– Otandastarymyz, halqymyz búgingi saılaýǵa kelip, júrek qalaýymen óz daýystaryn berip jatyr. Sol daýystardan bizdiń partııamyz da úmitti. Kóp jumys atqardyq. Saılaýaldy úgit-nasıhat jumystarynyń aıasynda túrli sharalardy qolǵa aldyq. Josparlaǵan dúnıemizdiń barlyǵyn iske asyrdyq dep oılaımyn. Men ózim buǵan deıin de kóptegen saılaýǵa qatystym. Alaıda bul saılaýdyń orny bólek. О́ıtkeni partııalar arasynda shynaıy tartys júrdi. Elimizdegi barlyq saıası partııalarǵa teń múmkindik berildi. Árbir partııa óz múmkindigin barynsha kórsetip, saılaýshylardyń daýysyn jınaý úshin eldi aralap, úgit-nasıhat jumystaryn júrgizdi, – dedi Á.Bektaev.
Onyń aıtýynsha, osy jylǵy saılaý erekshe jaǵdaıda ótip jatyr. Pandemııaǵa baılanysty úgit-nasıhat jumystary da sanıtarlyq talaptarǵa saı uıymdastyrylypty. Otandastarymyzǵa túsindirý jumystary da jan-jaqty júrgizilgen kórinedi.
– Endi el azamattary da óz bolashaǵy úshin durys tańdaý jasaýy qajet. Úgit-nasıhat jumystary tolyq zań aıasynda júrgizildi. Ortalyq saılaý komıssııasynda, memlekettik quzyrly organdarda jáne buqaralyq aqparat quraldarynda barlyq partııalar úshin ortaq múmkindik berildi. Árıne álemdi ábigerge salǵan pandemııanyń úgit-nasıhat jumystaryna da kedergi keltirgenin bárimiz bilemiz. Sondyqtan úgit-nasıhat naýqany kezinde sanıtarlyq talaptardy barynsha qatań saqtaýǵa týra keldi. Ásirese saılaýshylarmen kezdesý kezinde saq bolýǵa tyrystyq. Eń mańyzdysy sol, elimizdiń árbir azamaty óziniń konstıtýsııalyq quqyǵyn durys ári erkin paıdalana bilgeni jón, – dedi partııa tóraǵasy.
