Qyrǵyz Respýblıkasynyń Prezıdenti bolyp jasy 35-ten tómen emes, 70-ten joǵary emes, Respýblıkada jalpy 15 jyldan kem emes ýaqyt turǵan, memlekettik tildi biletin azamat saılana alady.
Ortalyq saılaý komıssııasynyń tóraıymy Nurjan Shaıldabekovanyń osy mekemeniń baspasóz ortalyǵynda keshki saǵat 20:40-ta jarııalaǵan aqparatyna qaraǵanda, respýblıkadaǵy saılaý ýchaskeleriniń 87 paıyzynan elektrondy esepteý arqyly alynǵan málimetterge sáıkes, 1 230 627 adam, ıaǵnı saılaýǵa quqyǵy bar azamattardyń 34,33 paıyzy daýys berýge qatysqan. Olardyń 79 paıyzdan astamy prezıdenttik qyzmetke Sadyr Japarovtyń kandıdattyǵyn jaqtap daýys bergen. Bul 1 mıllıonǵa jaqyn saılaýshy. Ekinshi oryndy 6 paıyzdan artyq daýyspen Adahan Madýmarov, úshinshi oryndy 2 paıyzdan asa daýyspen ózbek halqynyń ókili, isker Babyrjan Tólbaev ıelengen. Basqa talapkerler eki paıyzǵa jeter-jetpes jáne bir paıyzdyń arǵy-bergi tóńireginde daýys alǵan. Áıelder arasynan jalǵyz kandıdat Klara Sooronkýlova 11 263 saılaýshynyń, bylaısha aıtqanda bir paıyzǵa jaqyn daýys aldy.
Aıta keteıik, eldiń saılaýǵa tıesili zańnamalarynda prezıdenttik saılaýda daýys berýshilerdiń shegi belgilengen emes. Al endi referendýmdardy ótkerý boıynsha zańda saılaý quqyǵy bar azamattardyń 30 paıyzy óz daýystaryn berse, referendým nátıjesi esepke alynady. Joǵaryda málimdelgendeı, saılaýshylardyń qatysýy belgilengen shekten asty. Daýystaryn bergen saılaýshylardyń 80 paıyzdan astamy basqarýdyń prezıdenttik júıesin tańdaǵan.
Nazarbek BAIJIGITOV,
Qyrǵyz Respýblıkasynyń jalpyulttyq «Qyrǵyz Týy» gazetiniń qyzmetkeri,
arnaıy «Egemen Qazaqstan» úshin
