Atalǵan jumysqa tapsyrys berýshi «QazAvtoJol», al bas merdiger «DorStroı» jaýapkershiligi shekteýli seriktestigi. Qaıta qurý jumystarynyń quny 5,2 mıllıard teńgeni quraıdy. Sonymen qatar, munda qaıta qurý jumystarynyń nátıjesinde 9 «Rapıskan» jeke ınspeksııalyq keshenderi paıda bolyp otyr. Olardy joǵary tehnologııalyq skanerler dep te ataıdy.
Keshenderdiń bireýi iri kólik quraldaryn skanerleýge arnalsa, qalǵan shaǵyn 8 keshen jeke adamdarǵa arnalǵan. Bul qurylǵylar shekaradan jaıaý ótýshiler úshin galereıamen baılanysqan A jáne V eki blokta ornalasqan. Sondaı-aq, múmkindigi shekteýli jandarǵa arnalǵan arnaıy sanıtarlyq qondyrǵylar jabdyqtalyp, aýmaǵy abattandyrylǵan.
Bul rette oblys ákimi Berdibek Saparbaev tekserý keshenderiniń jetkilikti bolýy pýnkt jumysy kezinde asa mańyzdy bolyp tabylatynyn atap ótti. Sonymen qatar, kirme joldar eki baǵyt boıynsha segiz jolaq bolyp keńeıtilgen. Maýsym ishinde «Qordaı» pýnkti arqyly 35 myńǵa deıin adam ótedi dep josparlanǵan.
Mınıstr Beıbit Atamqulov jumystyń barlyq baǵyttarynda halyqaralyq standarttarǵa umtylý qajettigin aıtty. Sondaı-aq, mınıstr ınvestor tartyp, avtoturaqtyń ornyna zamanaýı logıstıkalyq ortalyq salýdy usyndy. Sonymen qatar, jertóle qabatynda avtoturaq, birinshi qabatta kútý zaly, ekinshisinde kafe, valıýta aıyrbastaý pýnktteri, kádesyı dúkenderi jáne taǵy basqalaryn ornalastyrýǵa bolatynyn jetkizdi. Al, Berdibek Saparbaev bul usynysty qoldady. Endigi jumystar osy baǵytta júrgiziledi.
Jańartylǵan ótkizý pýnktimen tanysý barysynda Berdibek Saparbaev pen Beıbit Atamqulov tıisti mekemelerdiń «Merki-Shý-Býrylbaıtal» avtomobıl jolynyń qurylysy týraly esepterin tyńdady. Qytaılyq «China Xinxing Cjrporation Group» kompanııasy kelesi jyly joldyń 95 shaqyrymdyq bóligin aıaqtap, jumystyń qarqynyn arttyrý úshin jolshylar taǵy bir asfalt-beton zaýytyn iske qosatyn boldy. Kezdesýde Beıbit Atamqulov 11 kópir men jol ótkeliniń qurylysyna erekshe nazar aýdarýǵa shaqyrdy.
Al taǵy bir merdiger «ABK-Avtodor NS» jaýapkershiligi shekteýli seriktestigi baǵyttyń 167 shaqyrymyn quraıtyn qurylys jáne jol jumystarynyń barysy týraly habarlady. Bul rette Jambyl oblysynyń ákimi Berdibek Saparbaev kompanııalarǵa jergilikti turǵyndarǵa, eń aldymen halyqtyń áleýmettik osal toptaryna turaqty túrde kómek kórsetý kerektigin jetkizdi. Sondaı-aq, atalǵan jol tolyqtaı jaryqtandyrylyp, malǵa arnalǵan ótkelderdiń qajetti sanymen qamtylý qajettiligin aıtty.
