Áleýmettik jobanyń maqsaty jasóspirimderdiń reprodýktıvti densaýlyǵynyń erekshe qajettilikterin qanaǵattandyrý úshin medısına qyzmetkerleriniń biliktiligin arttyrý boldy, dep habarlaıdy Mańǵystaý oblystyq densaýlyq saqtaý basqarmasynyń baspasóz qyzmeti.
Medısına qyzmetkerlerin oqytýǵa respýblıkalyq deńgeıdegi sarapshylar shaqyryldy: Nur-Sultan qalasynan medısına ǵylymdarynyń kandıdaty, «Bolashaq» baǵdarlamasynyń stıpendıaty, «University Medical Center» KQ Respýblıkalyq dıagnostıkalyq ortalyǵynyń gınekologııa bóliminiń meńgerýshisi, Almaty qalasynan jáne oblys ortalyǵynan qazaqstandyq jynystyq jáne reprodýktıvti densaýlyq qaýymdastyǵynyń halyqaralyq sarapshysy, Eýropalyq kontrasepsııa jáne reprodýktıvti densaýlyq qoǵamynyń dırektorlar keńesiniń múshesi. Jasóspirimderge keńes berý úshin erte jastaǵy reprodýktıvti densaýlyq negizderi týraly nusqaýlyq shyǵaryldy.
Joba aıasynda 20 gınekologqa arnalǵan jasóspirimderdiń reprodýktıvti densaýlyǵynyń klınıkalyq erekshelikteri men kommýnıkatıvti quzyrettiligin arttyrý trenıngi jáne mektep medbıkelerimen joǵarǵy synyp oqýshylar arasynda reprodýktıvti densaýlyq negizderi boıynsha aqparattyq is-sharalar júrgizý jóninde 5 oqytý sessııalary ótkizildi. Jobanyń qatysýshylary Aqtaý, Fort-Shevchenko qalalarynyń, Baýtıno, Quryq jáne Boranqul aýyldarynyń medısınalyq qyzmetkerleri boldy.
Medısına qyzmetkerleriniń biliktiligin arttyrý jasóspirimderge kórsetiletin medısınalyq kómektiń sapasyna jáne olardyń ári qaraı damýyna áser etedi.
«Onlaın formatqa qaramastan, trenıng tek dáris oqýmen shektelmeı belsendi dıalogta ótti. Alǵan bilimiz úshin alǵysymdy aıtamyn. Biz kóptegen paıdaly aqparat aldyq, oqýshylarmen kúndelikti jumysymyzda kezdesetin suraqtarǵa, keıde ózimiz bilmeıtin balalardyń suraqtaryna durys jaýaptar aldyq», dep bólisti Aqtaý qalasyndaǵy №7 orta mekteptiń medbıkesi Zúlfııa Kıbasheva.
Jobany Mańǵystaý oblysyndaǵy áleýmettik ınvestısııalar baǵdarlamasy sheńberinde «Teńizshevroıl» JShS-niń qarjylyq qoldaýymen «Aqbóbek» jeke mekemesi júzege asyrdy.
TShO-nyń áleýmettik ınvestısııalar baǵdarlamasy jergilikti qoǵamdastyqtyń qajettilikterin qanaǵattandyrý úshin jasaqtalǵan. Kompanııa óz aldyna áleýmettik ınvestısııalar arqyly óńirdiń ekonomıkalyq damýyn yntalandyrý, bilim berý men oqytýdyń qol jetimdiligi men sapasyn arttyrý, sondaı-aq halyq densaýlyǵyn jaqsartý mindetin qoıady.
«Medısınalyq qyzmetterdiń qol jetimdiligi men sapasyn jaqsartý jáne densaýlyq pen aýrýdyń aldyn alý týraly aqparat TShO-nyń Áleýmettik ınvestısııalar baǵdarlamasyndaǵy maqsattardyń biri bolyp tabylady. Biz osyndaı jasóspirimder men jastardyń reprodýktıvti densaýlyǵyn qorǵaý jónindegi jobany qoldap otyrǵanymyzǵa qýanyshtymyz, óıtkeni bunyń áleýmettik mańyzdylyǵy zor jáne kelesi jyldardaǵy demografııalyq prosesterge tikeleı áser etetin bolady. Sonymen qatar, 2018-2020 jyldar aralyǵynda «Teńizshevroıl» JShS Mańǵystaý oblysynyń aýmaǵynda 13 áleýmettik jobany, onyń ishinde densaýlyq saqtaý salasynda jalpy somasy 2,2 mln AQSh dollaryn quraıtyn 2 jobany júzege asyrǵanyn atap ótkim kelip otyr», dep tolyqtyrdy Rzabek Artyǵalıev, TShO úkimetpen jáne jurtshylyqpen baılanys bóliminiń bas menedjeri.
