Otandyq óndirýshini qoldaý qajet

QHP músheleri qazaqstan­dyq kompanııalar usynatyn dúken sórelerindegi barlyq taýar túrlerin qarap, zerdelep shyqty. «Halyqtykin satyp al» aksııasynyń aıasynda depý­tattyqqa kandıdattar qazaq­­standyq óndirýshilerdiń ónimderin satyp aldy.

Qazaqstan Halyq partııa­synyń músheleri jergilikti taýarlardyń qunyn kótermeý kerek dep sanaıdy. Mundaı ónimderdiń baǵasyn ýákiletti organdar baqylaýy kerek. Sebebi azyq-túlik baǵasynyń kúrt kóterilgen kezderi týraly buǵan deıin de az aıtylǵan joq. Alaıda keıbir otandyq ónim­derdiń baǵasy qymbat ekenin qarapaıym halyq jaqsy biledi. «Qazaqstanda jasalǵan» degen belgi soǵylǵan taýarlardyń ımport ónimderinen sál de bolsa baǵasy joǵary ekeni jıi aıtylyp júr.

О́z otanymyzda óndirilip, ol taýardy tutynýshylar da óz azamattarymyz bolǵan soń ónimdi pálendeı qymbatqa satýdyń da jóni joq sekildi. Degenmen, keı óndirýshiler kóp ónim shyǵaryp kóp qarajatqa kenelýdiń ornyna az ónimmen-aq kóp paıdaǵa kenelgileri keletin sekildi. Mine, osyndaı olqylyqtyń orny tolmaıynsha otandyq ónimniń alǵa basa qoıýy qıyn. Qarapaıym tutynýshylardyń qaı-qaısysy bolsyn otandyq óndirýshini qoldaýǵa daıar. Tek, baǵany qym­battatyp, kóńilge kirbiń uıala­typ almaý kerek.

– Bıyl pandemııa kezinde biz úlken máselege tap boldyq. Ol – otandyq óndirýshilerdiń ónimderi men qajetti taýarlar baǵasynyń ósýi. Bir lıtr ósimdik maıynyń baǵasy 700 teńgege deıin kóterilgenin bárimiz kórdik. Aıta ketý kerek, biz otandyq óndirýshiniń ónimi týraly aıtyp otyrmyz. Bir kılogramm qant 300 teńgege deıin qymbattady. Memleket aza­mattarǵa qoldaý retinde bólgen 42 500 teńgege otandastarymyz kóp ónim satyp ala almaıtynyn jaqsy túsinemiz, – deıdi saýda oryndaryn aralaǵan kandıdat Jambyl Ahmetbekov.

Qazaqstan Halyq par­tııa­sy­nyń atynan depýt­at­tyq­qa usy­nylǵan kandıdattar ha­lyq­tyń osal toptaryna áleý­mettik qoldaý retinde bóli­netin qarajat mólsheri tym az dep otyr. Sondyqtan áleýmettik qam­syzdandyrý tólemderiniń mólsherin arttyrý qajet dep esepteıdi. Olardyń aıtýynsha, turaqtandyrý qorlary­nyń múmkindikterin keńeıtý kerek. Qazaqstandyq óndirýshiler taýarlarynyń quny artpaýy tıis. Kandıdattar buǵan deıin elimizdiń azyq-túlik qaýipsiz­digi Qazaqstan Halyq partııasy­nyń saılaýaldy baǵdarlamasy­nyń negizgi tarmaqtarynyń biri bolyp sanalatynyn bir­neshe ret málimdegen bolatyn. «QHP azyq-túlik qaýipsizdigin jáne qazaq­standyqtardyń teń quqyqtaryn qamtamasyz etý úshin aýyl sharýashy­ly­ǵy maqsatyndaǵy jerlerdi sheteldikterge jekemen­shikke satýǵa zańdy tosqaýyl qoıý kerek deıdi. Partııanyń músheleri osy másele boıynsha referendým ótkizý qajet dep esepteıdi. Biz birinshi kezekte qajetti ónimder men taýarlardyń sapaly óndirisine qol jetkizýge nıettimiz. Par­tııanyń basty mindeti – elimizdi barlyq qajettiliktermen qam­tamasyz etý. Sodan keıin ǵana ónimimizdi shetelge jetkizý», deıdi J.Ahmetbekov.