Qyryq jasynda baýyr aýrýynan ómirden ótken ol az ǵumyr keshse de álemdik ádebıetke kóp mura qaldyrdy. London qalamynan kórkemdik deńgeıi bıik roman, povester men áńgime, ocherkter týdy. Ol ómirde bárin kórdi: qańǵybastyq, teńiz qaraqshylyǵy, kontrabanda, altyn izdeý, sátti qoǵamdyq qyzmet jáne sosıalıstik murattary úshin kúres.
Alaıda London tarıhta birtýar romanıst hám sheber áńgimeshi qalpymen ǵana qaldy. Onyń dúnıeden ozǵanyna ǵasyrdan asty: shetelde áli kúnge deıin oqylady. Qazaq oqyrmandaryna da tańsyq emes. Degenmen shyǵarmalary qazaq tiline tolyq aýdarylǵan joq.
Al Júsipbek Aımaýytov avtordyń «Telegeı teńiz, attanys» shyǵarmasyn 1926 jyly «Jańa mektep» jýrnalyna (4,5 sandary) alǵashqylardyń biri bolyp aýdaryp, jarııalaǵan. Bala kúninen teńizde ósken jazýshynyń qalamynan týǵan týyndylardyń barlyǵy derlik teńiz aınalasyndaǵy turmys-tirshilikke toly.
London shyǵarmashylyǵynyń bıigi – «Martın Iden» (1909, qazaq tilinde – 1968) roman-bıografııasynda avtordyń ózindik tulǵasy, qoǵam men qorshaǵan ortany tanýy, sóz óneri jónindegi oılary jazylady. Keıinnen London shyǵarmalaryn Muhtar Áýezov, M.Dáýletbaev, B.Omarov, t.b. qalamgerler aýdarypty. Áýezovtiń «Kókserek» povesinen kanadalyq jazýshy Ernest Seton-Tompsonnyń «Vınnıpeg qasqyry» men Londonnyń «Aq azý» atty shyǵarmalarynyń áseri baıqalady desedi. Bul London tvorchestvosynyń qazaq klassıkasyna belgili bir deńgeıde yqpal etkenin kórsetedi.
