«Serpindikter» negizinen pedagog-ǵalymdar, aqparattyq tehnologııalar, qurylys ınjenerleri jáne aýyl sharýashylyǵy mamandyǵy sııaqty 35 bilim berý baǵdarlamasy boıynsha oqyp jatyr. Jastar sergek, áńgimelesip, pikir almasyp, belsendilik kórsetip turady. Olardyń 60 paıyzǵa jýyǵy – Túrkistan oblysynan kelgen jastar. Sonymen qatar 61 jas – Qyzylorda oblysynyń týmasy, 42-si – Almaty oblysynan kelgender. Jambyl men Mańǵystaý oblysynyń árqaısysynan 14 jastan oqyp jatyr.
«Serpindikterdiń» soltústikke alǵashqy qadamy 2014 jyly bastalǵan. Sol jyly túskenderden 2018 jyly 127 jas ýnıversıtetti 10 mamandyq boıynsha bitirip, dıplom alǵan. «Azamattarǵa arnalǵan úkimet» memlekettik korporasııasynyń derekteri boıynsha búgingi tańda olardyń 101-i eńbek etip júr. Osy jastyń bári túrli qyzmet istep, zeınetaqy qoryna aýdarym jasaıdy eken.
2019 jyly 11 pedagogıkalyq jáne 6 tehnıkalyq mamandyq boıynsha 245 «serpindik» stýdent dıplom alǵan. Qazir olardyń ishinen 162-si túrli qyzmet atqaryp júr. Qalǵandary naqty jumysqa turmaǵan. Al magıstratýraǵa túsken 22 túlektiń 10-y Soltústik Qazaqstan ýnıversıtetinde oqıdy.
Bıyl ýnıversıtet qabyrǵasyn 203 «serpindik» túlek bitirdi, sonyń 42-si Soltústik Qazaqstan oblysynda túrli jumystarǵa ornalastyryldy. Al 10-y Qyzyljar qalasynyń ózine jumysqa turdy. Bıylǵy ýnıversıtet bitirgen jastardyń oqýǵa yntasy zor bolǵandyǵyn olardyń arasynan 92 adamnyń magıstratýraǵa túskeninen-aq baıqaýǵa bolady.
Karantınniń kesirinen «serpindik» jastardyń jergilikti halyqpen, aqsaqaldar uıymymen, aqyn-jazýshylarmen kezdesýleri, ónerli jastarmen aralasýlary tym sırek. Biraq belsendi jastar ýnıversıtet pen qala ómiriniń mádenı sharalaryna qatysyp otyrady. Máselen, Arýaı Aıtbekova stýdent jastar arasyndaǵy aıtysqa qatysyp, júldeli oryn alǵan. Roza Qabyl degen qyz bala da Maǵjan Jumabaevtyń 125 jyldyǵyna arnalǵan konkýrsqa qatysyp, júldeger bolypty.
«Serpindik» jastar arasyndaǵy tártip, mádenı tárbıe máselelerine kóp kóńil bólinedi. Ýnıversıtettiń osy jumystary mindetine júktelgen prorektor Nurlan Báıimbetov túrli baǵdarlamalyq sharalar uıymdastyrady. Máselen, Soltústik Qazaqstan jastarynyń Bastamashylyq ortalyǵynyń kóshbasshylaryn munda jıi shaqyryp, jastarmen kezdesýler ótkizedi. Sonymen qatar Din isteri jónindegi bólimniń qyzmetkerleri, Sybaılas jemqorlyqqa qarsy is-qımyl departamentiniń mamandary da munda kelip, áńgimelesip turady. Merekelik konsertter men konkýrstar da uıymdastyrylady. Máselen, jýyrda Táýelsizdik kúnine oraı jastar arasynda patrıottyq ánderdiń konkýrsy bolǵan. Osyndaı sharalarǵa Symbat Seıitqasymova, Ońǵar Jantóre, Aqmaral Sattar, Sara Sársembaı, Baqdáýlet Samatuly, Danııar Abdrasýlla jáne basqa da belsendiler qatysyp, túrli sharanyń basy-qasynda júrdi.
О́mir bolǵan soń adamnyń jeke basyndaǵy ózgeristerdiń bolýy da zańdylyq. Qazir mundaǵy «serpindik» jastar arasynda 13 jup otaý tikken. Stýdenttik jyldarda otbasyn quryp, úı bolyp ketkenderdiń aldy da, sońy da bular emes. Sondyqtan ýnıversıtet ákimshiligi olardyń jaǵdaılaryna túsinistikpen qarap, qoldan kelgen kómekterin jasap turady.
Eń bastysy, azamattardyń soltústikti jersinip, osynda tamyr jaıyp ketýi. Bizben kezdesken jastar ózderine teristiktiń unaıtynyn jetkizdi. Mamandyq alǵan soń óz baqytymdy osy jerdiń topyraǵynan tabýǵa tyrysamyn degen jastar kóp boldy.
Soltústik Qazaqstan oblysy
