Ońtústik Qazaqstan oblysynda azamattyq nekedegi kúıeýin tapsyryspen óltirtken áıel ustaldy. Bul týraly «24 kz» habarlady.
Áıel inisine kúıeýiniń kózin joıýdy tapsyrǵan. Jezdesin «balyqqa baramyz» dep aldaǵan baldyz sybaılasymen birge ony býyndyryp óltirip, múrdesin sý qoımasynyń mańyna kómgen. 39 jastaǵy áıel inisine aıtqanyn oryndaǵany úshin 1 mln. teńge beredi. Onyń inisi bolsa, qylmysty birge jasaǵan kúdiktige jezdesiniń kóligin berip, esep aıyrysqan. Qazir quqyq qorǵaý qyzmetkerleriniń qolyna túsken 3 aıypkerdiń ústinen qylmystyq is qozǵalyp, tergeý amaldary júrgizilýde. «Ustalǵan azamatshanyń aıtýynsha, azamattyq nekede turǵan kúıeýimen 1,5 jyldan beri birge turǵan. Ol áıeline qol kóterip, bıznesine qol salmaqshy bolǵan kórinedi. Osy sebep aýyr qylmys jasaýǵa ıtermelepti»,-deıdi oblystyq ishki ister departamenti til jáne aqparat basqarmasynyń jetekshisi Saltanat Qarakózova.
Baqytbek Keneshuly.
Derekkóz: «24 kz».
