Olaı deıtin sebebimiz, 2007 jyly bes jastaǵy Deklan Tompson esimdi aǵylshyn balasyna adam jambasynda bolatyn «Pertes» aýrýynyń sırek dıagnozy qoıylady.
Pertes aýrýy balalyq jasta paıda bolady jáne urshyqbýynnyń aýmaǵynda (jambastaǵy býyn) jáne ortan jiliktiń (jambas súıeginiń býyny) basynyń zaqymdanýymen sıpattalady.
Legga-Kalve-Pertes aýrýy ortan jiliktiń basyndaǵy qan aınalymynyń ýaqytsha buzylysynda paıda bolady. Sondaı-aq qan aǵymy buzylǵan kezde tinderdiń tirshiligi joıylady. Sonyń saldarynan Deklan Tompson eki jylǵa jýyq múgedekter arbasyna tańylady. Dárigerler «Deklan endigide júre almaıdy» dep oılaıdy.
Degenmen kóptegen operasııalardyń nátıjesinen keıin jas jigit aıaǵyna tura bastaıdy. Osy ýaqyt ishinde ata-analar kishkentaı ulyna qamqorlyq jasaýmen bolady. Olar emdelýine aqsha izdep, fızıoterapııaǵa jıi aparyp júredi.
Deklan Tompson segiz jasqa tolǵanda densaýlyǵy qalpyna kele bastaıdy. Ákesi ony birden «Sheffıld Ýensdeı» akademııasyna jazdyrady. Jas bala sol jerde fýtbolǵa mashyqtanyp, sheberligin shyńdaıdy.
Lı Tompson (jigittiń ákesi) - burynǵy fýtbolshy bolatyn. Ol mansabyn «Sheffıld Iýnaıtedten» bastaǵan. Biraq joǵary deńgeıge jete almaǵan. Qazir jattyqtyrýshy bolyp jumys isteıdi. Ol ulyn ózi jeke oqytty. Onyń qalpyna kelýin baqylap, akademııadaǵy dárigerlermen onyń jaǵdaıy týraly únemi habarlasyp otyrdy.
Deklan «Sheffıld Ýensdeı» fýtbol klýbymen alǵashqy kásibı kelisimshartqa otyrǵan kún - Tompsondar áýletindegi eń aıtýly oqıǵa bolǵan edi.
«Ulym fýtbol klýbynan usynys túsip jatqanyn aıtqan kezde men oǵan senbedim. Joq, men ulymnyń keremet fýtbol oınaıtynyn bilemin. Biraq biz úlken qıyndyqtardan óttik. Bul meniń jadymda úlken iz qaldyrdy. Biraq jańalyqqa qatty qýandym», - deıdi jattyqtyrýshy áke.
Sondyqtan da bolar 2021 jyldyń 9 qańtarynda ótken kásibı fýtboldaǵy 18 jasar ulynyń debıýti otbasy úshin jeke bir mereke. Al teledıdardan 38-shi nomerdegi fýtbolshynyń jasyl alańǵa qaraı júgirip shyqqan sátin kórgende ákesi eriksiz jylap jiberdi. Ol oıynshy - baıaǵy múgedek Deklan Tompson bolatyn.
Sirá, bul onyń eń bir baqytty sáti bolar...
