Maqtaaral aýdanynda «PÝID-2» jobasy jalpy 39796 gektar aýmaqty qamtyp, 3 baǵyt boıynsha iske asyrylýda. Joba aıasynda 223 kanal, 208 sý qashyrtqysy, 149 tik drenaj kúrdeli jóndeýden ótip, qaıta qalpyna keltiriletin bolady.
Jobanyń I baǵyty boıynsha ázerbaıjandyq «Akılık Grýp» kompanııasy qurylys jumystaryn júrgizip jatyr. Qazirgi tańda jalpy uzyndyǵy 68,88 shaqyrymdy quraıtyn 44 kanaldyń, 2 tik drenajdy uńǵymanyń, 37,293 shaqyrymdy quraıtyn 16 qashyrtqynyń qurylys jumystary aıaqtalǵan.
I baǵyt boıynsha joba tolyq júzege asqanda Eńbekshi aýyldyq okrýginiń 5350 gektary, Jańajol aýyldyq okrýginiń 2650 gektary jáne Myrzakent kentiniń 8000 gektar aýmaǵy jer asty sýlarynan tazaratyn bolady.
Iirjar aýyldyq okrýginiń 7581 gektary, Birlik aýyldyq okrýginiń 4575 gektary jáne Jambyl aýyldyq okrýginiń 4291 gektar alqabyn jer asty sýlarynan tazartý II baǵyt boıynsha iske asyrylýda. Ol úshin ırandyq «Týnnel Saad Arıana» kompanııasy qurylys jumystaryn qarqyndy júrgizýde.
Qazirgi tańda jalpy uzyndyǵy 57,806 shaqyrymdy quraıtyn 35 kanaldyń qurylys jumystary aıaqtaldy. 93 dana baqylaý uńǵymasynda qurylys jáne 61 dana tik drenajdy uńǵymalarynda burǵylaý jumystary sońyna jetti.
Jalpy II baǵyt boıynsha 16447 gektar aýmaqtaǵy uzyndyǵy 337,35 shaqyrymdy quraıtyn K-16B, K-18, K-18A kanaldary tarmaqtarymen birge, 100 dana tik drenaj jáne 262 shaqyrymdy quraıtyn sý qashyrtqylary kúrdelý jóndeýden ótip jatyr.
PÝID-2 jobasynyń III baǵyty boıynsha ızraıldik «Tahal Konsaltıng Injınırıng» komanııasy uzyndyǵy 307,928 shaqyrym kanaldy, 130,391 shaqyrym sý qashyrtqylaryn kúrdeli jóndeýden ótkizýde.
Búginde III kezeń boıynsha 26,912 shaqyrymdy quraıtyn 8 kanaldyń 8,979 shaqyrymynda beton quıý jumystary júrgizilgen. Sonymen qatar, jalpy uzyndyǵy 56,109 shaqyrymdy quraıtyn 8 dana qashyrtqynyń 50,583 shaqyrymynda tazalaý jumystary atqarylǵan.
Aıta keteıik, aýdan basshysy qurylysy júrip jatqan kanaldar men aryq-atyzdardy aralaý barysynda oryn alyp jatqan keıbir kemshilikter boıynsha tıisti sala basshylaryna tapsyrma berdi.
