О́zekti máselelerdi talqylaýǵa Qazaqstan Halyq partııasynyń múshesi Jambyl Ahmetbekov qatysyp, QHP qarapaıym adamdardyń quqyqtary men zańdy múddelerin qorǵaý boıynsha júıeli jumysty jalǵastyrý úshin saılaýǵa qatysyp otyrǵanyn eske saldy.
– Biz osy jyly Qazaqstandaǵy naqty áleýmettik-ekonomıkalyq jaǵdaı Úkimettegi optımısterdiń boljamdarymen túbegeıli sáıkes kelmegenin kórip otyrmyz. Qarapaıym qazaqstandyqtar tıisti qorǵaýsyz qaldy. Biz ekonomıkadaǵy kosmetıkalyq reformalar eshteńe bermeıdi dep sanaımyz. Bizde kvazımemlekettik jáne transulttyq shıkizat korporasııalary basymdyqqa ıe. Olar tereń óńdeýmen emes, shıkizatpen aınalysqan kezde eshteńe ózgermeıdi. Biz memleket damýdyń túbegeıli jańa modelin qabyldaýy – halyqtyq ekonomıka qurýy kerek dep sanaımyz, – dedi J.Ahmetbekov.
Partııa múshesi memleket ónimdi jáne laıyqty aqy tólenetin eńbek quqyǵyn qamtamasyz etýi tıis ekenin málimdedi.
– Ekonomıka ósimdi kórsetse de, halyq muny sezbeıdi. Biz ónimderdi, taýarlardy, jabdyqtardy ımporttaımyz jáne baǵanyń úzdiksiz ósýin baıqaımyz. Qazaqstandyqtardyń dollardaǵy ortasha tabysy 2008 jyldan beri ósip kele jatqan joq. Qazaqstanǵa halyqtyq ekonomıka qajet. Mundaǵy negizgi basymdyq – ishki jalpy ónimniń ósýi emes, turaqty jumyspen qamtý jáne halyq tabysynyń ósýi, – dedi J.Ahmetbekov.
Ol óz áriptesterine partııanyń saılaýaldy baǵdarlamasynyń negizgi tarmaqtarynyń biri nesıe raqymshylyǵyn júrgizý týraly usynys ekenin eske saldy.
– Birden aıta keteıin, biz barlyq nesıelerdiń, ásirese sán-saltanat zattaryna, toılarǵa jáne saparlarǵa alynǵan nesıelerdiń keshirilýine qarsymyz. Biz pandemııaǵa deıin adal salyq tólegen, biraq shekteý sharalarynyń saldarynan ómirlik qıyn jaǵdaıǵa tap bolǵan kásipkerler men qyzmetkerlerdi qoldaımyz. Áleýmettik shıelenistiń deńgeıi joǵary ekenin kórip otyrmyz. Ony azaıtý úshin naqty sharalar qajet, – dep túıindedi J.Ahmetbekov.
Sondaı-aq, Almatyda erekshe fleshmob ótti. Partııa belsendileri men eriktileri «judyryqtyń», ıaǵnı, Qazaqstan Halyq partııasynyń logotıpinde beınelengen sımvoldyń beınesin jasady. Osylaısha, qatysýshylar aldaǵy Parlament Májilisi men máslıhattar depýtattyǵyna kandıdattardy qoldady.
– Biz jastarymyzdy patrıotızm rýhynda tárbıeleýdi ıdeologııamyzdyń basty mindeti dep sanaımyz. Biz bolashaq urpaǵymyzdy moraldyq-adamgershilik, mádenı, rýhanı qundylyqtar rýhynda tárbıeleýge tıispiz. Barlyq etnıkalyq, dinı toptardyń múddelerin jáne ulttyq qaýipsizdik talaptaryn teń dárejede eskeretin jalpyulttyq ıdeologııany tanymal etý mańyzdy, – dedi kandıdat Svetlana Kan.
