýge jol ashady.
Aıta ketý kerek, qazirgi zańda jetkizýshilermen tikeleı shart jasap, bir kózden satyp alý qarastyrylǵan. Bul normalardy depýtattar tapsyrys berýshige memlekettik satyp alýda básekelestik ádisteri taýsylǵan kezde ǵana qoldanýǵa bolady dep tolyqtyrdy. Buny oryndamaǵan basshylar 100 aılyq eseptik kórsetkish kóleminde jaýapkershilikke tartylatyn bolady.
Sonymen qatar jalpy otyrysta Palata atom energııasyn paıdalaný týraly zań jobasyna engizilgen túzetýlerdi maquldady. Qujatty talqylaý barysynda jumys toby Qazaqstan Respýblıkasynyń atom energııasyn paıdalaný salasyndaǵy zańnamasynyń talaptaryn buzýshylyqtardy anyqtaý jaǵdaılary, qyzmetin ıadrolyq qondyrǵylarmen jáne yqtımal radıasııalyq qaýiptiligi I jáne II sanattaǵy obektilermen júzege asyratyn sýbektilerge tekserý júrgizý, atom energııasyn paıdalaný salasyndaǵy qyzmetti lısenzııalaý tártibi jáne taǵy basqalaryna qatysty usynystar engizdi. Búgingi jalpy otyrysta birqatar ratıfıkasııalyq zań jobalary maquldandy.
Atap aıqanda, «О́lim jazasynyń kúshin joıýǵa baǵyttalǵan Azamattyq jáne saıası quqyqtar týraly halyqaralyq paktige ekinshi Fakýltatıvtik hattamany ratıfıkasııalaý týraly» zań jobasy. Hattama Qazaqstan Respýblıkasynyń ólim jazasynyń kúshin joıý boıynsha halyqaralyq mindettemelerdi qabyldaýyna baǵyttalǵan. Atalǵan qujattyń 2-babynyń 1-tarmaǵynda soǵys ýaqytynda jasalǵan áskerı sıpattaǵy asa aýyr qylmystar jasaǵany úshin kináli dep tanylǵannan keıin soǵys ýaqytynda ólim jazasyn qoldanýdy kózdeıtin, ratıfıkasııalaý nemese qosylý kezinde jasalǵan eskertpeni qospaǵanda, osy Hattamaǵa eshqandaı eskertpelerge jol berilmeıtini kózdelgen. Qazaqstan Hattamaǵa kórsetilgen eskertpemen qosylyp otyr. Ratıfıkasııalanǵan qujattardyń qatarynda TMD qatysýshy memleketterdiń ıadrolyq avarııa nemese radıasııalyq avarııalyq ahýaldyń týyndaý jaǵdaıyna daıyndyqty jáne olardyń zardaptaryn joıý kezindegi ózara kómekti qamtamasyz etý boıynsha ózara is-qımyly týraly kelisimdi ratıfıkasııalaý týraly zań jobasy bar.
Sonymen qosa, Eýrazııalyq ekonomıkalyq komıssııanyń básekelestiktiń biryńǵaı qaǵıdalarynyń saqtalýyn baqylaý jónindegi ókilettikterdi júzege asyrýy kezinde qupııa aqparatty qorǵaý tártibi jáne ony jarııa etkeni úshin jaýaptylyq týraly kelisimge Armenııa Respýblıkasynyń qosylýy týraly hattamany ratıfıkasııalaý týraly zań jobasy maquldandy.
Sondaı-aq búgin Eýrazııalyq ekonomıkalyq odaqtyń Keden kodeksi týraly shartqa ózgerister engizý týraly hattamany ratıfıkasııalaý týraly, sonymen qatar Qazaqstan men Halyqaralyq qarjy korporasııasy arasyndaǵy Qazaqstan Respýblıkasynda ofıster qurý jáne olardyń qyzmeti týraly kelisimdi ratıfıkasııalaý týraly zań jobalary maquldandy.
Búgin depýtattar «Jer qoınaýy jáne jer qoınaýyn paıdalaný týraly» Qazaqstan Respýblıkasynyń Kodeksine ýran óndirý máseleleri boıynsha ózgerister men tolyqtyrýlar engizý týraly» zań jobany ekinshi oqylymda maquldady. Palata asyl tuqymdy mal sharýashylyǵy máselelerine qatysty zań jobalarymen jumysty jalǵastyrý týraly usynyspen kelisti. Jalpy otyrysta depýtattar birshama zań jobalaryna Senat engizgen tolyqtyrýlarmen kelisti. Olar: Qazaqstan Respýblıkasynyń keıbir zańnamalyq aktilerine Memleket basshysynyń Joldaýynyń jekelegen erejelerin iske asyrý máselesi boıynsha jáne ekonomıkalyq ósýdi qalpyna keltirý men ekologııa jáne aqparat máselelerine qatysty zań jobalary.
Jalpy otyrysta Májilis jyljymaıtyn múliktiń biryńǵaı memlekettik kadastry sheńberinde memlekettik kórsetiletin qyzmetterdi sıfrlandyrý máseleleri týraly zań jobasyn jumysqa aldy. Sondaı-aq, jalpy otyrysta depýtattar Májilis Reglamentine tolyqtyrýlar engizdi. Ol Parlamenttik oppozısııa týraly zańnamany iske asyrýǵa baǵyttalǵan.
