Mektepterdegi zorlyq-zomblyqtyń aldyn-alý boıynsha standartty operasııalyq sharalardy ázirleý aıaqtaldy. Bul elimizdegi balalarǵa qatysty zorlyq-zombylyqtyń barlyq formalaryna jedel den qoıý men aldyn-alýdyń biryńǵaı saıasatyn retteýshi qujat. Joba Nazarbaev Zııatkerlik mektepteriniń halyqaralyq akkredıtteýge sáıkes keletin normatıvti-quqyqtyq qujattardy ázirleýdegi tájirıbesi negizinde júzege asyryldy.
Standartty operasııalyq sharalar jumys tobynyń qorytyndy úılestirý jıynynda tanystyryldy.
– Alǵashqy kezdesýde Qazaqstan Respýblıkasyndaǵy BUU (IýNISEF) Balalar qorynyń ókili Artýr van Dızen men Qazaqstan Respýblıkasyndaǵy bala quqyqtary jónindegi ókil Arýjan Saın jańa qujatty ázirleýdegi basty qaǵıdattardy qoldaǵan bolatyn. Jobalaý toby balalarǵa qaýipsiz jáne ıgilikti orta qurýda ekinshi kezektegi suraqtar joq ekendigine senim bildirdi, – deıdi «Nazarabaev Zııatkerlik mektepteri» DBBU basqarma tóraıymynyń orynbasary Olga Mojaeva.
– Jańa qujatty ázirleýdegi basym baǵyttar balalarǵa qatysty zorlyq-zombylyqqa birden den qoıý emes, onyń aldyn alý, – deıdi Nazarbaev Zııatkerlik mektepteriniń IýNISEF-pen birlestikte ázirlenetin barlyq jobalarynyń úılestirýshisi, oqýshylardyń ıgiligin qamtamasyz etý departamentiniń dırektory Dınara Ýalkenova.
Standartty sharalardy pedagogterdiń, psıhologtardyń, ata-analardyń, bilim, densaýlyq saqtaý jáne ishki ister mınıstrligi ókilderiniń, barlyq qyzyǵýshylyq tanytqan qurylymdardyń áreketine jetekshilik dep tanýǵa bolady.
– Balalarǵa qatygezdik tanytýdyń jiktemesi qurylyp, sebepteri men faktorlary, belgileri sanamalandy, áleýetti qaýip-qaterleri taldanyp, jekelegen jáne toptyq dıagnostıkalaý quraldary usynyldy, jaýaptylyq tásilderi men baqylaý ındıkatorlary saralandy, ońaltý algorıtmderi aıtyldy, – dep jobanyń ulttyq sarapshysy, oqýshylardyń ıgiligin qamtamasyz etý departamenti dırektorynyń orynbasary Kúlásh Salımbaeva pikir bildirdi.
Jumys toby balalarǵa qatysty zorlyq-zomblyqqa den qoıý men aldyn-alý boıynsha standartty operasııalyq sharalardy elordadaǵy №24 mekteptiń bazasynda tekserýden ótkizdi. Testileýdiń dızaınyn, ádistemesi men nátıjelerin jobanyń baǵdarlamalyq sarapshysy Janat Altaev pen bilim sapasyn baǵalaý jáne halyqaralyq akkredıtasııa departamentiniń aǵa menedjeri Danara Abıldenova tanystyrdy:
– Jobalaý tobymen 150-den asa adamǵa, onyń ishinde muǵalimder men mektep ákimshiligine, ata-analardyń kóp bóligine oqytý júrgizildi. Baqylaý málimetteri zorlyq-zombylyqtyń belgilerinen habardar bolý, jaýapkershilikti uǵyný men áleýetti den qoıý sekildi basym kórsetkishterde ındıkatorlardyń ózgeriske ushyraǵanyn rastady.
Qujat avtorlary qashyqtan rejımi aıaqtalǵan soń tekserýden ótkizý aýqymyn keńeıtýdi jáne Standartty sharalardyń jyl saıynǵy aýdıtin ótkizýdi usyndy.
Jıynǵa qatysýshylar, sondaı-aq, respýblıkanyń jalpy bilim beretin mektepterine bilim sapasyn baǵalaý jáne halyqaralyq akkredıtasııa departamenti dırektorynyń orynbasary Indıra Ismaılova usynǵan jańa saıasatty engizý strategııasyn talqylady.
Qazaqstan Respýblıkasyndaǵy IýNISEF ókili Tatıana Aderıhına elde balalarǵa ıgilikti jáne dostas orta qurýdaǵy NIS jobalaý tobynyń aıryqsha qyzyǵýshylyǵy men kásibıligin joǵary baǵalap, balalarǵa qatysty zorlyq-zombylyqqa den qoıý men aldyn alýdyń standartty operasııalyq sharalaryn taratý jáne mektepterge arnalǵan oqý baǵdarlamasyn paıdalanýdy qoldaý týraly jumystardy jalǵastyrýdy usyndy.
Balalarǵa qatysty zorlyq-zombylyqqa jedel den qoıý men aldyn-alýdyń standartty operasııalyq sharalaryn retteýshi jańa qujat Nazarbaev Zııatkerlik mektepteriniń avtorlyq ujymymen IýNISEF-tiń Qazaqstandaǵy keńsesine, sondaı-aq, Bilim jáne ǵylym mınıstrligine joldanady.
