Ázirbaıjan Mádıuly – ulttyq teatr óneri men rejıssýrasyna ólsheýsiz úles qosqan qaıratker tulǵa. Kózi tirisinde-aq aıryqsha shyǵarmashylyq kózqaras, jańashyl oılarymen teatr áleminde esimi ańyzǵa aınalǵan daryn ıesiniń, ásirese astananyń óneri men mádenıetin damytýdaǵy eńbegi eren. Bas qalanyń Q.Qýanyshbaev atyndaǵy akademııalyq qazaq mýzykalyq drama teatryna 1999 jyly Elbasy Nazarbaevtyń arnaıy shaqyrýmen kelip, sol kezdegi adymyn apyl-tapyl basqan jas teatrdyń kórkemdik turǵydan bıik deńgeıge kóterilýine zor eńbek sińirdi. Talaı býyn ártisterdi tárbıelep, óziniń shyǵarmashylyq hám ustazdyq sara jolyn qalyptastyrdy. Búginde ańyz rejısserdiń sol bir ólsheýsiz eńbegi bas shahar ákimdigi tarapynan baǵalanyp, qaıratker tulǵanyń taǵylymdy joly osylaısha ulyqtaldy.
Saltanatty jıynǵa qala ákimi Altaı Kólginov, Ázirbaıjan Mámbetovtiń jary, Qazaqstannyń halyq ártisi, belgili opera ánshisi Qorlan Qalılambekova, rejısserdiń týystary men elordanyń óner qaıratkerleri, sonymen qatar bas qaladaǵy teatrlardyń dırektorlary qatysty. Elorda basshysy málim etkendeı, Nomad teatry endi «Ázirbaıjan Mámbetov atyndaǵy drama jáne komedııa teatry» resmı ataýyna ıe boldy.
Resmı ashylýdan keıin teatr ujymy kórermen nazaryna Abaı Qunanbaıulynyń 175 jyldyǵyna arnalǵan «Jas Abaı» dramasynyń premerasyn usyndy. Qoıylym rejısseri – Qazaqstannyń eńbek sińirgen qaıratkeri Nurlan Jumanııazov.
Eske sala ketsek, Nomad teatry – elordamyzda boı kótergen mádenıet oshaqtarynyń biri. Qazirgi tańda teatr talantty ári ónerli qyz-jigitterdiń basyn biriktirip, bas shahar turǵyndary men qonaqtaryna memlekettik tilde ártúrli janrdaǵy spektaklder men qoıylymdardy usynyp, elimizdiń mádenı damýyna úlesin qosyp kele jatqan talanttar ordasy.
Endi mine, 2020 jyldyń 18 jeltoqsanynan bastap resmı túrde «Ázirbaıjan Mámbetov atyndaǵy drama jáne komedııa teatry» ataýyna ıe bolǵan óner ordasynyń alǵa qoıǵan maqsaty men shyǵarmashylyq jospary kóp. Basqany aıtpaǵanda, teatrǵa Ázirbaıjan Mámbetov esiminiń berilýi jas ujym úshin úlken jaýapkershilik júkteıtini sózsiz.
