«2020 jyldyń qarasha aıynda Qazaqstannyń Densaýlyq saqtaý mınıstrligi men «Reseıdiń tikeleı ınvestısııalar qory» memlekettik kompanııasynyń (RTIQ) mamandary Qazaqstannyń farmasevtıkalyq kásiporyndaryn aralap, vaksınany óndirý men transfer tehnologııasyn tezirek iske asyrýǵa daıarlyq barysyn zerttegen bolatyn. Solardyń ishindegi saqadaı-saı daıyny biz bolyp shyqtyq. Izinshe Qazaqstannyń Densaýlyq saqtaý mınıstrligi men «Reseıdiń tikeleı ınvestısııalar qory» memlekettik kompanııasynyń jumys toby quryldy. Jeltoqsan aıynyń basynda transfer tehnologııasy úderisin bastadyq. Reseıden mamandar keldi. Biz barynsha daıyndaldyq, kadrlardy oqyttyq, jabdyqtardy iske qostyq. Qazir aldaǵy ýaqytta serııalyq óndiristi jolǵa qoıý úshin basqa da qajetti jabdyqtardy satyp alyp jatyrmyz», dedi S.Baron.
Keshen basshysynyń aıtýynsha, jeltoqsan aıynyń 21-i kúni shyǵarylǵan «Spýtnık V» vaksınasynyń tájirıbelik úlgisi sapa baqylaýyn júrgizý úshin Reseıge jóneltilgen. Kórshi elde atalǵan ónimdi ázirlegen top bir aı boıy jan-jaqty sapa baqylaý jumystaryn júrgizedi. Odan keıin Densaýlyq saqtaý mınıstrligine ótinim joldanyp, vaksınany Qazaqstanda tirkeý týraly sheshimniń taǵdyry tarazyǵa túsedi. Sátin salyp bári ońynan bolyp jatsa, onda el kútken ekpe óndiristik aýqymda shyǵaryla bastaıdy.
«Spýtnık V» ekpesi álem boıynsha koronavırýs ınfeksııasynyń aldyn alýǵa arnalǵan tuńǵysh tirkelgen vaksına eken. Preparat Reseı Densaýlyq mınıstrliginiń N.Gamaleıa atyndaǵy Epıdemıologııa jáne mıkrobıologııa ulttyq zertteý ortalyǵynda ázirlenipti. Mamandar ekpeniń adamnyń adenovırýs vektory negizinde ázirlengenin aıtady. Negizinde adenovırýstyq vektorlar tolyqtaı qaýipsiz bolyp sanalady jáne olardyń genetıkalyq jetildirý úshin de asa qolaıly ekenin aıta ketken lázim.
Ekpege 1957 jyly ǵaryshqa tuńǵysh sapar shegip, kosmos álemin zertteýge serpin bergen «Spýtnık-1» jer seriginiń ataýy berilipti.
Aıta ketelik, jýyrda Úkimet basshysy Asqar Mamın Qaraǵandy oblysynda jumys saparymen bolǵan kezde «Qaraǵandy farmasevtıkalyq kesheni» JShS-na at shaldyryp, reseılik «Spýtnık V» vaksınasy óndirisiniń tusaýkeser rásimine qatysqan bolatyn. Atalǵan joba Memleket basshysy Qasym-Jomart Toqaev pen Reseı prezıdenti Vladımır Pýtınniń arasyndaǵy ýaǵdalastyq aıasynda júzege asqan edi. Farmasevtıkalyq keshen jumysymen tanysqan kezinde Úkimet basshysy Qazaqstanda óndirilgen «Spýtnık V» vaksınasyn jappaı egý 2021 jyldyń aqpan aıynan bastalatynyn málim etken bolatyn. «Birinshi kezekte ekpe medısına qyzmetkerleri, pedagogter, stýdentter, quqyq qorǵaý organdarynyń qyzmetkerleri, medısınalyq-áleýmettik mekemelerdiń kontıngenti, sondaı-aq sozylmaly aýrýlary bar qaýiptilik toptarynyń ókilderine erikti negizde salynady», dep málimdegen-di A.Mamın.
