Petropavl qalasynyń turǵyny eki ulynyń joǵalǵanyn aıtyp, 102 arnasyna júgingen. Alty jáne jeti jasar balalar mektepten óz betterimen ketip qalǵan.
«Mazasyzdanǵan áıel polısııaǵa habarlasyp, dabyl qaqqan. Izdeýge polıseıler jedel kirisip, mektepke barady. Abyrjyǵan ana men muǵalimi patrýldik polıseılermen birlese oblys ortalyǵy kóshelerine izdeýge shyǵady. Aǵaly-inilini Maıakovskıı kóshesi boıyndaǵy jer úılerdiń mańaıynda anyqtady. Balalar shoshyp qalǵan, jylaǵan. Analaryn kórgen olardyń qýanyshtarynda shek bolmady. Abyroı bolǵanda, barlyǵy jaqsy aıaqtaldy», – deıdi Petropavl qalasy PB patrýldik polısııa batalonynyń ınspektory Shymbolat Ýaısov.
Polıseıler mundaı oqıǵalar jıi oryn alatynyn aıtady. Qazan aıynda segiz jastaǵy qyz dúrbeleńge saldy. Tańerteń dúkenge shyǵyp, óz betimen úıine qaıtpaǵan. Ony izdeýge polıseıler men eriktiler tartyldy. Qyzmetkerler qyz balany úıinen alys jerden tapty.
«Balalar dostaryna oınaýǵa ketip, qoldarynda telefondary bolmaı, ata-analaryn eskertýge umytyp jatatyn jaǵdaılar da kezdesedi. Bıylǵy oqý jylynyń basynan barlyǵy 25 bala izdep tabyldy. Negizinen jasóspirimder. Olardyń barlyǵy kezekshi táýlikte úılerine qaıtaryldy», – deıdi SQO PD Krımınaldyq polısııa basqarmasy.
